Astrolojia é un fórma di dibinhason. Astrólugus ta kridita ma strélas, lua i planétas ta influensia vida di algen txeu. Es ta fla ma puzison ki strélas ta sta óras ki un algen nase ta mostra kal ki é se manera di ser i kal ki é se futuru.

Dja ten un monti ténpu ki astrolojia kumesa na Babilónia, má ti inda ten txeu algen ki ta kridita na el. Na 2012, fazedu un piskiza na Mérka i na kada 100 algen, más di 30 fla ma es ta kridita ma astrolojia ten “algun kuza aver ku siênsia”. I 10 na kada 100 algen, ta kridita ma el ten “txeu kuza aver ku siênsia”. Má siênsia ta apoia astrolojia mê? Nau. Odja pamodi.

• Planétas ku strélas ka ta manda ninhun forsa ki ta influensia algen sima astrólugus ta fla.

• Normalmenti kuzê ki astrólugus ta fla é ka dirétu i el pode aplika na kalker algen.

• Kes kónta ki astrólugus ta faze gósi, ten bazi na kel ideia antigu ma é planétas ki ta jira na vólta di téra. Má na verdadi, planétas ta jira na vólta di sól.

• Astrólugus diferenti ta fla kuzas diferenti pa mésmu algen.

• Astrolojia ta dividi algen na 12 síginu ku bazi na data ki el nase. Má sima ténpu ba ta pasa, puzison di téra na spasu muda. Nton kes data ki staba ligadu ku kada síginu ka sta más di akordu ku kel ténpu ki sól ta pasa na kes grupu di stréla ki é nómi di kes síginu.

Es ta fla ma síginu ta mostra manera di ser di un algen. Má kes algen ki nase na mésmu dia ka ten mésmu manera di ser. Dia ki algen nase ka ta mostra nada sobri modi ki el é. Envês di odja algen sima es é, kes astrólugu ta julga konportamentu i manera di ser di algen ku bazi na ideia ki ten aver ku síginu. Bu ka ta atxa ma kel-li é un manera di mostra diskriminason?

Désdi ténpu antigu, pesoas ta djobe ajuda na kes algen ki ta fla ma es ta dibinha. Alguns algen ki ta flaba ma es ta dibinha, ta djobeba órgon di animal i di algen ô manera ki galu ta kumeba pa es flaba kuzê ki ta ben kontiseba na futuru. Otus ta flaba kuzê ki ta ben kontiseba na futuru ku bazi na kuzê ki es ta odjaba na fódja di xá i na bóra di kafé. Gósi es ta uza karta, bóla di kristal, pédra di dadu i otus kuza pa fla kal ki é futuru di un algen. Má nu pode kunfia na dibinhason? Nau. Nu ben odja pamodi.

Primeru, kes manera diferenti ki es ta uza pa fla futuru ta da rezultadus diferenti. I sikrê es uza kel mésmu manera, rezultadu é ka igual. Pur izénplu, si un algen faze mésmu pergunta pa dôs algen ki ta fla ma es ta dibinha i es “lé” kes mésmu karta, respósta debe sérba igual. Má txeu bês é ka igual.

Kes manera ki kes algen ta uza pa dibinha futuru ô ses intenson ta poi algen ku dúvida. Alguns algen ta fla ma kes karta i bóla di kristal é sô pa infeita. Es ta fla ma kes algen ki ta fla ma es ta dibinha ka ta lé kes kuza li, má es ta odja modi ki algen ta reaji. Pur izénplu, un algen ki ta fla ma el ta dibinha ki ten spiriénsia, pode faze perguntas pa un algen i fika sienti na modi ki el ta responde i na jéstus ki el ta faze na korpu. É kes kuza li ki pode mostra algun kuza sobri kel algen. Nton, ken ki ta dibinha ta fla kel algen kuzas sobri se vida ki é el mê ki mostra-l sen el da kónta. Dipôs di ganha kunfiansa di kes algen, kel algen ki ta dibinha pode ganha monti dinheru.

Astrolojia ku dibinhason ta da ideia ma nos futuru dja sta skrebedu óras ki nu nase. Má kel-li é verdadi? Bíblia ta fla ma nu pode skodje kuzê ki nu ta kridita na el i kuzê ki nu ta faze. I ma disizons ki nu toma ta afeta nos futuru. — Josué 24:15.

Kes algen ki ta adora Deus ten más un motivu pa ka mete na astrolojia i dibinhason. Deus ta kondena tudu manera ki ta uzadu na fitisaria ô bruxaria pa tenta sabe futuru. Bíblia ta fla: ‘I na bu meiu ka debe ten ningen ki ta faze dibinhason, ô ki ta faze majia, ô ki ta djobe agoru, ô un fitiseru, ô un algen ki ta prende otus algen ku nkantamentu, ô ki ta djobe kes algen ki ta invoka spritus, ô un algen ki ta dibinha, ô algen ki ta pâpia ku mortu. Pamodi Jeová ta ôdia ken ki ta faze kes kuza li.’ a — Deuteronómio 18:10-12.