တၢ်ဒွးဆၣ်ဧိၤဖီဧိၤ ဒီးပှၤဒွးတၢ်ဖိတဖၣ်န့ၣ် ဒုးသ့ၣ်ညါပှၤ တၢ်ကမၤအသးလၢ ခါဆူညါလီၤတံၢ်လီၤဆဲးကသ့ဧါ
တၢ်ဒွးဆၣ်ဧိၤဖီဧိၤ
တၢ်ဒွးဆၣ်ဧိၤဖီဧိၤန့ၣ် မ့ၢ်ဝဲတၢ်ဝံတၢ်နါ အတၢ်ဖံးတၢ်မၤတခါလီၤ. ပှၤလၢအမၤတၢ်ဒ်အံၤတဖၣ်န့ၣ် နာ်ဝဲလၢ ဆၣ်, လါ ဒီးဟီၣ်ခိၣ်ဖျၢၣ်တဖၣ်န့ၣ် အိၣ်ဒီးအစိအကမီၤ လၢကဟံးစုနဲၣ်ကျဲ ပှၤဟီၣ်ခိၣ်ဖိ မ့တမ့ၢ် ပာ်ဖျါထီၣ်ဝဲပှၤဟီၣ်ခိၣ်ဖိတဖၣ် အတၢ်အိၣ်မူလၢ ခါဆူညါအဂ့ၢ်သ့ဝဲလီၤ. အဒိ ဖဲဖိသၣ်တဂၤ အိၣ်ဖျဲၣ်ထီၣ်သီသီအခါ, ပှၤဒွးဆၣ်ဧိၤဖီဧိၤတဖၣ် နာ်ဝဲလၢ အဝဲသ့ၣ်မ့ၢ်ကွၢ်ဝဲဆၣ် ဒီးဒွးဝဲဖိသၣ်တဂၤအံၤအဂ့ၢ်န့ၣ် ကပာ်ဖျါထီၣ်ဝဲလၢ ဖိသၣ်တဂၤအံၤ ကမ့ၢ်ပှၤဒ်လဲၣ်တဂၤလဲၣ် ဒီးအတၢ်အိၣ်မူခါဆူညါ ကမၤအသးဒ်လဲၣ်န့ၣ်လီၤ.
တၢ်ဒွးဆၣ်ဧိၤဖီဧိၤ အကျိၤအကျဲတဖၣ်န့ၣ် အခီၣ်ထံးခီၣ်ဘိ ဟဲလီၤစၢၤလၢ ပှၤဘၤဘူၤလိၣ်ဖိ လၢပျၢၤတဖၣ်အအိၣ်န့ၣ်လီၤ. ဒီးဖဲ ၂၀၁၂ နံၣ်န့ၣ် လၢကီၢ်အမဲရကၤ ပှၤဟးသံကွၢ်ဝဲ ပှၤကမျၢၢ်တဖၣ်လၢ, မ့ၢ်အဝဲသ့ၣ် ဆိကမိၣ်လၢ တၢ်ဒွးဆၣ်ဧိၤဖီဧိၤ အကျိၤအကျဲတဖၣ်န့ၣ် မ့ၢ်အဘၣ်ထွဲလိာ်အသးဒီး စဲအ့ၣ်ဧါ. ပှၤကမျၢၢ်သၢပူတပူန့ၣ် တဲဝဲလၢ “ဘၣ်ထွဲလိာ်အသးဒီး စဲအ့ၣ်တစဲးဖိ.” မ့မ့ၢ်ပှၤအမျးကယၤတဆံန့ၣ် တဲဝဲလၢ “အဘၣ်ထွဲလိာ်အသးဒီး စဲအ့ၣ်သပှၢ်တၢၢ်လီၤ.” အဝဲသ့ၣ်အတၢ်စံးဆၢန့ၣ် မ့ၢ်အဘၣ်ဧါ. တဘၣ်ဘၣ်. ဘၣ်မနုၤအဃိလဲၣ်န့ၣ် တၢ်ဂ့ၢ်လၢလာ်တဖၣ်အံၤ ကပာ်ဖျါထီၣ်န့ၢ်ပှၤလီၤ.
