I astrolohiya ay tadday nga klase na pallavvun nga nebase ta pangurug nga dakal i influwensia na biti-bitun, vulan, anna na planeta ira ta totolay ta davvun. Kagian na astrologo ira nga i personalidad anna mappange na tadday ay nebase ta posision danaw nga pinaratu ta langi ta tiempo na nikeyanana.

Popular lagapa i astrolohiya maski nu naggafu paga yatun ta Babilonia tagga. Segun ta 2012 nga survey ta Estados Unidos, 33 porsiento i nakkagi nga “konektadu ta siensia” i astrolohiya, anna 10 porsiento gapa i nakkagi nga “talaga maka-siensia” yaw. Kurug kari? Ari. Danaw i rason.

• Awan tu pakapangngua na planeta anna bitun ira nga makafekto ta totolay gittana kakkagian na astrologo ira.

• Maruddu nga alawa i sakup na prediksiodda yatun tu magaplika ta maski sinni.

• Nebase i pakkalkula na astrologo ira sangawe ta pangurug gari nga malligo i planeta ira ta mundo. I kurug, malligo i planeta ira ta bilag.

• Ari tu para-parehu i prediksion na astrologo ira ta tadday nga tolay.

• Grinupo na astrologo ira i totolay ta 12 nga kategoria, onu zodiac sign, segun ta petsa na nikeyanada. Megafu ta panguloli na posision na planeta nga davvun ta aru nga siglo, i petsa nga konektadu ta zodiac sign ay ari ngana katumbas na konstelasion nga nangapan tu ngagan na sign nu maddalan i bilag ta konstelasion ira.

Kudda, mangiyawa tu ideya ta personalidad na tadday i zodiac sign ira. I kurug, ari makka-ugali i totolay nga neyana ta parehu nga aggaw; ari nakadepende ta petsa na nikeyana na tadday i personalidadna. Imbes nga innan na astrologo ira i totolay ta kata-katoleda, maddepende lallagu ira ta nadduruma nga pagabbo meyannung ta ugali anna personalidad na tadday. Ari kari tu pangireruma i kunnaw?

Tagga paga, mappala-palavvun ngana i totolay. Mabbase i karuan nga minallavvun ta gannug ira kagitta na sinay na ayam onu tolay onu ta attukkaw na lalung ta kananna. Ibase gapa na tanakuan ira i prediksiodda ta itsura na don na tsa onu ta vukal na kafe. Ta maddaggun, mangusa ira tu baraha nga tarot, bola nga kristal, dice, anna tanakuan paga tapenu “bibbigan” i mappange na tadday. Mapattalakkan kari i pallavvun ta pangammu ta mappange? Ari. Innattam i rason ira.

Ikonsidera i meyannung ta pakkapara-parehu. Maruddu nga makkorontra i prediksion ira na madduruma nga metodo ta pallavvun. Maski nu parehu nga metodo i nosa, madduruma i prediksion ira. Angngariganna, nu makkiavu i tadday nga tolay ta dua nga minallavvun tu parehu nga pakkiavu meyannung ta mappange anna ibaseda i “pabbibbigda” ta parehu nga baraha, mawag nakuan tu parehu i tabbagda. Ngem maruddu nga ari.

Kadduda gapa i metodo onu motibo ira na minallavvun. Kagian na kritiko ira nga props laman i baraha onu bola nga kristal anna mabbase i minallavvun ta reaksion na tolay imbes tu ta props. Angngariganna, makkiavu i malalaki nga minallavvun anna gigiammuanna tu mapia i kakkagian anna i guyu-guyu na mappalavvun nga mangiyawa tu ideya meyannung nisa. Base ta informasion ira nga nakagi na mappalavvun, kagian gapa sangaw na minallavvun nga ammuna danatun. Megafu ta nattalo ngana i mappalavvun, dakal nga kuartu i mala ta totolay na karuan nga minallavvun.

Ipasingan na astrolohiya anna pallavvun nga dati ngana neplano i mappange tam. Ngem kurug kari? Kagian nittam na Biblia nga mapili tam i kurugattam onu i ikaya tam kuan anna afektan na pili-piliattam i mappange tam.—Josue 24:15.

Egga paga rason nu ngatta pammanakitan na maddayaw ira ta Dios i astrolohiya anna pallavvun—kondenan na Dios ngamin danatun. Mabibbig tam ta Biblia: “Awan nakuan tu malegan nikaw tu maski sinni . . . nga mallavvun, i maski sinni nga massalamangka, i maski sinni nga magaleg tu senial, mannamay, i maski sinni nga maggayuma ta tanakuan, i maski sinni nga makkonsulta ta espiritista onu ta minallavvun, onu i maski sinni nga makiyuvovug ta natay. Ta ikalussaw ni Jehova a i sinni laman nga magangngua taw ira nga gannug.”​—Deuteronomio 18:10-12.