Ramalen bintang eme ramalen si tek maka bintang, bulan, ras planet-planet lit pengaruhna man kegeluhen manusia i doni. Peramal bintang e ngataken maka posisi benda-benda langit sanga sekalak jelma lahir mpengaruhi sipat-sipatna bage pe masa depanna.

Amin gia asal-usul ramalen bintang e nggo ndekah kel eme arah Babilon si mbarenda, tapi tetap denga ipake seh asa gundari. Sanga isungkuni kalak i Amerika Serikat bas tahun 2012, sada arah telu kalak ngataken ramalen bintang e “lit hubungenna ku ilmu pengetahuan,” janah 10 persen si ngataken “enda memang ilmu pengetahuan.” Tuhu kin bage? Lang. Enda alasenna.

• Labo lit pengaruh planet-planet bage pe bintang-bintang man manusia bagi si ikataken peramal bintang.

• Ramalenna si umum-umum saja ngenca emaka banci ipakena ku kerina kalak.

• Peramal bintang ngeramal alu pemeteh si mbarenda si ngataken maka planet-planet erputar ngkelilingi doni. Padahal situhuna planet-planet e erputar ngkelilingi matawari.

• Amin gia sada kalak si iramal, tapi beda-beda hasil ramalen piga-piga peramal.

• Iban peramal e 12 macam ramalen bintang man manusia menurut tanggal lahir, gelarna bintang zodiak. Perban nggo rabad-abad dekahna, posisi doni lanai bagi si mbarenda, emaka tanggal-tanggal si nggo iban bas zodiak lanai cocok ras posisi bintang-bintang ndai.

Ikataken kalak e lambang-lambang zodiak banci nggambarken sipat-sipat sekalak jelma. Padahal kalak si seri pe tanggal lahirna, labo seri sipat-sipatna. Tanggal lahir labo nentuken sipat sekalak jelma. Peramal bintang e ngeramal sipat-sipat bage pe perbahanen kalak arah pendapatna saja, labo iperdiatekenna uga kalak e situhuna. Cocok nge akapndu bage?

Mbarenda nari pe, nggo melala kalak nungkun man peramal. Piga-piga kalak ndarami ramalen arah bagin dalam binatang ras manusia ntah pe arah cara manuk jantan man. Si debanna erban ramalen arah bentuk daun teh ntah pe arah batang kopi. Gundari peramal nggunaken kartu ramal, bola kristal, dadu, ras si debanna guna “mbaca” masa depan jelma. Banci nge siteki cara kalak e ngenen masa depan? Lang. Mari sibahas alasenna.

Perdiateken kerna ramalen kalak e. Perban la seri carana ngeramal rusuren hasilna beda. Amin gia seri pe carana, hasilna rusuren beda. Misalna, adi lit sekalak jelma si nungkun kerna masa depanna man dua peramal alu “mbaca” kartu si seri, arusna min seri jawapenna. Tapi rusuren lang.

Cara ntah pe tujun peramal e mereken ramalen icurigai. Lit si ngataken maka kartu ramal ntah pe bola kristal perlengkapen saja nge ngenca janah peramal e mbaca tanggapen kalak, labo perlengkapen ndai. Contohna, beluh peramal e nungkun janah iperdiatekenna kata-kata ras gerak-gerik pasienna, e me si jadi petunjuk man bana. Dungna peramal e ipuji perban tehna kai si nggo terjadi man pasienna e janah uga keadanna, padahal la isadari pasien e maka ia sendiri si nggo ngatakenca. Perban nggo tek pasien e bana piga-piga peramal ndatken melala sen arah pasienna.

Ramalen bintang bage pe ramalen si debanna ncidahken maka masa depanta nggo itentuken. Tapi tuhu kin bage? Ikataken bas Pustaka lit kebebasenta erban pilihen kerna kai ateta siteki ntah pe kai ateta silakoken janah pilihenta mpengaruhi masa depanta.​—Josua 24:15.

Alasen si deban si erban umat Dibata nulak ramalen bintang bage pe ramalen si debanna eme perban ciga ate Dibata kerina si lit hubungenna ku ilmu gaib. Nina Pustaka, “Ola . . . ertendung, ngoge tanda-tanda, ntah mpergunaken mangmang, ntah make guna-guna, janah ola pediat ia nungkun man begu kalak si enggo mate. Nembeh ate [Jahwe] a Dibatandu man kalak si ngelakoken perbahanen si mbau e.”​—Ulangen 18:10-12.