A saje kichjonangilai yaoli jósʼin kuijnai nichxin xi nroaján kʼoa jósʼin koatio je familiali. A sʼeeno tao̱n, a tjao koa̱nno xíngio axo ma̱ sʼin si̱chjáo yaono kʼoa a tojon tiyo koaanno. A nʼio tse nichxin kuiyo axo tochoatsení. Jenkjín jmi nó tjínle nga kui jebi kjonangi je chjota.

Nichxin xi tiyoaa ndʼaibi, je chjota xi kui kotʼayason jmeni xi chon sonʼnde tongini kʼoatso jmeni xi koa̱n. Jmeni xi tso tjínkʼa xi bitjoson kʼoa tjín xi mai. Tobʼelañá, kʼianga nó 1912, je xi Guglielmo Marconi tsakʼin xi tsakʼénda telégrafo xi tsín cable machjénle, i kitso: “Nga tsín ticable koa̱nchjénni koasenkaoná nga tsín tikjoajchán sʼe̱ni”. Kʼianga nó 1962, je chjotale empresa xi Decca Record tsakʼin tsakʼasjengi je grupo xi Beatles tsakʼin nga̱ kʼoasʼin kisikjaʼaitsjen nga jetíchangi xi guitarra síkjane.

Nʼio nkjín chjota xi mele skoe̱ jmeni xi koa̱n nichxin xi nroaján kʼoa básjai josʼin nga sʼe̱jinle. Tjínkʼa chjota xi astrología nʼio sísin kʼoa xi tʼatsʼe jebi yaa faʼaitʼa tsa rebista kʼoa tsa periódiko. Kʼoa tjínkʼa xi je kjonangile je chjota xi kotʼason jmeni xi koa̱n nichxin xi nroaján jolani, je xi kotʼa xo̱n baraja, xi xitjo kjine kʼoa xi finrʼoe chjine nga tsoyale nijñále.

Nichxin kjoatse, nkjín chjota xi koanmele tsabe jmeni xi koa̱n nichxin xi nroaján, kʼoa jé kiskonangile je naʼmi xi kisikʼatoya jmeni xi kitsole je ninále. Tobʼelañá, je rey xi tsʼe Lidia xi Creso tsakʼin, nʼio nkjín tsojmi kisikasén kjoatjaole je yo̱ngo̱ xi Delfos tsakʼin xi Grecia kisʼejna, nga kʼoakatatsole je naʼmi xi ya tjío tsa kuinjele nga skaan kao Ciro xi naxinandá Persia tsʼe. Naʼmi jebi kʼoakitso nga je Creso “jngo naxinandá xi tse nganʼio tjínle” sikjeson, koankjainle jme xi tsakʼinle tonga totsʼeni naxinandá kinikjeson.

Jmeni xi kitso naʼmi jebi toxitsjoaní nga̱ tsín kʼoakitsokixi ʼyani xi kuinjele, alikui ndasʼin kichomani nga kʼoasʼin koankjainle Creso nga je kuinjele. Nichxin xi tiyoaa ndʼaibi, a ndasʼin bichómani nga kui sínʼiotʼa yaole chjota tʼatsʼe jmeni xi ʼmile xi koa̱n nichxin xi nroaján.