Astrologi ima fawawi ḇekyar faro mak, paik, ma planet snar sna fasfesepen kuker kankenem snonkaku ḇero supswan. Ḇefawinanem ro astrologi sya soḇe fafisu roi ḇero farsyos nayaswa nakren-nayar ḇe moḇ ḇese ido, snonkaku ḇeḇeaben ro fafisu anya nari kenem roḇa rari ḇyena kako nakso radirya.

Astrologi nasya kwar ro fafisu Babilon ḇepon iwara. Ḇape sepake kakerna isof ro rasine. Survei ro Amerika Serikat ro taun 2012 ikofen, ḇar ḇeḇekior ro snonkaku sya soḇe astrologi ima ”nkaku”, ma persen ri 10 sya soḇe bisa ”kokyar kaku na.” Ine nkaku ke? Aroḇa. Komam rosai ḇefnai ya.

• Planet ma mak sya sna samambraḇ ḇa fa sawyae snonkaku sya imnis raris ḇefawinanem mak sya sikofen na.

• Roi skinsor ima snonkaku sisma ro ras-ras kwar nairi, inja bisa nkur manseisirya monda.

• Karkor astrologi baboine, sifrur na imnis kakyar ḇepon iwara snar planet siyar supswan ine. Ḇape kaku ya, planet siyar ori ya.

• Rofyor ḇeḇekinsor risuru sor su fa sukinsor snonkaku oso ido, na rosai sukofen na neḇeseyae.

• Ro astrologi, soḇe snonkaku sya bisa sirwas si ḇe raryur zodiak ri 12 imnis kuker tanggal sḇeḇeaben ya. Ḇape, moḇ supswan ryoro farsyos iyaswa ya ikren ker taun utin ma utin kwar, inja rofyor oriya isrow ro moḇ ya na zodiak sḇuk ḇe snonkaku oso imnis ras ḇyeḇeaben ya wer ḇa kwar.

Snonkaku sya soḇe zodiak ine fyasnaḇair rariso snonkaku oso kenem ḇyedi. Ḇape komam ido, snonkaku riḇeso ḇeḇeaben ro tanggal oser sya kenem sena neḇesisye yae. Tanggal snonkaku oso ḇyeḇeaben ya nari nawyae kenem ro snonkaku ani ḇa. Snonkaku ḇefawinanem mak sya sikofen fafyai monda snonkaku oso kenem ḇyena rofyor smambir i ḇaime. Inja, ine nfasnaḇair semankara snonkaku sya.

Ro fafisu sinan siwara, snonkaku sya sor akurfasna kwar ro snonkaku ḇekinsor sya. Ḇekinsor ansine smam ro aiwan ma snonkaku sya snewar sena ḇaido rariso mankokor sya sos fas mor fa sbuki kinsor snonkaku sya. Ḇesesya skinsor kuker smam pola ro tei ram ma kofi mirmir. Baboine sḇuk kartu tarot, bola kristal, dadu, ma roi ḇesena fa ”sifawi” rosai na ḇeḇejadi kuker snonkaku oso ro ras ḇarpon iyama. Inja, kinsasor ḇemnis radine bisa kokyar na ke? Aroḇaḇeri. Mkorama komam rosai ḇefnai ya.

Rosai skinsor na neḇeseyae. Fakfuken ḇaido topik oso skinsor na nasmai kankarem ḇemnis yae ḇa snar nyan sḇuki kinsor na kako neḇeseyae. Nyan sḇuki kinsor na namnis rariryano, kankarem sismai na namnis ḇa kako. Imnis raris, kora ḇe snonkaku ḇekinsor risuru, ma snonkaku ansuya suḇuk kartu tarot ḇemnis fa sumam rariso kankenem koḇena ro ras ḇarpon iyama. Kankarem suḇena na namnis yae. Ḇape, fyorno ido rosai sukofenḇair na namnis yae ḇa.

Snonkaku ḇebor sya sikyar wer ḇa faro snonkaku ḇekinsor sya ma nyan sḇuki kinsor na. Sino sikofen snonkaku ḇekinsor sine smam ro kartu ḇaido bola kristal ḇa, ḇape sifawi na ro rosai sikofen na. Imnis raris, snonkaku ḇefawinanem ro kinsor nari ḇyuk fakfuken ḇe snonkaku ani ma myamepen rosai snonkaku ani kankarem ḇyena ma rosai ifrur na. Snonkaku ani ifawi ḇa bo ikofen kwar rosai monda ḇekuri. Ramnai snonkaku ḇekinsor ani ḇyuk kankarem ḇefrur fa imarisen kaku. Ma rofyor ikyar faro rosai ikofen na, nari ḇyuk pipi sibor kaku ḇe i.

Astrologi ma kinsasor nfasnaḇair snar rosai na ḇeḇejadi kuker ko ro ras ḇarpon iyama nama neḇefasos kwar ḇe ko oser-oser. Ine nkaku rarirya ke? Refo ikofen ḇe ko bisa kokinfir rosai kokyar na ḇaido komarisen kofrur na. Refoya kako ikofen rosai kokinfir na, nari nawyae kankenem koḇena ro ras ḇarpon iyama.​—Yosua 24:15.

Allah kawasa Ḇyesya sifawi rosai ḇefnai fa spampum astrologi ma kinsasor. Roi ḇefnai ya iso snar Allah pyampum roi nakam ḇefesepen kuker rur ḇemabak. Refoya ikofen, ”Rofandu mko nasya awer snonkaku . . . ḇeḇekinsor, ḇekif robor, ḇesewar aḇyair kinsor, ḇenanem ro fui, ḇefui snonkaku ḇese, ḇeyor anun ro ḇena mon sya ḇaido ḇeḇekinsor sya, ḇaido ḇefuken faro karwar sya. Mansei monda ḇefrur roi nane ido, Yahwe dayin i.” *—Ulangan 18:10-12.