Hihi nĩ ũrĩ weyũria ũtũũro waku na wa famĩlĩ yaku ũgaakorũo ũhaana atĩa mahinda mokĩte? Hihi ũgakorũo wĩ mũtongu kana wĩ mũthĩni, ũrĩ na andũ makwendete kana ũrĩ na ihooru? Hihi nĩ ũgũtũũra ihinda iraihu, kana ũgũikara o mĩaka mĩnini? Andũ maaneyũria ciũria ta icio kwa ihinda rĩa mĩaka mĩingĩ.

Ataaramu nĩ maroraga ũrĩa maũndũ marathiĩ thĩinĩ wa thĩ na makaratha ũrĩa maũndũ makahaana thutha-inĩ. O na gũtuĩka maũndũ maingĩ maarathĩte nĩ mahaanĩkĩte, mamwe matiigana kũhaanĩka. Kwa ngerekano, Guglielmo Marconi ũrĩa wathondekire mũthemba wa thimũ ĩtarahũthĩra waya aarathire ũũ mwaka-inĩ wa 1912: “Kũgĩa na thimũ itarĩ na waya gũgũtũma mbaara ithire.” Na mũndũ ũmwe warutaga wĩra na kambuni ya kũrekondi nyĩmbo yetagwo Decca Record Company ũrĩa waregire kũrekondi nyĩmbo cia gĩkundi kĩa Beatles mwaka wa 1962 eetĩkĩtie atĩ ikundi cia gũthaaka ngita nĩ ingĩatigire kwendwo nĩ andũ.

Andũ amwe macaragia ũhoro wĩgiĩ mahinda mokĩte kuuma kũrĩ mahinya matarĩ ma ndũire. Amwe matuĩragia ũhoro kwĩ ogĩ a njata na nĩkĩo ngathĩti nyingĩ ikoragwo na njata ya o mũndũ. Angĩ nao macaragia ũhoro kũrĩ aragũri arĩa moigaga nĩ mahotaga “gũthoma” mahinda mokĩte na njĩra ya kũinia mbũgũ, gũtaũra iroto, kana kũrora mĩkururo ya rũhĩ rwa mũndũ.

Andũ amwe mahinda ma tene nĩ maathiaga kũrĩ athĩnjĩri-ngai cia maheeni nĩguo mamorĩrie kũrĩ ngai icio ũhoro wao wa mahinda mokĩte. Kwa ngerekano, kwĩrĩkanaga atĩ Mũthamaki Croesus ũrĩa wathanaga Lydia, nĩ aatũmĩire mũthĩnjĩri-ngai wakoragwo Delphi bũrũri-inĩ wa Ngiriki iheo cia mbeca nyingĩ, akĩenda amwĩre kũngĩathire atĩa angĩathire kũrũa na Mũthamaki Kurusu wa Perisia. Mũthĩnjĩri-ngai ũcio oigire atĩ Croesus angĩathire kũrũa na Kurusu, “ũthamaki mũnene” nĩ ũngĩanangirũo. Croesus nĩ aathire kũrũa tondũ aarĩ na ma atĩ nĩ egũtooria, no ũthamaki mũnene ũrĩa wanangirũo nĩ wake mwene!

Ũrathi ũcio ũngĩataũkĩkire maita merĩ warĩ wa tũhũ. Ũngĩonekire ũrĩ wa ma gũtekũmakania nĩ mwena ũrĩkũ wahootana. Croesus orirũo nĩ indo ciothe nĩ ũndũ wa kũheo ũhoro mũhĩtanu. Ĩ nao arĩa mathiaga kũrathĩrũo kũgerera njĩra iria ciendetwo nĩ andũ aingĩ matukũ-inĩ maya nĩ mateithĩkaga?