Astrologie a ne avale mvi’i é tii a mbunane ya na ateté, ngon, a beplanet bi ne tyendé ényiñ abui bôte si va. Befase bitétéa ya yôp bite ba kate na, été ateté e tele yôp été éyoñe môt a bialé, é ne bo na be yem avale môt ate a ye bo melu ma zu.

Akusa bo na astologie a nga taté e nnôma Babylone, abui bôt e ngenan é belane nye. Be nga sili bôte minsili Etats-Unis mbu 2012, e bôte bela, môte wua a mbe a simesane na astrologie a ne “ngum aval ñyemane mam,” a e bôte ntet, bôt awôm be mbe be yemete na a ne “nya ñyemane mam.” Ye nalé a ne été? Teké’é. Bi tame yen amu jé.

• Beplanet a ateté bi nji bi ngule ya volô môta binam avale b’astrologue ba jô na, bia bo de.

• Biyoñe biziñ, mame ba jô me wô’ô bo avale mam é ne kui be bôte bese.

• Den, metañ b’astrologue ba bo me tii a nnôme mbunan wo jô na, beplanet ba tiñelane mbôma’ane a si. Ve nya ajôô a ne na, beplanet ba tiñelane mboma’ane a jôp.

• Mame b’astrologue ba kuli asu môte wua me ne teke tôéban.

• A lat a môse bôt ba bialé, astrologie a ta’a be vôma wua ya bevôme 12 ba loene fulasi na signes du zodiaque. Mbôle si ja tyendé bité ñyeme yôp aval ane mintete mimbu mia lôt, melu ba te ve asu signes du zodiaque me nji beta tôban a éyoñe jôp da lôt e zañ ébañ ateté ja te bo na be ve me éyôlé.

Ba jô na mendeme ya vôme beplanet ba tyiñelan (signes du zodiaque) mme ma kat avale mefulu môt a ye bi. Nya ajôô a ne na, bôte ba te bialé môse wua be ne teke bi avale mefulu da; môs abialé môt ô nji ve’ele kate jôm éziñ mfa’a ya mefulu mé. Be li’i yene bôt ane be né, b’astrologue ba viane tyi’i mefulu a mimboone mi môt a zene ya abui befe’e. Ye nalé a nji bo ékobe nga?

Ataté melu mvus, bôte ba ke ôsu a yene bebo mvi’i. Bemvi’i béziñ be wô’ô jeñ atinane ya mam a zene ya bibu’a ya nyule betit a bi bi môta binam, nge ki aval kup ja tomane fes. Bevo’o ba ve’e befe’e be tii a éyeka’a y’ôkaé thé, nge ke mefes me kofi. Den, ba belane bekat, ébuma éyet (boule de crystal), dé, a mam mefe asu na be “lañ” mam ma ye kui ényiñe môt. Ye mvi’i ya bekat é ne zene ja yian asu na, bi yeme mam ma ye boban melu ma zu? Momo, a nji bo zene ja yian. Bi tame fas ajô ete.

Bi tame kobô ajô ya nlata’ane. Nya ajôô a ne na, mvi’i ya abui mimvivi’i mia bo é wô’ô selane nyina a nyu fok. Ja’a éyoñe ba bo avale fatane mvi’i da, biyalane ya befe’e bete bi wô’ô selan. Éve’an é ne na, nge môt a sili bebo mvi’i bebaé ba belane “nlañane” bekat nsili wua a lat a melu ma zu, da yiane na bese be ve éyalane jia. Ve é wô’ô bo teke kui nalé.

Befatane belañe kate ba belane be a minsôñane miap bi wô’ô wulu a medu’an. Bôte ba sôô mam ba jô na, bekat a ébuma éyet bi ne zezé biôm a na, belañe bekat ba dañe fombô môt a mam a bo a dañe zezé biôme bite. Éve’an é ne na, mfefe’e môt wo belane mvi’i bekat wo ye sili aval nsili ese, a jeñ aval a ne yemelane mam méziñ a lat a môt a te zu yene nye. Éyoñ éte nje a zu liti na a yeme mame ma ndeñele môt ate, a to ki na, môt ate émien nnye a te bo nye na a yeme me. Éyoñe be boya na bôte be buni be, belañe bekat béziñ be nga kui na, be nyoñe bôt abui moné.

Mboon astrologie a mvi’i ya bekat wo kômbô liti na, ényiñe môt ase é ne ntilan. Ve, ye nalé a ne été? Bible a kate bia na, bi ne fili ya top mame bia buni nge mame bia kômbô bo, a na mintyi’ane miangan mi ne so bia mvom, nge ke bidim melu ma zu.​—Josué 24:15.

Bebo bisaé be Zambe be bili beamu befe ya sa’ale astrologie a mvi’i ya bekat: Zambe a vini aval mvi’i ese. Bia koone mejô ma Bible été: “B’aye bo te yene môt be wo . . . nyô a bo a bo’o mame ya bemvi’i, a nyô a bi’i mam zene ya ntyi’ane betit, nge mbibiañ, nge ngengañ, nge mbi minkuk, nge nyô a bo a sili’i bekôn, nge mbo mesimba, nge ngengam. Amu nyô ase a bo mam mete a ne mbia jôm be Jehova.” *​—Deutéronome 18:10-12.