Astrolozi kele kusosa kuzaba mambu yina ta salama na bilumbu ke kwisa; yo ke tubaka nde bambwetete, ngonda mpi baplanete ke vandaka kibeni ti bupusi na luzingu ya bantu awa na ntoto. Bantu ya ke longukaka mambu yai ke tubaka nde mutindu bima yai ke vandaka na zulu ntangu muntu ke butukaka, ke monisaka kimuntu mpi luzingu na yandi na bilumbu ke kwisa.

Ata astrolozi me katukaka na Babilone ya ntama, bantu mingi ke landaka na kuzola yo. Na kutadila nsosa mosi ya bo salaka na 2012 na États-Unis, bantu mingi (1/3) yindulaka nde astrolozi kele “mutindu mosi ya siansi,” mpi bantu fioti (10 %) tubaka nde yo kele “kibeni siansi.” Keti yo kele mutindu yina? Ve. Tala bikuma ya ke pusa beto na kutuba mutindu yina.

• Baplanete mpi bambwetete ke vandaka ve ti bupusi na luzingu ya bantu mutindu bantu yai ke tubaka.

• Mbala mingi, mambu yina bo ke tubaka ke tadilaka bantu mingi.

• Bubu yai, bo ke salaka bakalkile ya mambu yina ta salama na kutadila dibanza ya ntama yina ke monisaka nde baplanete ke balukaka na nziunga ya ntoto. Kansi, baplanete ke balukaka na nziunga ya ntangu.

• Mambu yina bantu yai ke tubaka nde yo ta kumina muntu mosi ke wakanaka ve.

• Astrolozi ke kabulaka bantu na bimvuka to na bidimbu ya zodiaque 12 na kutadila bilumbu yina bo butukaka. Sambu ntoto me sobaka mutindu yo ke vandaka na zulu banda bamvula mingi, bilumbu yina bo ke wakanisaka ti bidimbu ya zodiaque ke wakanaka diaka ve ti bazina yina bo pesaka bidimbu yina na ntangu yina ntangu ke lutaka na bimvuka ya bambwetete yina salaka nde bo pesa bazina yina.

Bo ke tubaka nde bidimbu ya zodiaque ke sadisaka na kuzaba bikalulu ya muntu. Kansi, bantu yina me butukaka kilumbu mosi ke vandaka ve ti bikalulu ya kiteso mosi; kilumbu ya kubutuka ya muntu ke monisaka ve ata kima mosi ya me tala kimuntu na yandi. Na kisika ya kutadila bantu mutindu bo ke vandaka kibeni, bantu yai ke tadilaka bikalulu ya muntu na nsadisa ya mambu yina bo ke yindulaka. Kuyindula mutindu yai kele mbi kibeni!

Banda na ntangu ya ntama, bantu ke solulaka ti bantu yina ke zabisaka mambu yina ta salama na bilumbu ke kwisa. Bantu ya nkaka ya ke salaka mutindu yai ke sosaka bantendula na mambu bonso bima-kati ya bambisi mpi ya bantu to mutindu nsusu ya bakala ke diaka dimbuma. Bantu ya nkaka ke tadilaka mutindu matiti ya ti to ya kafe ke vandaka sambu na kuzabisa mambu yina ta salama na bilumbu ke kwisa. Bubu yai, bo ke sadilaka bakarti, dimbuma ya kristale, dimbuma ya jeux de six, mpi bima ya nkaka sambu na “kutanga” mambu yina ta kumina muntu. Keti kuzabisa na ntwala mambu yina ta salama kele mutindu ya mbote ya kuzaba mambu yina ta salama na bilumbu ke kwisa? Ve. Beto tadila bikuma yina ke pusa beto na kutuba mutindu yai.

Beto tadila mambu ya me tala kuwakana. Mbala mingi, kana bo me sadila mayele ya kuswaswana, mambu ya bo ke tubaka nde yo ta salama ke vandaka ve mutindu mosi. Ata bo me sadila mayele ya kiteso mosi, mambu yina bo ke yindulaka nde yo ta salama ke vandaka ve kiteso mosi. Mu mbandu, kana muntu mosi kulomba bantu zole ya ke zabisaka mambu yina ta salama na kusonga yandi mambu yina ta salama na bilumbu ke kwisa na nima ya “kutanga” bakarti, na kutuba ya mbote bamvutu fwete vanda ya kiteso mosi. Kansi mbala mingi yo ke vandaka ve kiteso mosi.

Bametode to bangindu ya bantu yina ke zabisaka mambu yina ta salama na bilumbu ke kwisa ke nataka badute na ba-ntu ya bantu. Bantu yina ke tulaka ntembe ke tubaka nde bakarti to bambuma ya kristale ke vandaka kibeni mfunu ve mpi nde bantu yango ke longukaka mambu yina muntu ke salaka mpi yo ke pusaka bo na kuzabisa mambu yina ta kumina yandi. Mu mbandu, muntu ya me zaba kisalu yango mbote ke yulaka bangiufula mingi mpi yandi ke tulaka dikebi na mambu yina muntu ke tubaka mpi yina yandi ke tubaka ve; yo ke sadisaka yandi na kuzaba mwa mambu ya me tala muntu yina. Na nima muntu yango ke sadilaka kaka mambu yina muntu ya me kwisa kumona yandi ke songa yandi kukonda kuzaba mpi yandi ke monisaka bonso nde yandi me zaba mambu yango. Bantu ya nkaka ya ke zabisaka mambu yina ta salama me zwaka mbongo mingi sambu bantu yina ke kwisaka kumona bo ke tudilaka bo ntima.

Astrolozi mpi kuzabisa na ntwala mambu yina ta salama ke monisaka nde bo ke kanaka na ntwala mambu yina ta kumina beto. Keti yo kele mutindu yai? Biblia ke songa beto nde beto kele ti nswa ya kupona mambu yina beto fwete kwikila to yina beto ta zola kusala mpi nde balukanu na beto ke vandaka ti bupusi na luzingu na beto na bilumbu ke kwisa.—Yozue 24:15.

Bansadi ya Nzambi ke buyaka mpi astrolozi mpi kuzabisa na ntwala mambu yina ta salama sambu Nzambi ke buyaka mitindu yonso ya kusosa kuzaba mambu yina ta salama na bilumbu ke kwisa. Biblia ke tuba mambu yai: “Bo fwete mona ve na kati na beno muntu yina . . . ke zabisaka na ntwala mambu yina ta bwa, muntu yina ke salaka mazi, muntu yina ke sosaka bidimbu ya mambu yina ke kwisa, nganga-nkisi, muntu yina ke kangaka bankaka na bankisi, muntu yina ke kwendaka kutala muntu ya ke solulaka ti bampeve ya bafwa, muntu yina ke zabisaka bantu mambu yina ta kumina bo, to muntu yina ke yulaka mambu na bafwa. Konso muntu yina ke sala mambu yai kele nzanzi na meso ya Yehowa.” *—Kulonga 18:10-12.