Waswe, enitaem iu laek for savve wanem bae happen long future bilong iu and famili bilong iu? Maet iu garem olketa kwestin olsem: Waswe, bae mi rich or poor? Waswe, bae mi faendem eniwan wea lovem mi, or mi stap seleva nomoa? Waswe, bae mi laef longtaem, or dae kwiktaem nomoa? Pipol wea stap staka thousand year go finis garem olketa semkaen kwestin tu.

Olketa savveman lukluk long olketa samting wea happen long world and talem olketa samting wea olketa tingse bae hem happen long future. Staka samting wea olketa talem hem kamap tru, bat olketa nara samting, barava opposite long hem nao happen. Olsem example, long 1912, Guglielmo Marconi, man wea wakem wireless telegraph, talem samting wea hem tingse bae happen long future. Hem sei: “Start distaem wea pipol bae iusim wireless telegraph, war bae nomoa nao.” Nara man wea waka for Decca Record Company, wea no laek for recordim olketa song bilong datfala band Beatles long 1962, sei pipol bae no interest long olketa band wea pleim guitar.

Staka pipol duim olketa samting wea join witim spiritism for savve wanem bae happen long future. Samfala pipol askem advaes long pipol wea bilivim astrology. Olketa horoscopes chart evritaem insaed staka magasin and niuspepa. Olketa narawan savve go long pipol wea iusim olketa tarot card, namba, or wea savve lukluk insaed hand for talem wanem bae happen long future.

Pipol long bifor wea laek savve long future olketa go long olketa kastom man or woman wea sei olketa savve talem message from god wea olketa stand for hem. Olsem example, olketa sei King Croesus bilong Lydia givim olketa expensive present for kastom woman wea stap long Delphi, long Greece, mekem hem talem sapos bae hem win taem hem faetem Cyrus bilong Persia or nomoa. Woman hia sei “wanfala bigfala kingdom” nao bae distroe sapos Croesus go faetem Cyrus. From Croesus tingse bae hem win, hem go for faetem Cyrus, batawea, kingdom bilong hem nao distroe!

Samting wea woman hia talem hem iusles nomoa bikos hem nating helpem King Croesus. Taem hem sei “wanfala bigfala kingdom” bae distroe, datwan savve minim kingdom bilong Croesus or kingdom bilong Cyrus tu. Croesus lusim evri samting bikos hem tingse hem kasem stretfala information. Waswe, sem samting happen tu long pipol distaem wea iusim olketa difren wei for savve long future?