Na o kile wa ipotšiša gore bokamoso bja gago le bja lapa la gago bo tla ba bjang? Na go bonagala o tla huma goba wa diila, o tla thaba goba wa nyama? Na o tla phela nako e telele goba na o tla hwa ka pela? Batho ba be ba dutše ba ipotšiša dipotšišo tše bjalo ka mengwaga e dikete.

Lehono ditsebi di ithuta ka dilo tšeo di diregago dinageng tše dintši gomme tša bolelela bokamoso pele. Le ge bontši bja dilo tšeo ditsebi di di bolelago di direga, fela tše dingwe ga di direge gomme tše dingwe di baka manyami. Ka mohlala, ka 1912 Guglielmo Marconi, e lego mohlami wa didirišwa tša poledišano tšeo di sa dirišego dithapo goba megala, o ile a tsopolwa a be a bolelela pele gore: “Didirišwa tšeo di sa dirišego dithapo di tlo thibela ntwa.” Mošomi wa Khamphaning ya go Rekhota ya Decca yo a ilego a ganetša sehlopha sa mmino sa Beatles go rekhota ka 1962, o be a dumela gore go be go tla fela ka dihlopha tšeo di bapalago katara.

Ba bantši ba ya go batho bao ba dirišanago le meoya e le gore ba tsebe ka bokamoso. Ba bangwe ba nyaka keletšo go balepi ba dinaledi. Dimakasine tše dintši le dikuranta di na le di-horoscope. Ba bangwe ba ya go didupe goba dinoge tšeo di ipolelago gore di kgona go tseba bokamoso ka go lebelela di-tarot card, dinomoro goba methalo ya ka seatleng.

Ka baka la go nyaka go tseba ka bokamoso, ba bangwe mehleng ya bogologolo ba be ba eya go didupe, e lego baporofeta ba banna goba ba basadi bao ba bego ba re ba fetiša tsebišo ya modimo yoo ba ipolelago gore ba a mo emela. Ka mohlala, go thwe Kgoši Croesus wa Lydia o ile a romela dimpho tša maemo a godimo go sedupe sa motseng wa Delphi, Gerika, e le ge a kgopela go bontšhwa gore go be go tla fenya mang ge a be a ka lwa le Korese wa Peresia. Sedupe seo se ile sa re Croesus o be a tlo fediša mmušo o mogolo ge a ka lwa le Korese. Ka ge Croesus a be a kgodišegile gore o tlo fenya, o ile a ya go lwa le Korese, eupša mmušo o mogolo wo o ilego wa fedišwa e bile wa gagwe!

Polelelopele ya sedupe seo e sa kwagalego ga se ya thuša Croesus ka selo. Go nepa ga yona go be go ithekgile ka gore go fenya mang. Croesus o ile a lahlegelwa ke dilo ka moka ka baka la go forwa. Na lehono batho bao ba dirišago mekgwa e tumilego gore ba tsebe ka bokamoso ba a holega?