Астроложи йане стернаси, әв һәйә щурʹәки кʹочʹәктийе, һʹиме кʹижани йә стерк, һив у гәрдун, йед кö йанчь һʹöкöм дькьн сәр жийина мәрийа. Стернас дьбежьн кö чахе кәсәк те буйине, һьнге щиwарбуна qальбед әʹзмани, һʹöкöм дьбә сәр ве йәке, wәки әw мәрьв у ахьрийа wи, wе чь щурʹәйи бә.

Бь рʹасти, кʹока стернасийе жь Бабилона кәвьн ә, у һʹәта ньһа әв гәләк бәлабуйи йә. Ль гора леколине дь сала 2012-да ль Дәwләтед Йәкбуйи һатә кʹьфше, wәки незики 33% мәрьв дьфькьрин кö стернаси «щурʹе зандарийе йә», у 10% жи готьнә кö әw «педа бь зандарийе йә». Ле гәло әв рʹасти öса нә? На. Жере те шьровәкьрьне.

• Гәрдуна у стерк нькарьн ль сәр мәрийа һʹöкöм бьн.

• Гәләк щар кʹочʹәктийа стернаса конкрет нинә у гьлийед wан дәрһәqа гәләк мәрийа йәк ә.

• Иро һʹәсабед стернаса ль сәр һʹиме баwәрийа кәвьн ьн, демәк кö гәрдун дора әʹрде дьзвьрʹьн. Ле бь рʹасти гәрдун дора тәʹве дьзвьрʹьн.

• Пешготьна чәнд стернаса, дәрһәqа мәрьвәки жи дькарә һәв нәгьрә.

• Стернаси дьбежә wәки 12 нишанед чәрха фәләке һәнә (нишанед Зодйаке). Жь wан нишана, йәк пʹара мәрьвәки дькʹәвә анәгори рʹожа буйина wи. Нава qьрнада әʹрд жь щийе хwә ләqийа йә, ләма жи нишанед чәрха фәләке тʹәви кʹомстәре һәв нагьрьн, чахе тʹәв дәр-дора wи дәрбаз дьбә.

Стернас дьбежьн, кö хәйсәте мәрьва дькарьн те дәрхьн, бь сайа нишанед чәрха фәләке. Бь рʹасти мәрьвед кö рʹожәкида һатьнә буйине, әwана рʹәнге һәвда ниньн у хәйсәтед wан жи һәв щöдә дьбә; демәк рʹожа буйина мәрьва тö тьшти әʹйан накә дәрһәqа хәйсәте wи. Сәва кö стернас бьвиньн бь рʹасти мәрьв йәки ча нә, әwана дәстпедькьн шеwьр кьн дәрһәqа хәйсәт у рʹабун-рʹуньштандьна wи мәрьви, wәки тедәрхьн әв мәрьв йәки ча нә. Әв йәк дьдә кʹьфше, wәки стернас щöдәбуне дькьнә нава мәрьва.

Дәстпебуйи жь wәʹде бәре, мәрьв дьчьнә бал кʹочʹәка. Һьнәк сәва кö пебьһʹәсьн мәʹна тьштәки, навдьле һәйивана у мәрийа дьньһерʹьн, йан жи дина хwә дьдьн һәла чь щурʹәйи дик нькьле хwә гәньм дьхә. Һьнәк жи пешдаготьнед хwә һʹимли дькьрьн сәр бәлгед чайе у льбед кʹаһве. Иро жи әwана дьдьнә хәбате карта, тʹопед сербазийе, һʹәстийа у тьштед дьн, сәва кö йан чь «бьхуньн» ахьрийа мерьв. Гәло кʹочʹәкти бь рʹасти дькарә ахьрийа мә әʹйан кә? На. Кʹа әм шеwьр кьн.

Һәла әм дина хwә бьдьнә пьрса һәвгьредане. Гәләк щар методед кʹочʹәка жи мьqабьли һәв дәртен. Һьнге жи чахе метода wан йәк ә, пешдаготьна wан жи щöдә йә. Мәсәлә, һәрге мәрьвәк пьрсәке дьдә дö кʹочʹәка, кö әwана бь сайа карта ахьрийа wи «бьхуньн», бь логики йә кö щаба wан гәрәке мина һәв бә. Ле гәләк щара öса нинә.

Метод у нетед кʹочʹәка дькʹәвьн бәр шьке. Мәрьвед критик дьбежьн кö карт у тоʹпед сербазийе, әw тʹәне тьштед бона бәдәwбуне нә. Сербаз зур дьбьн, рʹьнд дина хwә дьдьнә мерьв у паше ль гора реаксийа wан, тьштәки wанарʹа дьбежьн. У бь рʹасти тьштед сербазийе, тʹö роли нализьн. Бәʹса хәбәре, сербазе щерʹьбанди, wе пьрс бьдә у паше жи рʹьнд гöһе хwә бьде һәла мәрьв чь дьбежә у чахе жь дәве мерьв гьлик ньшкәва дәрте, сербаз әве йәке дьдә хәбате ча кʹьлит, кö дәрһәqа wи мәрьви тьштәки әʹйан кә. Паше сербаз пʹәрʹа һьлдьдә бона wе әʹламәтийе, кö әwи йанчь әʹйан кьрийә. Ле бь рʹасти мәрьв хwәха һашпе тʹöнә бу, чаwа дәве wирʹа һьнә гьли дәркʹәтьн у әв әʹламәти әwи хwәха сербазрʹа әʹйан кьр. Чахе сербаз дьле мәрийа дькʹьрьн у дьвиньн, кö мәрьв wан баwәр дькьн һьнге әwана һе зедә пʹәра жь wана дәʹwа дькьн.

Стернаси у кʹочʹәкти әʹйан дькьн, кö йан чь ахьрийа мә ида пешда зәлал ә. Гәло әв рʹасти öса нә? Кʹьтеба Пироз дьбежә, кö азайа бьжартьна мәрийа һәйә хwәха бьжберьн чь баwәр бькьн у чь бькьн. Чьмки бьжартьна мәва ахьрийа мә гьредайи йә (Йешу 24:15).

Хьзмәткʹаред Хwәде диса бона мәʹнике, стернасийе у кʹочʹәктийе инкʹар дькьн, демәк wәки Хwәде һʹәму щурʹә сербазийе сущдар дькә. Дь Кʹьтеба Пирозда ньвисар ә: «Бьра нава тәда йе öса тʹöнә бә, йе кö кöрʹ йан qиза хwә нава егьррʹа дәрбаз дькә, нә кʹочʹәк, нә сербаз, нә рʹәʹмьлдар, нә жи пирәсер, нә ньфьрʹкьр, нә йе кö гази рʹöһʹа дькә, нә хwәйиһʹöньр, нә жи йе кö гази мьрийа дькә. Чьмки ль бәр чʹәʹве Хöдан йе кö ве йәке дькә кʹьрет ә у бона ван кʹьретийа Хöдан Хwәдейе тә [Йаһоwа a, ДТʹ] жь бәр тә бәри wан мьләта дьдә» (Qануна Дöщари 18:10-12, ПКʹМ).