Naashin na atüjaakana saaʼu sukuwaʼipa jolotsü, sünainpünaasü nakuwaʼipa na wayuukana chi Kashikai, tü shüliwaikalüirua otta tü planeetakalüirua. Naashin nayakana, jemeipa wanee joʼuu atüjaana aaʼu tü nukuwaʼipainjatkat jee tü alatajatkat nümüin sükajee sukuwaʼipa tü jolotsükalüirua.

Mayaapejeʼe chajatüin akumajaain tü ooʼulakiraakat süka jolotsü chaa Babilonia, ayatayülia aaʼinnüin shia maaʼulu. Soʼu juyaka 2012 chaa Estados Unidos, asakinnüshii wainma wayuu sünain jamüin nanüiki süchiki tü astrologiakat. Shiasaʼa naʼakajee apünüinshii wayuu asakinnaka, waneeshia neʼe chi anoujakai sünain müin aka saaʼin wanee ciencia tü astrologiakat. Otta naʼakajee polooshii wayuu, waneeshia neʼe chi anoujakai sünain shiain wanee ciencia. Nnojotpejeʼe shiimain tia. Wekirajaa sünain tia.

• Tü jolotsükalüirua otta tü planeetakalüirua nnojotsü sünainpünaain shia sukuwaʼipa wayuu maʼaka naküjain shia na atüjaakana saaʼu sukuwaʼipa jolotsü.

• Sutuma sünainpünaain wayuu maʼleekalia tü namakat na ooʼulaküliikana, eesü süpüla shikeraajüin sünain wayuu eekai eein.

• Tü nayaawatakalü akajee maaʼulu na atüjaakana saaʼu sukuwaʼipa jolotsü shia tü sunoujapuʼukalü anain wayuu sümaiwa paala. Sunoujapuʼu anain wayuu leeyatüin tü wane planeetakalüirua süʼütpünaa tü Mmakat. Leeyatapejeʼe tü planeetakalüirua nüʼütpünaa chi Kaʼikai.

• Naatawaisü tü namakat na aʼyataakana sünain astrología süchiki tü alatajatkat nümüin wanee wayuu.

• Na atüjaakana saaʼu sukuwaʼipa jolotsü, nakatalüin na wayuukana suluʼu 12 neʼipapaʼa (signos del Zodiaco) otta oʼunusü tia süchiirua tü kaʼi jemeikalü oʼu wanee wayuu. Akatsaʼa nnojoluitpain tü Mmakat eepuʼule shia sümaiwa, müsüjeseʼe nnojoluitpain pansaain tü sükaliakat signos del Zodiaco sümaa tü shüliwai kanülialuʼukat shia paala wanaa sümaa sülatüin nuwarala chi kaʼikai pasanainpünaa sünain.

Sunouja anainrü wayuu suʼunuin sukuwaʼipa wayuu süchiirua signos del Zodiaco. Nnojotpejeʼe shiimain tia, nnojotsü wanaawain sukuwaʼipa wayuu sutuma wanaawain tü kaʼi jemeikalü oʼu naya. Nnojotsü atüjaanüin aaʼu tü nukuwaʼipainjatkat wanee wayuu sutuma tü kaʼi jemeikalü oʼu nia. Shiapejeʼe jülüjain tia naaʼin na aʼyataakana sünain astrología, jülüjasü neʼe naaʼin tia sümaa nnojoluin neʼrajüin wayuu.

Kakaliairü maʼin wayuu sünain oʼunaa eemüin na ooʼulaküliikana. Eepuʼushii na ooʼulakakana süka shiyüülain, süchüʼü otta süpana wayuu jee müsia mürüt. Eeshii na jülüjapuʼukana aaʼin jamüin nüchotia chi kaliinakai tü maikikat otta eekai nooʼulaküin süka tü süsekat kepein. Waneirua kasa ooʼulakünaka akajee maaʼulu shia süka waraaja, maraaja koʼoyoosü otta dado. ¿Eesüche süpüla watüjain saaʼu kaseerüin alatüin wamüin mapeena sükajee tü ooʼulakiraakat? Nnojorüleejaʼa. Wekirajaa sünain tia.

Nnojotsü wanaawain tü naküjakat na ooʼulaküliikana süchiki tü alatajatkat mapeena. Jaʼitasü wanaawain tü nooʼulakakalü akajee. Jamüshijaʼa nüsakirüle wanee wayuu piamashii ooʼulakülii süchiki tü alatajatkat nümüin mapeena, nnojotsü wanaawain tü namakat nümüin jaʼitairü shiain nuuʼulaküin akajee tü waraaja nuuʼulakakalü akajee chi wane. Nnojotsü pansaain tü namakat.

Eeshii na nnojoliikana anoujain sünain tü namakat na ooʼulaküliikana. Naashin waneinnua wayuu, shia neʼe naküjaka na ooʼulaküliikana tü nayaawatakalü aaʼu sünainjee sukuwaʼipa wayuu. Jee kamaʼanayaashii neʼe waraaja otta maraaja koʼoyoosü shiiʼiree sunoujünüin tü namakat. Eeshii waneinnua ooʼulakülii asakiraka wayuu süchiki wainma kasa otta jülüjasü naaʼin tü namakat jee tü naainjakat na wayuukana nasoutapa neʼipajee. Naküjayaaka namüin na wayuukana tü alatajatkat namüin mapeena, shiakajasaʼa neʼe neiteʼerüin süchikuaʼa tü namakat paala na wayuukana namüin. Nemeejüin wayuu sükajee tia. Nanoujapa na wayuukana nanüiki na ooʼulaküliikana, wainma maʼin nneerü naapaka namüin.

Naashin na atüjaakana saaʼu sukuwaʼipa jolotsü otta na ooʼulaküliikana, kettaaitpa sukuwaʼipa tü alatajatkat sümüin wayuu süpüshuaʼa. ¿Shiimainche tia namakat? Süküjain tü Wiwüliakat eein süpüla waneeküin kasain wanoujainjatüin anain otta tü waaʼinrajatkat. Jee müsia tü kasa waneekakat maaʼulu shieerü oʼuniraka wakuwaʼipa (Josué 24:15).

Na wayuu aʼwaajeekana Maleiwa, nayoutuinjatü tü naaʼinrakat na ooʼulaküliikana, süka jamüin, nülerajüin Maleiwa süpüshuaʼa tü kasa sünainpünaakat ooʼulakiraa. Müsü tü Wiwüliakat süchiki tia: «Nnojoishi eeinjachin wanee wayuu jaʼaka [...] eekai nuuʼulakülin, eekai naainjülin kasa pülasü, eekai nunoujain sünain tü kasa ‹pülasü tia› sümakat wayuu, eekai niiyajülin wayuu, eekai niiʼirajirüin ouutsü jee eekai kayaawasein saaʼu tü alatajatkat otta eekai yootuin namaa na outushiikana [sükajee süseyuu wanee ouutsü]. Chi wayuu eekai naaʼinrüin tia, alerajünüshi nutuma Jeʼwaa» a (Deuteronomio 18:10-12).