¿Ménisïjtsï kurhamarhikuarhiski ambejtsï úkuarhinchaa chá ka chaari familia sánderu orhepatini? ¿Eratsesïntsï eskajtsï jatsikuarheriuaka ka eskaksïni máteruecha xénchaaka? ¿Ojtsï kueratanchaa sentabu ambe ka jandiajkujtsï pʼikuarherani? ¿Iónijtsï irekaa o ma repentkujtsï uarhia? Kʼuiripuechaksï desde iónisï ini ambe kurhamarhikuarhistia.

Ini jurhiatikuechani jimbo, máru kʼuiripuechaksï uandasïndi ambe enga úkuarhiaka sánderu orhepatini imani ambe jimbo engaksï iámindu kʼuiripuecha tsitijka úni. Nájkiruka uánikua ambe engaksï imeecha uandajka niárajka ísï úkuarhini, ístu uánikua ambe no ísï úkuarhisïndi. Pori ejemplu, 1912 jimbo, Guglielmo Marconi, enga telegrafuni inalambrikuni ma úka, ini ambe uandaspti: “Iásï enga nóteru úranhaakia kabliicha, inde ambe uaati eska no úkuarhiaka guerra”. Ka 1962 jimbo, acheeti ma enga kompaniarhu ma ánchikuarhijka enga Decca Record arhinhajka no uékaspti disku ma úkuntani grupuni ma enga Beatles arhinhajka, jimboka eratsesïreenga eskaksï no ióni japiringa ima grupuecha engaksï guitarra kústaenga.

Ístu jarhastiksï máru kʼuiripuecha engaksï sïkuamikua ambe úrajka paraksï míteni ambe úkuarhia sánderu orhepatini. Máteruechaksï astrologuechani kurhamarhiasïndi, ka oroskopuecha méntkuksï uérani jarhasïndi rebistecharhu ka periodikuecharhu. Máteruechaksï nirasïndi imeechani exeani engaksï uandajka eskaksï úsïnga míteni ambe enga úkuarhiaka sánderu orhepatini úraparini tarotiiri kartechani, númeruechani ka kʼuiripueri jájkiichani.

Ióntki, máru kʼuiripuechaksï kurhamarhiasïreendi saserdotiichani, ia sea tatakeechani o nanakechani eskaksï aianguapiringa ambe enga uandeenga imeecheeri diosï eska úkuarhipiringa sánderu orhepatini. Jamberi inde ambe úpti Kresu, Lidia anapu rei. Ante de nirani uarhipeni Siru jingoni enga Persia anapu reiipka, Kresu ambakiti regaluechani axakuaspti Delfosiiri (Grecia) saserdotini para míteni ambe úkuarhipirini guerrarhu. Saserdoti arhispti eska enga nipiringa Siru jingoni uarhipeni “kʼéri iretani ma kʼamajkupiringa”. Kresu seguru jarhaspti eska úpiringa Siruni andani, peru no ísï úkuarhispti, sánderu sési, imeeri reinunisï kʼamajkupti.

Ambe enga inde saserdoti uandapka no sáni marhuaspti, jimboka no arhiparini né enga andapiringa indeni guerrani, kʼamajkunhapirindi kʼéri ireta ma. Kresu iámu ambe tsïtaspti jimboka jakajkuspka ambe enga inde saserdoti uandapka. Ka iásï, ¿sési nikuasïni imeechani engaksï mámaru ambe úrajka paraksï míteni ambe úkuarhia sánderu orhepatini?