Lutyet ma gityeto ki lakalatwe gitamo ni lacer, dwe ki jami mukene ma i dan polo gudo kwo pa dano ma i wi lobo. Gitamo ni ka ma lacer ki dwe tye iye i kare ma kinywalo iye ngat moni gudo kite ki anyimme.

Kadi bed ni tyet ki lakalatwe ocakke wa con i lobo Babilon, dano pud gitiyo kwede matek adada i kare-ni. Dano mapol giye lok pa lutyet ki lakalatwe. Ento tika watwero geno lokgi? Pe. Kong dong wanenu pingo.

• Lakalatwe kacel ki jami mukene ma i dan polo pe gitye ki teko mo ma gudo dano, kit ma lutyet ki lakalatwe gitamo-ni.

• Pol kare byek pa lutyet-ti obedo mere jami ma twero timme i kwo pa dano mo keken.

• Byeka pa lutyet ki lakalatwe jenge i kom tam macon ma yam dano tye kwede, ni jami ma i dan polo ducu wirre lworo lobo. Ki lok ada, jami ma i dan polo ducu wirre kun lworo ceng aye.

• Ka ni lutyet mapatpat gubyek gin ma bitimme i kom kwo pa ngat acel, inongo ni byekgi pe rwatte.

• Lutyet ki lakalatwe gipoko dano i gurup 12 mapatpat, ma lubbe ki lacer ma ryeny matek i dwe ma kinywalogi iye. Gurup acel acel tye ki lee ma cung pire ma kilwongo ni lanyut me zodiac. Lanyut me zodiac acel acel tye ki nino dwene ma lubbe ki ka ma lobo tye iye i kare ma kinywalo ngat moni. Ento, kit macalo lobo wirre, dok kabedone bene lokke, man miyo nino dwe magi pe rwatte.

Lutyet ki lakalatwe giwaco ni lanyut me zodiac nyuto kit pa ngat moni. Ento, ki lok ada, jo ma kinywalogi i nino acel, kitgi pe rom, dok nino nywalle pa ngat moni pe gudo kite i yo mo keken. Me ka neno kit pa ngat moni kikome, lutyet ki lakalatwe gingolo kop woko con i wi dano ni kite bibedo ber nyo rac kun gijenge i kom jami ma kibyeko abyeka. Meno mono pe obedo cwiny me apokapoka?

Cakke wa i kare macon, dano gipenyo tam ki bot lutyet. Lutyet mogo onongo gingiyo jami ma i i lee nyo dano, dok giyenyo lanyut mo i kom kit ma gweno tongo kwede ki cam. Mukene onongo gityeto kun gitiyo ki majan nyo kawa. I kare-ni, gikwano cing dano, gitiyo ki gagi, ajaa, yec winyo, pyen lee nyo jami mukene me “neno” anyim pa ngat moni. Tyeto tyet tika obedo yo ma genne me ngeyo gin ma bitimme anyim? Pe tye kumeno. Kong dong wanyamu lok man.

Tam kong i kom rwatte pa lok pa lutyet. Jo ma gityeto gin ma tye anyim pol kare lokgi pe rwatte. Kadi guti ki yo me tyet acel, pud adwogine bedo patpat. Me labolle, ka ngat moni ocito bot lutyet aryo mapatpat ni gukwan i cinge, ngene kene ni adwogine myero obed marom. Ento pol kare adwogine pe rom.

Dano mukene gitye ki akalakala i kom jami tic pa lutyet, ki cwiny ma gitye kwede. I kabedo mukene, jo ma gitye ki akalakala i kom lutyet giwaco ni lutyet pe gitiyo ki jami ticgi, ento gineno timme pa dano aye. Me labolle, latyet ma ladiro penyo lapeny mogo ci winyo lagam pa dano meno dok neno kit ma en timme kwede, ci jami magi konye me ngeyo kwo pa dano meno. Lacen, latyet-ti dong wakke ni engeyo kwo pa ngat moni, kun nongo otiyo ki lagam ma ngat-ti omiyo labongo ngeyone. Pi tic ki bwola man, lutyet mogo dong gunongo cente madwong adada ki bot jo ma genogi.

Tyet ki lakalatwe nyo jami mukene nyuto ni anyimwa dong kimoko woko con. Ento meno tika tye ada? Baibul tittiwa ni watye ki twero me yero gin ma waye nyo gin ma wamito timo, dok man aye moko anyimwa.​—Yocwa 24:15.

Luwor Lubanga gitye ki tyen lok mukene me kwero tim me tyet ki lakalatwe nyo jami mukene​—Lubanga okwero tim mo keken me tyeto gin ma anyim. Baibul waco ni: “Pe ginong ngat mo i kinwu ma . . . latyet, nyo latyet ki ajaa, langi i dyel, latal, lakot piny, lakor tipo, min jok nyo lapeny dog tipo pa lato. Ka dano mo timo gin ma kit meno ci en bedo me kwer bot Rwot [Jehovah].” a​—Nwoyo Cik 18:10-12.