Hast du mol jewundat, woo sikj daut met die un diene Famielje romnämen woat? Woascht du oam ooda rikj sennen? Woascht du die noch mol befrieen ooda nich? Woascht du een langet ooda een kortet Läwen haben? Menschen haben aul fa dusende Joaren äwa soont jejrebbelt.

Vondoag dän Dach es daut soo, daut wan doa waut nieet oppkjemt, jeft daut uzhent Menschen, waut proowen veruttosajen, woo daut woat utkomen. Eenjemol haft sikj daut soo romjenomen aus dee säden, oba foaken uk nich. Toom Biespel funk Guglielmo Marconi ut, woo eena Norechten schekjen kunn, oba onen Dräd. Aune 1912 säd hee verut: “Wiels wie nu onen Dräd Norechten schekjen kjennen, woat daut kjeenen Kjrich mea jäwen”. Lota aune 1962 wull een Aunjestalda von eene groote Musikj-Kompanie nich met eene Musikj-Grupp toopschaufen, waut Beatles heet. Dise Grupp späld meist bloos Jittoa, un dis Aunjestalda jleewd, daut de Menschen wudden soone Gruppen boolt nich mea jleichen. Oba lota worden de Beatles äwa de gaunze Welt sea bekaunt.

Väle proowen opp eene aundre Wajch uttofinjen, waut noch komen woat. Eenje gonen no Stierndieda ooda dee läsen soont, wua minkj de Tookunft fa eenem verutjesajcht woat. Aundre befroagen Hakjsen ooda Woasaja, waut jleewen, dee kjennen de Tookunft verutsajen derch Koaten, Nummasch ooda derch de Striepen enne Henj.

De Menschen ieeschtemma wullen uk weeten, woo sikj daut met an romnämen wudd. Doawäajen jinjen dee no Priestasch, waut säden, see kunnen de Jetta befroagen. Biejlikj woat doa jesajcht, daut Croesus, de Kjennich äwa de Jäajent Lydia, diere Jeschenkja no eenen Priesta en Griechenlaunt schekjt. Hee wull seenen, woo daut wudd utkomen, wan hee jäajen Kierus von Persien kjamfen wudd. De Priesta säd verut, daut Croesus “een grootet Volkj” venichten wudd. Croesus wia sikj secha, daut hee jewennen wudd un fua loos. Oba hee vespäld un sien ieejnet grootet Volkj wort doaderch venicht.

Dis Priesta säd daut soo verut, daut sikj daut aulmols erfellen wudd. Wiels hee säd je nich krakjt, woon Volkj wudd venicht woaren. Doawäajen hilt sien verutsajen nuscht en. Croesus must fa disen nutzloosen Rot sea dia betolen un daut kjeem sea schlajcht ut fa am. Woo es daut vondoag dän Dach? Kjenn wie ons dolla doaropp veloten, woo de Menschen nu proowen, waut veruttosajen?