Peepl weh stodi di staarz fi pridik di fyoocha klaym seh dat di moon, di staarz, ahn di planet dehn ga som kaina powa oava peepl laif. Dehn klaym seh dat di way dehndeh tingz pozishan eena di skai wen wahn persn baan wahn disaid weh kaina persn ih wahn bee ahn weh kaina fyoocha ih wahn gat.

Eevn doa dis way fi pridik di fyoocha goh way bak tu di oal-taim siti a Babilan, ih stil papyula tudeh. Wahn servay weh dehn du da di United States eena 2012 seh dat 33 persent a di peepl weh mi tek di servay mi bileev dat dis kaina way fi pridik di fyoocha “ga wahn lee bit fi du wid saiyens,” ahn 10 persent seh dat ih “ga wahn lat fi du wid saiyens.” Yu tink dat da chroo? No. Mek wi luk pahn sohn reezn wai nat.

• Di planet ahn di staar dehn noh giv aaf no powa weh ku kanchroal peepl laif di way how peepl weh stodi di staarz seh.

• Yoozhwali weh dehn pridik bowt sohnbadi ku akchwali werk fi enibadi.

• Di peepl weh stodi di staarz bays dehn pridikshan pahn weh peepl yoostu bileev bak eena di day, dat di planet dehn goh rong di ert. Bot di planet dehn akchwali goh rong di son.

• Yu noh wahn fain no too persn weh stodi di staarz mek di saym pridikshan bowt sohnbadi.

• Dis way fi pridik di fyoocha put peepl anda wan a di 12 zoadyak sain bays pahn di day dehn baan. Bot laik how di pozishan a di ert chaynj eena spays oava di paas honjridz a yaaz, di dayt dehn weh goh lang wid eech zoadyak sain noh mach op wid di taim wen di son paas chroo di difrent groop a staarz weh di 12 zoadyak sain geh dehn naym fram.

Peepl bileev dat di zoadyak sain dehn help peepl noa weh kaina persn dehn wahn bee. Bot wee noa dat peepl weh ga di saym bertday noh ga di saym persnaliti. In fak, di dayt wen wahn persn baan noh tel wi notn bowt weh kaina persn hihn er shee wahn bee. Peepl weh stodi di staarz laik dis feel laik dehn don noa how wahn persn wahn bihayv er weh kaina persn ih wahn bee, soh dehn noh luk pahn peepl eena wahn fyaa way. Dis onli prejudis, noh chroo?

Fahn way bak eena di paas, peepl goh tu dehn peepl weh klaym fi ga di powa fi noa di fyoocha. Som a dehn peepl weh du dehndeh kaina ting wuda luk fi wahn sain eena di gots a wahn ded animal er hyooman, er eena di way wahn roosta pik grayn. Adaz wuda mek pridikshan bays pahn di patan weh tee leef er kaafi grongz lef eena wahn kop. Nowadayz dehn yooz kyaad, kristal baal, dais, an ada tingz fi fain owt sohnbadi fyoocha. Yu tink yu ku chros dehnya wayz how peepl tel di fyoocha? No. Mek wi diskos wai nat.

Yoozhwali di pridikshanz noh mach op. If dehn yooz too difrent wayz fi pridik di fyoocha, dehn yoozhwali geh difrent rizolts. An eevn wen dehn yooz di saym way fi pridik di fyoocha, dehn wahn praabli stil geh difrent rizolts. Fi egzampl, if sohnbadi aks too peepl weh klaym dehn ku pridik di fyoocha fi yooz di saym kyaad fi ansa wahn kweschan bowt di fyoocha, di reedin weh di too a dehn geh fahn di kyaad shuda bee di saym, noh chroo? Bot lata taim dat noh hapm.

Soh lata peepl noh chros dehn wan weh klaym seh dehn ku tel di fyoocha. Dehn feel dat di tingz weh dehndeh peepl yooz, laik di kyaad ahn kristal baal, da jos fi shoa bikaaz dehn wach how di persn ak insteda pridik di fyoocha bays pahn di kyaad ahn baal. Fi egzampl, sohnbadi weh ga lata ekspeeryens di du dis wuda aks sohn baysik kweschan, ahn den ih wuda pay atenshan tu weh di kostoma seh ahn how ih ak. Dis wuda help ahn fi noa moa bowt di kostoma. Den, di persn weh klaym fi si di fyoocha wahn mek di persn feel laik hihn mi noa aal dehn tingz bowt ahn, bot akchwali da di kostoma sayhn wan giv ahn di ansa widowt ih eevn kanshos. Now dat di kostoma geh fi chros ahn, di persn ku en op di geh lata moni fan ahn.

Peepl weh goh tu dehn wan weh stodi di staarz fi noa di fyoocha, er tu dehn wan weh klaym dehn ku si di fyoocha eena ada wayz du dat bikaaz dehn bileev dat dehn fyoocha don disaid fi dehn. Bot yu tink dat da chroo? Di Baibl tel wi dat wee ga di freedom fi disaid weh wi waahn bileev ahn du, ahn dat di disizhanz weh wi mek da weh afek wi fyoocha.—Joshua 24:15.

Dehn ga wahn neks reezn wai enibadi weh waahn mek Gaad hapi shuda rijek dehnya wayz fi noa di fyoocha. Di Baibl teech wi dat Jehoava hayt dehnya ting. Dis da weh di Baibl seh: “Nobadi fi deh monks unu weh . . . yooz divinayshan, enibadi weh praktis majik, enibadi weh luk fi bad sain, wahn oabya-man er oabya-uman, enibadi weh put bad ting pahn ada peepl, enibadi weh goh luk fi di oabya-man er oabya-uman, er sombadi weh tel di fyoocha, er enibadi weh kantak di ded. Kaaz Jehoava a hayt enibadi weh du dehnya ting.”—Deuteronomy 18:10-12.