Ichá maykʼajllapis piensarerqanki: “¿Imaynataj kausayniy qhepaman kanqarí? ¿Qolqeyojchu kasaj? ¿Sapallaychu kasaj? ¿Unaytachu kausasaj?”, nispa. Familiaykimantapis ichá kikillantataj llakikunki. Runasqa may unayña chay llakiyniyoj kanku.

Kay tiempopipis, wakin runasqa imaschus mundontinpi kashasqanta qhawarinku. Chayman jinataj imaschus qhepaman kananta ninku. Wakinpa nisqankoqa juntʼakorqa, wakinpatarí mana. Iskay runasmanta parlarina. Ujqa Guglielmo Marconi, ujnintaj musicasta grabaj empresamanta encargado. Guglielmo Marconiqa radiota rikhuricherqa. Payqa 1912 watapi nerqa: “Runasqa pisimantawan karumantapacha aparatosnejta parlanqanku. Chaypachataj manaña guerras kanqachu”, nispa. Musicasta grabaj runarí, may rejsisqa grupota 1962 watapi mana grabachiyta munarqachu. Payqa piensarqa, guitarrasta tocajkuna niña uyarisqachu kanankuta.

Wakin runasqa suertenkuta yachayta munaspa, estrellaspi suerteta qhawajkunata tapukamunku. Chayrayku revistaspi, periodicospipis horóscopo nisqa rikhurinpuni. Chaytaj estrellasman jina runaspa suertenta willan. Wakenqa yatirisman rinku. Paykunataj naipespi, cocapi chayri makipi suerteta qhawanku.

Ñaupa tiempopipis, runasqa qhasi diosespa llankʼaj yatirista tapukamoj kanku. Lidia suyumanta rey Cresoqa chayta ruwarqa. Payqa Persiamanta rey Cirowan maqanakoj rinanpaj, Delfos lugarmanta yatirita tapukamorqa. Cresoqa guerrapi pichus atipananta yachayta munaspa, chay yatiriman may valorniyoj imasta qorqa. Yatiritajrí Cresoman nerqa: “Rey Cirowan maqanakunki chayqa, may atiyniyoj nación chinkanqa”, nispa. Chayta creespa, rey Cresoqa Cirowan maqanakoj rerqa. Jinapis paylla atipachikorqa.

Chay yatirej nisqanqa, qhasilla karqa. Guerrapeqa uj atipaj kanpuni. Rey Creso chay yatirita creesqanrayku, nacionnin chinkarqa. Kay tiempomanta runaspis, imachus qhepaman kananta yachayta munallankutaj. Qhepan yachaqanapi yachakusun imastachus chaypaj ruwasqankuta.