U di nga tshuka u dzi wudzisa gu khuwe womi wago ni uwo wa ndranga yago wu na khala kharini? Wo dundrugeya gu khuwe mu na ba muri vathu nyo ghanye mwendro sisiwana? Vathu va na mi gola mwendro mu na tshaniseka khu wutundzu? Mu na vbanya tepo nyo laphe mwendro mu nafa khavba ni avba? Khu myaga nya yingi, vathu va ngu zama gu mana mihlamulo nya siwudziso sesi.

Muhuno vagengeyi va ngu zama gu hevbula esi si na giregao mafuni va bwe va ganeya edzi silo si na khalago khidzo teponi yi tago. Nya singi sakona va ganeyago, si ngu girega, ganiolu simbe kha si giregi. Khu giyeyedzo, gu ngu ganedwa pwani khu 1912, Guglielmo Marconi, oyu a nga tugula mutshini nya telegrafo nya mba na dzifiyu, a di khuye: “Olu yi vbohidego tepo nya gu hi si thumisi dzifiyu, dzinyimbi dzi na vbeya.” Moyo nya vathangeyi va Decca Record Company, a nga bomba gu hakha tsawa nya vaembi wu ranwago pwani Beatles khu 1962, a di gu pimisa gu khuye vaembi nya dzivhiyola va na fuva.

Vathu nya vangi va ngu hongola ga vathu va thumisago tshivba nya madhimoni gasi va yati wumindru wawe. Vambe va ngu lomba wusingalagadzi ga va sasuli nya dzinyeledzi; vambe va ngu thumisa dzindziya nyo sasuli khidzo dzi yeyedzwago omu nya dzijornali ni dzirevhista. Vomo vambe va wudzisago vavhumbi mwendro ava va gu khavo va ngu si kodza “tugula” wumindru khu gu thumisa dzinumero mwendro khu gu khedza dzirisko dza mandzani.

Gale yoyo, vathu nyo khaguri va di gu wudzisa vaprista — nya vama ni vanyamayi — gasi va va embeya mahungu nya wumindru va ma manidego ga vanungungulu ava va va emeyago. Khu giyeyedzo, gu ngu ganedwa pwani Pfhumu Creso, wa Lídia, rumede siningwa nyo dhure ga muprista wa Delfos, tigoni ga Gresya, na lomba guti esi si na dugeleyago a guya dwana ni Kiro, pfhumu ya Persya. Muprista yoyo a di khuye Creso a di hadzi fuvisa “mufumo nya wukhongolo” a gu ya dwana naye. Na tade khu gutumba, Creso a di hongola a ya dwana, ganiolu mufumo nya wukhongolo wu nga fuviswa khuwo waye!

Mahungu yoyo nya mba pwisisega ya muprista yoyo kha ma phasa gilo; ayo ma di gu wonegisa gu khatshi lisine na gu si khathadzisegi oyu a nga hadzi pala. Creso luzide satshavbo khu kotani nya mahungu yoyo nyo kanganyise ma mu resedego sigaradzo. Ganiolu, vathu vava muhuno va vbwetedzeyago dzindziya dzi tidwago ngudzu gasi guti sa mindru, ina va ngu dugeleya?