Bo a yega di puntra bo mes kico ta spera abo cu bo famia den futuro? Rikesa, pobreza, amor of soledad? Lo bo biba largo of lo bo perde bo bida inesperadamente? Pa miles di aña hende a haci nan mes e preguntanan ey.

Awendia expertonan ta studia desaroyo- y cambionan cu tin influencia riba hopi nacion y nan ta pronostica futuro a base di esey. Tin hopi cos cu nan a pronostica cu a sosode, pero tin varios biaha cu nan a faya tambe, y tin biaha barbaramente. Por ehempel, na 1912, Guglielmo Marconi, kende a inventa telegrafia sin kabel, a yega di pronostica cu “danki na e binidero era sin kabel, of wireless, lo no tin guera mas.” Y un representante di Decca Record Company, kende a rechasa e banda di the Beatles na 1962, a kere cu bandanan cu ta toca guitara manera the Beatles lo perde nan fama.

Hopi hende ta acudi na fuentenan sobrenatural pa haya sa kico lo sosode den futuro. Tin ta busca conseho cerca astrologo, entre otro, mediante horoscop cu ta sali regularmente den hopi revista y corant. Otronan ta consulta hende cu ta wak destino of psikico (of, psychic), kendenan ta bisa cu nan por “lesa” carta tarot, number of plant’i man pa haya sa futuro.

Y den pasado, algun hende tabata consulta oraculo: sacerdotenan homber y muher cu tabata duna informacion cu supuestamente nan tabata haya for di e dios cu nan ta representa. Por ehempel, ta ser bisa cu Rey Creso di Lidia a manda regalo hopi costoso pa e oraculo di Delfos, Grecia, pa e haya sa kico lo pasa si e bringa contra Ciro di Persia. E oraculo a bisa cu si Creso bringa contra Ciro, e lo destrui “un imperio grandi.” Pesey el a bay bringa contra Ciro cu yen di confianza cu lo e gana. Pero e imperio grandi cu a ser destrui ta esun di dje.

E pronostico confuso di e oraculo tabata inutil, pasobra e pronostico lo a cumpli sin importa ken a gana e bataya. Creso a perde tur cos debi na e informacion robes ey. Acaso hende den nos tempo cu ta acudi na esnan cu ta uza otro metodonan pa predeci futuro tabatin mihor resultado?