-
ဆၣ်ဒီးဟီၣ်ခိၣ်ဖျၢၣ်တဖၣ်န့ၣ် တအိၣ်ဒီးအစိအကမီၤလၢ ကဟံးစုနဲၣ်ကျဲ မ့တမ့ၢ် ပာ်ဖျါထီၣ်ဝဲပှၤဟီၣ်ခိၣ်ဖိ အတၢ်အိၣ်မူခါဆူညါအဂ့ၢ် ဒ်ပှၤဒွးဆၣ်ဧိၤဖီဧိၤတဖၣ် တဲဝဲအသိးဘၣ်.
-
ညီနုၢ်န့ၣ် ဖဲပှၤဒွးတၢ်ဖိတဖၣ် တဲဖျါထီၣ်ဝဲ ပှၤတဂၤအတၢ်အိၣ်မူ ခါဆူညါအဂ့ၢ်န့ၣ် ဘၣ်ထွဲလိာ်အသးဒီး ပှၤခဲလၢာ်သ့ဝဲလီၤ.
-
မုၢ်မဆါတနံၤအံၤ ပှၤဒွးဆၣ်ဧိၤဖီဧိၤတဖၣ်န့ၣ် အဝဲသ့ၣ်ဆဲးသူဝဲ ပှၤဒွးတၢ်လၢပျၢၤတဖၣ် အတၢ်ဒွးလီၤ. ဒီးပှၤဒွးတၢ်လၢပျၢၤတဖၣ်အံၤ နာ်ဝဲလၢဟီၣ်ခိၣ်ဖျၢၣ်အဂၤတဖၣ် ဝးတရံးဝဲ ဟီၣ်ခိၣ်လၢ ပအိၣ်လၢအပူၤတဖျၢၣ်အံၤန့ၣ်လီၤ. ဘၣ်ဆၣ် ဒ်ပသ့ၣ်ညါအသိး ဟီၣ်ခိၣ်ဖျၢၣ်တဖၣ်န့ၣ် ဝးတရံးဝဲမုၢ်လီၤ.
-
ဖဲပှၤဒွးဆၣ်ဧိၤဖီဧိၤအါဂၤဒွးဝဲ ပှၤတဂၤအဂ့ၢ်အခါ အတၢ်စံးဆၢန့ၣ် တဒ်သိးလိာ်အသးဘၣ်.
-
ပှၤဒွးဆၣ်ဧိၤဖီဧိၤတဖၣ် တဲဝဲလၢ ဒ်ပှၤအိၣ်ဖျဲၣ်မုၢ်နံၤမုၢ်သီ အိၣ်ဝဲအသိး စိၣ်ဒံၣ်ယါ(ခ်) အတၢ်ပနီၣ်တဖၣ်န့ၣ် (zodiac signs) ပာ်ဖျါထီၣ်ဝဲ ပှၤတဂၤစုာ်စုာ်အတၢ်ပာ်သူၣ်ပာ်သး အိၣ်ဒ်လဲၣ်ဒ်လဲၣ်န့ၣ် သ့ဝဲလီၤ. ဘၣ်ဆၣ် ပမ့ၢ်တဲလိၤလိၤန့ၣ် ပှၤလၢအအိၣ်ဖျဲၣ် မုၢ်နံၤမုၢ်သီ ဒ်သိးလိာ်အသးတဖၣ်န့ၣ် အတၢ်ပာ်သူၣ်ပာ်သး တဒ်သိးလိာ်အသးဘၣ်. အဃိ ပှၤတဂၤဂၤ အတၢ်ပာ်သူၣ်ပာ်သး ကအိၣ်ဒ်လဲၣ်ဒ်လဲၣ်န့ၣ် တဒိးသန့ၤထီၣ်အသးလၢ အတၢ်အိၣ်ဖျဲၣ်မုၢ်နံၤမုၢ်သီဘၣ်. ပှၤဒွးဆၣ်ဖိတဖၣ် အိၣ်ဒၣ်အဝဲသ့ၣ် ဟးဒွးကြီဝဲပှၤဂၤ အတၢ်ပာ်သူၣ်ပာ်သးန့ၣ်လီၤ.
