Astrolozi i ler dimoun i etidye liniver pour predir lavenir. Sa bann dimoun ki ganny apele bann astrolog i krwar ki bann zetwal, lalin ek plannet i kapab annan en lenfliyans lo lavi bann imen lo later. Zot dir ki landrwa kot bann zetwal i ete ler en dimoun i ne i annan en lenfliyans lo son personnalite ek lavenir.

Depi letan Babilonn, i ti annan bann astrolog ki ti etidye liniver pour predir lavenir e sa pratik i ankor popiler dan nou letan. Dapre en resers ki ti fer an 2012 Leta-z-ini, en tyer bann dimoun ki ti partisip dan sa resers, ti krwar ki astrolozi i annan “pou fer avek lasyans” e 10 poursan ti dir ki i “vreman en keksoz syantifik.” Eski sa i vre? La serten rezon ki montre akoz sa pa vre.

• Bann plannet ek zetwal napa okenn lafors ki kapab annan en lenfliyans lo imen parey ki bann astrolog i dir.

• Souvandfwa, sa ki zot predir i kapab aplik pour nenport dimoun.

• Ozordi bann astrolog i fer zot kalkilasyon dapre sa vye krwayans ki bann plannet i fer letour later. An realite, bann plannet ki fer letour soley.

• Diferan astrolog pa predir menm keksoz pour menm dimoun.

• I annan 12 senbol dan oroskop e bann astrolog i met bann dimoun anba diferan senbol dapre zot dat nesans. Vi ki fason later i kabannen i sanze anmezir i fer letour soley, bann dat ki ti asosye avek bann senbol dan oroskop nepli koresponn avek sa group zetwal ki fer zot ganny zot non.

Dapre bann astrolog, oroskop i sipoze ede pour konn personnalite en dimoun. Me an realite, dimoun ki’n ne menm dat napa menm personnalite. Dan plas vwar en dimoun parey i ete, bann astrolog i ziz zot dapre zot oroskop. Ler zot fer sa, eski pa zot pe ziz en dimoun san ki zot vreman konn li?

Depi byen lontan, dimoun in rod pwennvi bann deviner. Serten deviner ti servi bann lorgann zannimo ek imen oubyen fason ki en kok i beke pour zot devinen. Lezot ti get dan lanmar dite oubyen kafe. Ozordi, bann deviner i servi kart, boul kristal, dice ek lezot keksoz pour “get” lavenir en dimoun. Eski bann deviner i vreman kapab predir lavenir en dimoun? Definitivman non. Annou vwar akoz.

Sa ki zot dir i pa toultan parey. Metod ki bann deviner i servi i souvan kontredir kanmarad. Menm si menm metod i ganny servi, i annan en diferans dan sa ki sak deviner i dir. Par egzanp, si en dimoun i demann de diferan deviner menm kestyon lo lavenir baze lo menm kart ki tou le de pe “gete,” i ekspekte ki larepons i parey me souvan i pa leka.

Bokou dimoun i dout motivasyon ek metod ki bann deviner i servi. Serten i dir ki bann kart ek boul kristal i zis bann lobze ki bann deviner i servi pour anbet dimoun. Olye servi sa bann lobze, bann deviner i plito get reaksyon en dimoun. Par egzanp, en deviner ki konn byen fer son louvraz pou demann bann kestyon e an menm tan i obzerv e ekout byen pour li anmas otan lenformasyon. San ki sa dimoun i realize, i’n fini dir sa deviner tou son problenm. Vi ki sa dimoun in fini fer li konfyans, serten deviner in reisi ganny en ta larzan dan sa kalite fason malonnet.

Si nou rod konsey avek bann astrolog ek bann deviner lo nou lavi, i vedir ki nou lavenir in fini ganny deside davans. Me eski sa i vre? Labib i dir ki nou annan sa abilite pour swazir sa ki nou pou krwar oubyen fer e ki nou swa i annan en lefe lo nou lavenir.​—Zozye 24:15.

Bann adorater Bondye pa devret rod konsey avek bann astrolog ek bann deviner akoz Bondye pa kontan sa bann pratik. La sa ki Labib i dir: “Personn parmi zot pa devre . . . ni fer divinasyon, ni predir lavenir, ni pratik mazik, ni fer sorsye, oubyen zet move sor, konsilte move lespri, oubyen medyonm, oubyen konsilte dimoun mor. Annefe, [Zeova] a pa kontan sa enn ki fer sa bann keksoz.”​—Deterononm 18:10-12.