Pe astrolohía ningo heʼi umi estrélla, pe jasy ha umi planéta ikatuha ohechauka mbaʼépa oikóta peteĩ persónagui ko yvy ape ári. Umi astrólogo heʼi ikatuha jaikuaa mbaʼéichatapa peteĩ persóna, ha mbaʼépa ojehúta chupe asegún moõpa oĩ kuri koʼã mbaʼe pe yvágape upe persóna onasérõ guare.

Pe astrolohía ningo oñepyrũ vaʼekue Babilóniape, ha upéva ymaiterei guaréma, upéicharõ jepe ojepuru gueteri koʼag̃aite peve. Peteĩ enkuésta ojejapo vaʼekue Estados Unídospe ohechauka oĩha 33%rupi opensáva pe astrolohía ojoguaha pe siénsiape ha 10% katu heʼi voi ouha pe siénsiagui. ¿Añete piko upéva? Nahániri, jahechamína mbaʼérepa.

• Umi planéta ha umi estrélla ningo ndorekói mbaʼeve ikatúva okambia ñande rekove heʼiháicha umi astrólogo.

• Pyʼỹinte umi mbaʼe heʼíva hikuái ikatúnte avei oñekumpli oimeraẽvare.

• Yma oñepensa vaʼekue umi planéta ojereha ko yvýre, ha umi kálkulo ojapóva umi astrólogo oñemopyenda gueteri koʼã mbaʼépe. Péro añetehápe umi planéta ojere hína pe kuarahýre.

• Diferénte astrólogo heʼíramo jepe mbaʼépa ikatu oiko peteĩ persónare, umi mbaʼe heʼíva hikuái ojoavy katuete ojuehegui.

• Pe astrolohía odividi la héntepe 12 grúpope, ha upearã ojepuru umi signo del Zodiaco ojekalkuláva asegún arakaʼépa onase peteĩ persóna. Péro ohasávo pe tiémpo ningo ko yvy okuʼe ohóvo, ha umi estrélla ojepuru vaʼekue oñembohéra hag̃ua koʼã signo koʼág̃a noĩvéima oĩ haguépe upérõ.

Ojeʼe ningo umi signo del Zodiaco ohechaukaha mbaʼéichatapa peteĩ persóna, péro añetehápe mokõi persóna onaséva la mísma fécha jepe idiferentete ojuehegui. Pe fécha onase hague peteĩ persóna ni mbaʼevéicharõ ndaikatúi ohechauka mbaʼeichaguápa haʼe. Umi astrólogo ohecha rangue mbaʼeichaguápa añetehápe peteĩ persóna, ohusgáma chupekuéra oipurúvo umi kálkulonte. Añetehápe upéicha ojapóvo iñinhústo hína hikuái hapichándi.

Ymaiterei guive umi hénte oho umi adivíno rendápe. Oĩ opensáva oimeraẽ hendápe ikatuha jahecha mbaʼépa oikóta amo gotyove, por ehémplo umi animál ha hénte ryekuépe jepe. Ótro katu opredesi mbaʼépa oikóta amo gotyove oipurúvo umi te rogue térã kafe a, ha avei ohechávo mbaʼéichapa peteĩ gállo oñemoĩ hoʼu hag̃ua hembiʼu. Koʼág̃arupi katu ojepuru pe tarót, vóla de kristál, dádo ha umícha “ojelee” hag̃ua mbaʼépa ñaneraʼarõ. Péro, ¿ikatúpa jaguerovia siertoha la heʼíva umi adivíno? Nahániri, jahechamína mbaʼérepa.

Pyʼỹinte ojoavy ojuehegui umi mbaʼe ojepredesíva. Upéva oiko jepi ojepurúramo diferénte método ojejapo hag̃ua pe adivinasión. Ha ojepurúramo jepe el mísmo método, lomímonte avei idiferénte ojuehegui umi mbaʼe ojepredesíva. Peteĩ persóna ojeruréramo mokõi adivínope heʼi hag̃ua chupe mbaʼépa oĩ henonderãme, ha mokõivéva “oleéramo” jepe la mísma kárta, heta vése umi prediksión ojapóva hikuái lomímonte ojoavy.

Avei ndaikatúi jajerovia umi método oipurúvare umi adivíno ni mbaʼérepa oadivinase hikuái. Oĩ heʼíva hesekuéra oreko reinteha umi kárta ha vóla de kristál, pórke haʼekuéra añetehápe ndoleéi mbaʼeve umívagui, upéva rangue, haʼekuéra ohechánte mbaʼéichapa orreaksiona la hénte ha mbaʼépa heʼi chupekuéra. Por ehémplo, peteĩ adivíno ikatu oporandu guaʼu heta mbaʼe ikliéntepe ikatu hag̃uáicha onohẽ chugui umi mbaʼe haʼe oikuaaséva. Upéicha pe persóna oñemeʼẽʼỹre enkuénta omombeʼupaitéma chupe la haʼe oikuaaséva, ha upéi haʼe oipuru umíva ifavórpe. Ha pe kliénte ojeroviáma rupi pe adivínore, haʼe ikatu ogana hese hetaiterei pláta.

Umi astrólogo ha umi adivíno opensa oĩmbamaha mbaʼépa oikóta ñandehegui. Péro, ¿siérto piko upéva? La Biblia heʼi jarekoha la kapasida jadesidi hag̃ua mbaʼépa jagueroviáta ha mbaʼépa jajapóta, ha umi mbaʼe jadesidíva ikatuha ñanepytyvõ térã ñandeperhudika (Josué 24:15).

Umi oservíva Ñandejárape omboykete avei pe astrolohía ha pe adivinasión pórke chupe ombojeguaru koʼã mbaʼe. La Biblia heʼi voi: “Ndaipóri vaʼerã pende apytépe [...] avave ojapóva adivinasión, máhia, opredesíva mbaʼépa oikóta, ni pajeséro, ni peteĩ ojapóva malefísio, ni ohóva oporandu espiritístape térã peteĩ adivínope, ni ombaʼeporandúva umi omano vaʼekuépe. Pórke oimeraẽ ojapóva koʼã mbaʼe ombojeguaru hína Jehovápe” a (Deuteronomio 18:10-12).