ပှၤဒွးတၢ်ဖိ
လၢပျၢၤန့ၣ် ပှၤအါဂၤ လဲၤသံကွၢ်သံဒိး တၢ်ဂ့ၢ်တၢ်ကျိၤလၢ ပှၤဒွးတၢ်ဖိတဖၣ်အအိၣ်လီၤ. ပှၤဒွးတၢ်ဖိတနီၤသူဝဲ ဆၣ်ဖိကီၢ်ဖိ မ့တမ့ၢ် ပှၤဟီၣ်ခိၣ်ဖိ အပှံာ်အကဖု ဒ်သိးကတဲဖျါထီၣ်ဝဲ တၢ်ကမၤအသးလၢ ခါဆူညါအဂ့ၢ်န့ၣ်လီၤ. တနီၤန့ၣ် ကွၢ်ဝဲဆီဖျးအီၣ်အဆၣ်, သူဝဲလးဖးဃ့ ဒီးခီဖံၣ်ကမူၣ် ဒ်သိးကတဲဖျါထီၣ်ဝဲ တၢ်ကမၤအသးလၢ ခါဆူညါအဂ့ၢ်လီၤ. မ့မ့ၢ်မုၢ်မဆါတနံၤအံၤ ပှၤသူဝဲ ဖဲစးခိ, ပှၤကွၢ်စုတိၤ ဒီးတၢ်အဂၤတဖၣ် ဒ်သိးကတဲဖျါထီၣ်ဝဲ ပှၤတဂၤဂၤ အတၢ်အိၣ်မူလၢခါဆူညါ ကမၤအသးဒ်လဲၣ်အဂ့ၢ်န့ၣ်လီၤ. ပှၤဒွးတၢ်ဖိတဖၣ်န့ၣ် မ့ၢ်ပနာ်န့ၢ် အဝဲသ့ၣ်ကသ့နီၢ်ကီၢ်ဧါ. တသ့ဘၣ်. ဘၣ်မနုၤအဃိတသ့ဘၣ်လဲၣ်န့ၣ် ပကကွၢ်အါထီၣ်တၢ်ဂ့ၢ်တနီၤလီၤ.
ညီနုၢ်န့ၣ် ပှၤဒွးတၢ်ဖိတဖၣ် မ့ၢ်သူဝဲ တၢ်ပီးတၢ်လီလၢတဒ်သိးလိာ်သးမ့ၢ်ဂ့ၤ တမံၤဃီမ့ၢ်ဂ့ၤ လၢကဒွးတၢ်သနာ်က့ ဖဲအဝဲသ့ၣ်တဲဖျါထီၣ် တၢ်ကမၤအသးလၢ ခါဆူညါအခါ အဝဲသ့ၣ်အတၢ်စံးဆၢန့ၣ် တဒ်သိးလိာ်အသးဘၣ်. အဒိ ပှၤတဂၤ လဲၤသံကွၢ်ဝဲပှၤဒွးတၢ်ဖိခံဂၤ လၢတၢ်သံကွၢ်တဖျၢၣ်ဃီ ဒီးပှၤဒွးတၢ်ဖိခံဂၤမ့ၢ် သူဝဲဖဲစးခိတဘ့ၣ်ဃီ လၢကတဲဖျါထီၣ် တၢ်ကမၤအသးလၢခါဆူညါအဂီၢ်န့ၣ် အတၢ်စံးဆၢ ကဘၣ်ဒ်သိးလိာ်အသးလီၤ. ဘၣ်ဆၣ် အါတက့ၢ်န့ၣ် အဝဲသ့ၣ် အတၢ်စံးဆၢ တဒ်သိးလိာ်အသးဘၣ်.
ပှၤဒွးတၢ်ဖိတဖၣ် သူဝဲအကျိၤအကျဲလၢ ကဒွးတၢ်အဂီၢ်န့ၣ် ပှၤအါဂၤတနာ်ဝဲဘၣ်. ဒီးအဝဲသ့ၣ်ဆိကမိၣ်လၢ တၢ်ပီးတၢ်လီလၢ ပှၤဒွးတၢ်ဖိသူဝဲတဖၣ်န့ၣ် မ့ၢ်ဒၣ်တၢ်နါစိၤလီၤ. ပှၤအါဂၤတဲဝဲလၢ ဒ်သိးပှၤဒွးတၢ်ဖိတဖၣ် တဲဝဲပှၤတဂၤအဂ့ၢ် ကဘၣ်အဂီၢ် သံကွၢ်ဝဲပှၤတဂၤန့ၣ် အတၢ်ဂ့ၢ်တၢ်ကျိၤ, ဒီးဆိကမိၣ်ထံဝဲ ပှၤတဂၤန့ၣ် အတၢ်စံးဆၢတဖၣ်, ဒီးကွၢ်ဝဲအတၢ်ပာ်မဲာ်ပာ်နါ ဒီးအတၢ်အိၣ်ထီၣ်အိၣ်လီၤ အိၣ်ဒ်လဲၣ်န့ၣ်လီၤ. ဝံၤဒီး ပှၤဒွးတၢ်ဖိတဖၣ် တယာ်ကြီတၢ်ဂ့ၢ်ဒီး ကတဲဘၣ်ဝဲပှၤတဂၤန့ၣ်လၢ တၢ်ကမၤအသးဒီးအီၤလၢ ခါဆူညါဒ်လဲၣ်န့ၣ်လီၤ. ဘၣ်ဆၣ် ပှၤသံကွၢ်တၢ်ဖိတဖၣ် တသ့ၣ်ညါဝဲလၢ ပှၤဒွးတၢ်ဖိတဖၣ် မၤဝဲဒ်န့ၣ်ဘၣ်. ဒီးဖဲပှၤအါဂၤ နာ်န့ၢ်အဝဲသ့ၣ်အခါ, ပှၤဒွးတၢ်ဖိတနီၤန့ၣ် န့ၢ်ဘၣ်ဝဲစ့ဒီဒူၣ်ညါလီၤ.
