Astrologi, i ma cara laho mamboto parange ni sasahalak manang na laho masa di ngolu ni sasahalak marhite parpeak ni bintang, bulan, dohot planet. Didok pakar astrologi, boi do tarboto parange ni sasahalak dohot ngoluna di ari na naeng ro sian parpeak ni bintang.

Sian najolo, nunga adong astrologi di Babel, jala dipangke do i sahat tu saonari. Di taon 2012, dibahen ma survei di Amerika Serikat taringot tu astrologi. Lobi sian 30 porsen halak porsea molo astrologi “marhaitan tu sains”, jala 10 porsen nai mandok, “astrologi sarupa tu sains”. Hape ndang tutu i. Taida ma boasa songon i.

• Ndang tutu pandapot ni ahli bintang na mandok, margogo do planet dohot bintang manontuhon na laho masa tu jolma.

• Somalna, ndang apala tangkas ramalan i dipatorang. Jolma i sandiri do na patoho-tohohon ramalan i tu dirina.

• Adong na porsea, angka planet marputar mangkaliangi portibi on jala i ma na dipangke pakar astrologi. Hape angka planet marputar mangkaliangi mata ni ari do.

• Molo disungkun tu piga-piga pakar astrologi taringot na laho masa tu sasahalak, marasing-asing do alusna.

• Didok pakar astrologi, adong 12 zodiak manang ramalan bintang. Asing be do zodiak ni jolma mangihuthon tanggal lahirna. Dipatoho ma i tu parpeak ni bintang tingki tubu ibana. Hape saleleng marratus taon, ndang sai dos parpeak ni bintang.

Didok, parpeak ni bintang do na dipangke ahli bintang manontuhon parange ni sasahalak nang pe ndang marsitandaan dope nasida. Hape dung diparrohahon, marasing-asing do parange ni halak nang pe sarupa tanggal lahirna. Ndang adong nanggo saotik pangkorhon ni tanggal lahir tu parange ni sasahalak.

Sian najolo, godang do na mangido pangurupion sian peramal nasib. Marragam do cara dohot alat na dipangke laho meramal, umpamana maniti ari. Alai saonari, dipangke halak do kartu tarot, bola kristal, dadu, manang alat na asing laho “mangida” na masa tu sasahalak di ari na naeng ro. Boi do tahaporseai ramalan nasib? Ndang boi. Taida ma boasa songon i.

Marasing-asing do hatoranganna. Nang pe sarupa sungkun-sungkun ni angka halak tu peramal, alai ndang hea sarupa alusna. Jala nang pe sarupa carana, boi do imbar hasilna. Umpamana, molo disungkun sasahalak taringot ngoluna di ari na naeng ro tu dua peramal, ingkon sarupa do nian hatorangan na dilehon. Alai imbar do hatorangan na dipaboa. Hape, peramal i meramal marhite “manjaha” kartu tarot.

Godang do na so porsea tu cara manang na tinuju ni peramal nasib. Alana didok nasida, ndang adong hatorangan na didapot peramal sian kartu tarot manang bola kristal. Songon on do dibahen nasida: Disungkuni peramal i ma sasahalak huhut diparrohahon alus dohot carana mangkatai. Hape, alusna i nunga paboahon taringot dirina tu peramal i. Jadi, hatoranganna i do na dipangke peramal laho mangalusi ibana. Gabe dapotan hepeng ma peramal i.

Marhite astrologi dohot ramalan nasib, godang do na porsea nunga ditontuhon hian na laho masa di ngoluna. Tutu do i? Bibel mandok, ganup halak boi mamillit dia na laho dihaporseai dohot na laho ulahononna. Jala, na tapillit saonari boi do parohon laba manang parohon jea di ari na naeng ro.​—Josua 24:15.

Diboto naposo ni Debata, ndang lomo roha ni Debata tu astrologi dohot ramalan nasib. Bibel mandok, “Na so tupa adong jumpang di tongatongamu . . . halak pangarunding manang sijujur ari, manang sitabasi ulok manang parsibalik mata. Manang sibahen panutupi, manang partondung, manang na manungkun begu ni na mate. Ai marbiasbias situtu do roha ni Jahowa a mida saluhut halak, angka na mangulahon sisongon i, jala ala ni biasbias angka sisongon i pabalion ni Jahowa, Debatam ma angka bangso i maradophon ho.”​—5 Musa 18:10-12.