Pwee wóón fúú ina eú sókkun angangen pwee lón ewe lúkú pwe ekkewe fúú, maram me ekkewe planet ra fókkun emmweni manawen aramas wóón fénúfan. Ekkewe soupwee wóón fúú ra erá pwe sossoren ekkewe mettóchun fán láng atun ránin án emén uputiw, a tongeni efisi án emén epwe napanapeni och sókkun napanap me met epwe fis ngeni lón mwachkkan.

Inaamwo ika ewe angangen pwee wóón fúú a pop seni eú fénúen lóóm lóóm itan Papilon, nge tori iei a mmen iteféúló. Me ren eú repot lón Merika minen lón ewe 2012, pwe eú na aúlúngátin aramas ra meefi pwe angangen pwee wóón fúú a mwaren lóngólóng wóón pekin science, nge kis seni ena chóchóón aramas ra erá pwe a fókkun lóngólóng wóón science. Nge mei pwúng ena? Aapw. Ikkeei ekkewe popun:

• Ese wor manamanen ekkewe planet me fúú le emmweni manawen aramas usun met ekkewe soupwee wóón fúú ra erá.

• Fán chómmóng rese kon tichik ekkewe oesini pwe ra tongeni weneiti aramas ese lifilifil.

• Lón ei fansoun pwee wóón fúú me horoscope ra lóngólóng wóón án aramas sile a minen lóóm pwe ekkewe planet ra pwellifeili ach ei fénúfan. Nge ren enletin ekkewe planet ra pwellifeili ewe akkar.

• Ese kan tipeeúfengen án emén me emén soupwee wóón fúú pweei emén.

• Káéén pwee wóón fúú a kan wor 12 sókkun kúmiin zodiac sign mi iteit seni ekkewe pwiin fúú, iwe aramas ra nóm fán eú me eú ekkena zodiac sign nge epwe lóngólóng wóón ránin uputiwer. Nge fetál fetál lón ekkewe fitengeréú ier, a kan siwil sossoren ewe fénúfan me lón space, iwe pokiten ekkena siwil, ránin me maraman mi riri ngeni ekkewe zodiac sign rese chúen mase ngeni atun ewe akkar a feffetál ngeni ekkewe pwiin fúú ra iteit seniir.

Ra erá pwe ekkewe zodiac sign ra tongeni pwári epwe ifa usun napanapen emén. Nge ren enletin, ese léllé napanapen chókkewe mi upuppék lón chék eú rán. Ránin uputiwen emén esap tongeni esissillatá napanapan. Ekkewe soupwee ra apwúngaló ika met emén epwe sókkuni nge epwe lóngólóng wóón an we zodiac sign, nge itá úrúrún sipwe chék nengeni enletin napanapen emén me emén aramas. Esap pwe ina eú sókkun angangen eimumu?

Seni lóóm lóóm, aramas ra kan kútta álillis seni ekkewe souoesini are souesissil. Ekkóch me leir ra tongeni pweei pwóróusen mwachkkan ren ar pwee wóón ekkóch mettóch, áwewe chék taren aramas are man, are napanapen án emén átemwánin chukó feneii anan kewe féún pwikil. Ekkóch ra pwee wóón chéén ekkewe tea are kiten kofi. Lón ei fansoun, aramas ra kan pwee wóón dice, crystal ball, tarot card, me pwal ekkóch mettóch pwe repwe tongeni esissil wóón fansoun mwach. Iwe, itá sia tongeni lúkúlúk wóón angangen esissil ren ach sipwe silei met epwe fis lón mwachkkan? Aapw, sise tongeni. Sipwe nengeni ekkóch popun.

Ekiek usun énúkúnúkún. Lape ngeni a ú fengen minne ekkewe souoesini ra eáni oesini. Inaamwo ika ra chék léllé ekkewe mettóch ra néúnéú le pwee, nge met ra apasa a sókkofesen. Áwewe chék, ika emén a chuuri rúúemén souoesini ren an mochen silei pwóróusen mwachkkan, nge iir me rúúemén ra pweei wóón pelei ena chék eú mettóch, iwe itá úrúrún epwe chék léllé met repwe apasa. Nge fán chómmóng a sókkofesen.

Sise kon lien tongeni lúkúlúk wóón án ekkewe souoesini angang are enletin popun ra féri ena angang. Ekkewe souetittin usun angangen pwee ra apasa pwe ekkewe pelei are crystal ball ra néúnéú, iir pisek chék. Saminne ekkewe soupwee me souoesini ra wesewesen néúnéú ekkena pisek le pwee, nge ren enletin ra kan nengeni ewe emén ren napanapan me met a féri. Áwewe chék, emén soupwee mi angéch epwe eisini eménna fitu kapas eis, me mwirin epwe nengenifichi met epwe apasa, mwékútúkútún me wówóón epwe tongeni pwári pwóróusen eménna. Mwirin ewe soupwee epwe erá pwe a silei pwóróusan ren pwisin manamanen an pwee, nge ren enletin pwisin ena aramas a pwári. Iwe, lupwen ewe emén a fókkun lúkú ekkewe soupwee, iwe ekkóch soupwee ra fen angei seni aramas watteen moni.

Pwee wóón fúú me angangen esissil, itá kan ina met epwe fis ngenikich lón mwachkkan nge a fen kkótóló. Nge mei pwúng ena? Ewe Paipel a apasa pwe sia tongeni filatá met sia mochen lúkú are féri. Iwe, minne sia filatá epwe kkúú minne epwe fis ngenikich lón mwachkkan.​—Josua 24:15.

Mi pwal wor eú popun chón fel ngeni Kot repwe ttii seniir pwee wóón fúú me angangen esissil, pokiten Kot a oputa meinisin sókkun pwee. Ewe Paipel a apasa: “Esap wor eman me leimi epwe. . . eman soupwe, are eman souasisil, are eman souwo, are eman sourong, are eman soupöüt, are eman souamwöngün, are eman souawarawar, are eman souasomä. Pun chokewe mi föri ekei sokun föför ra anioput me ren ewe Samol mi Lapalap.”​—Tuteronomi 18:10-12.