လံာ်စီဆှံ တဲဘၣ်ပှၤဒ်လဲၣ်
ပှၤဒွးဆၣ်ဧိၤဖီဧိၤ ဒီးပှၤဒွးတၢ်ဖိတဖၣ် အဲၣ်ဒိးတဲဝဲလၢ ပတၢ်အိၣ်မူကမၤအသး ဒ်လဲၣ်ဒ်လဲၣ်န့ၣ် ဘၣ်တၢ်ပာ်ပနီၣ်အီၤဝံၤလံ. ဘၣ်ဆၣ် လံာ်စီဆှံ ပာ်ဖျါန့ၢ်ပှၤလၢ ပအိၣ်ဒီးတၢ်သဘျ့လၢ ပကဃုထၢတၢ်လၢ ပအဲၣ်ဒိးနာ် ဒီးတၢ်လၢ ပအဲၣ်ဒိးမၤတဖၣ်န့ၣ်လီၤ. ဒီးပတၢ်ဃုထၢတဖၣ်အံၤ ကဲဘျုးလၢပတၢ်အိၣ်မူအပူၤသ့ မ့တမ့ၢ် မၤဘၣ်ဒိပတၢ်အိၣ်မူလၢ ခါဆူညါသ့ဝဲလီၤ.—ယိၤၡူ ၂၄:၁၅.
လၢတၢ်န့ၣ်အဃိ ပှၤလၢအဘူၣ်ထီၣ်ဘါထီၣ် ကစၢ်ယွၤန့ၣ် တကြၢးမၤဘၣ်ထွဲလိာ်အသးဒီး တၢ်ဒွးဆၣ်ဧိၤဖီဧိၤ ဒီးပှၤဒွးတၢ်ဖိတဖၣ်ဘၣ်. ပှၤလၢအမၤတၢ်သ့ၣ်တဖၣ်အံၤန့ၣ် ကစၢ်ယွၤ ကစံၣ်ညီၣ်အဝဲသ့ၣ်လီၤ. လံာ်စီဆှံ ပာ်ဖျါန့ၢ်ပှၤဒ်အံၤ “ပှၤဖးတၢ်ဖိမ့ၢ်ဂ့ၤ, ပှၤလၢအဒုၣ်တၢ်အဆၢကတီၢ်မ့ၢ်ဂ့ၤ, ပှၤလၢအဟိၣ်တၢ်လိၢ်တၢ်မ့ၢ်ဂ့ၤ, ပှၤမၤကဒါပမဲာ်မ့ၢ်ဂ့ၤ, ပှၤသ့တၢ်အူတၢ်သမူမ့ၢ်ဂ့ၤ, ပှၤမၤန့ၢ်ပှၤသံကလၤမ့ၢ်ဂ့ၤ, ပှၤမဲာ်ထံၣ်ဝံမ့ၢ်ဂ့ၤ, ပှၤလၢအသံကွၢ်တၢ်လၢပှၤသံမ့ၢ်ဂ့ၤ, တဘၣ်အိၣ်လၢသုကျါဘၣ်. အဂ့ၢ်ဒ်အံၤ, ကယဲၢ်ပှၤလၢအမၤတၢ်တဖၣ်န့ၣ် မ့ၢ်ယွၤအတၢ်သးဘၣ်အၢလီၤ.”—၅ မိၤၡ့ ၁၈:၁၀-၁၂.
