Ovatjiwe vozonyose ve muna kutja ozonyose, omweze nevaverwa moumbomba wa ro vi ṱuna kehupo rovandu kombanda yehi. Owo ve tja oruveze ozoplaneta pu ze ri meyuva rwongwatero yoye vi ṱuna kongaro noruyaveze rwoye.

Nandarire kutja omaveterero mokutara kozonyose kwa utira koBabilon otjikuru, ndino ngamba kuungurisiwa tjinene. Otja kongonḓononeno ndja tjitwa mombura ndji 2012 mo United States, ohinga yotjihupe tjovakonḓonone mbo va muna kutja outjiwe wozonyose u ri tjimuna “ounongo wovimemwa” nu ozoperesende 10 zawo va tjere, outjiwe wozonyose “ounongo wovimemwa.” Hapo imbwi ouatjiri? Kako. Mena romapu ngu maye kongorere mba.

• Ozoplaneta nozonyose ka ze nomasa poo ombepo ndji mai yenene okuṱuna kongaro yovandu tjimuna ovatjiwe vozonyose tji ve he ya.

• Potwingi owo ve hunganeka oviṋa vya kauriri, mbi yenena okutjiukwa i ngamwa omundu.

• Omarekeneno wovatjiwe wozonyose ndino ye rekenenwa komuano wongamburiro yoruveze orukuru, yokutja ozoplaneta zarwe ze kondoroka ouye (earth). Posi yokutja, ozoplaneta azehe ze kondoroka eyuva.

• Nandarire kutja ovatjiwe vozonyose va uku otjiṋa tjimwe, omaukiro wawo ka ye hitasana.

• Ovatjiwe vozonyose ve haṋa ovandu movimbumba 12, poo moviraisiro vyouperendero (zodiac signs) kutja owozonyose poo wovipuka otja komayuva mu va kwatwa. Mena rokutja oplaneta yetu ya rundurura oruveze rwayo mevaverwa momaserewondo nga kapita, omayuva nge twa pewa otjoviraisiro ka ye hitasana noruveze oviutwa vyevaverwa mu vi ri, ovandu ku ve tarerwa otja tji va twapo rukuru.

Oviraisiro mbi kuramenwa po i ozonyose poo ovipuka ku za vi raisa kutja omundu ma rire omungendu mongaro na movitjitwa vye. Posi yokutja mouatjiri, ovandu mbu va kwatwa meyuva rimwe ka ve kara novikaṋena vimwe, kunao eyuva omundu nda kwatwa ka ri notjiṋa nongaro ye oparukaze. Moruveze rokumuna ovandu omuano mbu ve ri oveni, ovatjiwe vozonyose ve uta okupangura ozongaro zovandu ama ve ungurisa ovihakwa uriri. Hapo imbwi kamwano wokuhakera omundu mongaro me he ri?

Okuza koruveze orukuru, ovandu ve yenda kozombuke. Okupaha omaziriro wawo, ozombuke nozombetere ze yenena okuungurisa oura wotjinamuinyo noura wovandu, poo omuano ohunguriva mu mai paha ovikurya vyayo. Varwe ve paha omaziriro mokutara momikoka vyoviyao vyotee poo mokosiva. Ndino wina ve ungurisa oukarata, ovispili nozonane, nozondaesa, noviṋa vyarwe “okutjiwa” oruyaveze rwomundu. Hapo tjiri ovandu ve sokuṱaṱera kozombuke okutjiwa oruyaveze? Kako, kape sokukara nao. Indjo tu hite mepu ndo kaṱiṱi.

Ripurira komuano omaukiro wawo mu ye ha hitasana. Oviṋa ozombuke mbi za uku popengi ka vi hitasana nandarire kutja va uku otjiṋa tjimwe. Kutja va ungurisa omuano umwe wokuuka, omaukiro wawo ye panguka. Otjotjihorera, omundu tja pura ozombuke mbari epuriro rimwe ohunga noruyaveze kutja ze “tare” moukarata umwe, eziriro mari sokurira rimwe. Posi yokutja popengi ka ye rire yemwe.

Omiano vyomaunguriro wozombuke poo ozondando za wo kaṱiṱi vya uta okuyeta omapuriro movandu. Ovengi mbe ha kambura moviṋa mbyo ve tja oukarata, ovispili nozonane oviṋa uriri mbi kara momurungu wombuke posiya ka mbi ve ungurisa. Ozombetere ze tara kongaro omundu ndji ma raisa nungwari kave tara ku imbi mbi ve ungurisa. Otjotjihorera, ombuke ndji nondjiviro onyingi i pura omapuriro wa kauriri komundu, nai i tara nokurihonga ongaro omundu ndji ma raisa nga tja munu otjiṋa ohunga nomundu ngwi. Okuzambo ombuke otji i muna ondangu, mena rokutja ya tjiwa ouatjiri omundu mbwe i raere, e hi nokutjiwa kutja ondjiviro aihe ndji yananwa mu ye. Nu ovandu o tji ve kara nongamburiro mu yo. Ozombuke tjiva ze muna otjimariva otjingi tjinene movandu mbe ya ku wo.

Omatarero wozonyose nomaveterero vi raisa kutja oruyaveze rwetu rwa ṱunwa rukuru. Hapo imbwi ouatjiri? Ombeibela i tu raera kutja matu yenene okuritoororera oveni kutja matu vanga okukambura mu ye, nokutja imbi mbi twa toorora mavi ṱunu koruyaveze rwetu momuano omuwa poo omuvi.—Josua 24:15.

Ovakerere va Mukuru ve nepu ewa ndi ve pirukira ozombuke nozondjai. Mukuru u yaukisiwa i oviṋa ngamwa avihe mbi tjama noviṋa mbyo. Ombeibela i tja: “Ape ningi umwe . . . ngu ma uku oviporoporo poo ngu ma vetere poo ngu ma serekarere noviraisiro poo ngu ma tjiti oundjai poo ngu ma sengi poo ngu ma ningire ombepo yovaṱi poo yomaukiro poo ngu ma kapura ovaṱi. Orondu auhe ngu ma tjiti oviṋa mbi, ma rire omuyaukise” ku Jehova. a​—Deuteronomium 18:10-12.