In tzaj tqʼamaʼn astrología qa at kyoklen cheʼw, aju Xjaw ex qe planeta tiʼj kyanqʼibʼil xjal. In tzaj kyqʼamaʼn xnaqʼtzal kyiʼj cheʼw, qa aju jatumel ateʼqe cheʼw ex qe planeta aj tul itzʼj jun kʼwaʼl, in tzaj kyyekʼin jlu tzeʼn tmod kʼwaʼl ktel ex tiʼ kbʼajel tiʼj toj ambʼil tzul.

Maske atz tzajni xnaqʼtzbʼil kyiʼj cheʼw toj ojtxe tnam Babilonia, kukx in najbʼen kyuʼn xjal toj ambʼil jaʼlo tuʼn tel kynikʼ tiʼj tiʼ kbʼajel toj ambʼil tzul. Toj 2012 xi qanin xjel kye junjun xjal atz Estados Unidos ex tzaj tyekʼin jlu qa tiʼj oxe xjal at jun in xi tnimen qa aju xnaqʼtzbʼil kyiʼj cheʼw «at toklen tukʼil ciencia», ex jun 10% tqʼama qa jun «ciencia» jlu. ¿Axpe tok jlu? Miʼn. Qo xnaqʼtzan tiʼj.

• Mintiʼ kyoklen cheʼw nix qe planeta tiʼj kyanqʼibʼil xjal ik tzeʼn in tzaj kyqʼamaʼn xnaqʼtzal kyiʼj cheʼw.

• Chʼixme tkyaqilju in tzaj qʼamaʼn tiʼjju kbʼajel toj ambʼil tzul jaku japun twiʼ tiʼj alkyexku xjal.

• Toj ambʼil jaʼlo kukx in jatz kyiʼn xnaqʼtzal kyiʼj cheʼw tajlal tiʼj ojtxe xnaqʼtzbʼil qa tiʼj Txʼotxʼ in che sutin qe planeta, ex nya ik tten, sino tiʼj Qʼij in che sutin.

• Mintiʼ in mojeʼ twiʼ kyyol qe xnaqʼtzal kyiʼj cheʼw aj t-xi kyqʼamaʼn tiʼ kbʼajel tiʼj jun xjal.

• Aju xnaqʼtzbʼil kyiʼj cheʼw in kubʼ tqʼoʼn qe xjal toj 12 kʼloj moqa signo del Zodiaco ik tzeʼnx tajlal qʼij tej kyul itzʼj. Pero, tuʼnju o tzikʼ nim syent abʼqʼi o chʼexpaj ttembʼil Txʼotxʼ, aju tajlal qʼij tok tiʼj junjun techel Zodiaco ya mintiʼ toklen tukʼil ambʼil aj tikʼ Qʼij jatumel ateʼqe kʼloj cheʼw ok qʼoʼn kybʼi tiʼj.

In kubʼ ximet qa kyuʼn techel Zodiaco in nel nikʼbʼaj tiʼj tzeʼnxix jun xjal, noqtzun tuʼnj, junxitl tmod jun xjal in nul itzʼj tukʼil juntl in nul itzʼj toj ax tajlal qʼij. Mintiʼ in tzaj qʼamaʼn tzeʼnxix tmod jun xjal tuʼn qʼij tej tul itzʼj. Mintiʼ in nok kykeʼyin xnaqʼtzal kyiʼj cheʼw tzeʼnxix xjal ex tzeʼn tmod, sino noq in kubʼ kyximen qa ik tmod jun xjal. ¿Nyape jun ikʼbʼil jlu tiʼj xjal?

Atxix toj ambʼil ojtxe, kukx in cheʼx xjal qanil kyxjel kyukʼil chman. Ateʼ junjun in jaw «kyuʼjin» tiʼ kbʼajel tiʼj jun xjal aj tbʼaj kyxnaqʼtzaʼn aju toj kykʼuʼj xjal moqa toj kykʼuʼj txkup, moqa tiʼjju tzeʼn in xi kywaʼn tzekʼ kywa. Atzun junjuntl atz in nok kykeʼyin tiʼj tilbʼilal ttxa café moqa té in kyaj ten t-xe vas. Toj ambʼil jaʼlo in najbʼen junjuntl tumel kyuʼn xjal, ik tzeʼn cartas del tarot, aju bola de cristal moqa aʼyeju dado. ¿Jakupe tzʼok qeʼ qkʼuʼj tiʼj adivinación? Mlay. Qo xnaqʼtzan tiʼj.

Kʼelel qnikʼ tiʼj qa mintiʼ in mojeʼ twiʼ kyyol. Aju in tzaj tqʼamaʼn jun junxitl in tzaj tqʼamaʼn juntl, ik tzeʼn qa ax tten adivinación in najbʼen kyuʼn ex qa junxitl. Jun techel, qa ma txi tqanin jun xjal tiʼ kbʼajel tiʼj toj ambʼil tzul kye kabʼe adivino, ex qa aʼyex carta xjaw «kyuʼjin», jaku kubʼ ximet qa ax tzaqʼwebʼil tzul kyqʼoʼn, pero junxitl in tzaj kyqʼamaʼn.

In jawje kykʼuʼj xjal tiʼjju tten in bʼant kyuʼn ex tiquʼn in bʼant kyuʼn. In kyqʼamaʼn junjun xjal qa ax tok in jaw «kyuʼjin» adivino aju kymod xjal ex qa noq in najbʼen carta ex bola de cristal te jun techel. Jun techel, ateʼ junjun adivino at nim kyojtzqibʼil in xi kyqanin xjel kye xjal ex tok kywiʼ tiʼj tzaqʼwebʼil tzul kyqʼoʼn tukʼil yol ex kymod. Yajxitl, in najbʼen ax tqanil lu kyuʼn mer ik tzeʼn otoq tzʼel kynikʼ tiʼj, maske ax xjal otoq txi qʼonte tqanil kye. Aj tel kynikʼ xjal kyiʼj, in che pon kyukʼil ex in che kambʼan nim pwaq.

Aju xnaqʼtzbʼil kyiʼj cheʼw ex aju adivinación in tzaj tqʼamaʼn qa ya ojtzqiʼn tiʼ kbʼajel qiʼj toj ambʼil tzul. ¿Axpe tok jlu? In tzaj tqʼamaʼn Tyol Dios qa jaku jaw qjyoʼn tiʼ kxel qnimen moqa tiʼ kbʼantel quʼn, ex qa aju kjawil qjyoʼn at toklen tukʼil ambʼil tzul (Josué 24:15).

Aʼyeju xjal kyaj tuʼn ttzalaj Dios kyuʼn, at juntl tiquʼn kʼelel kyikʼun xnaqʼtzbʼil kyiʼj cheʼw ex adivinación: tkyaqil wiq bʼinchbʼen lu ikʼun tuʼn Dios. In tzaj tqʼamaʼn Xjan Uʼj jlu: «Mi jun kyeye [...] tuʼn tbʼant tqʼijin, mi jun tzʼok tqʼoʼn tibʼ qʼmalte alkye tzul te tibʼajxi, mi jun tuʼn tbʼant tkyʼaʼn, mi jun tuʼn tbʼant mañ tuʼn, mi jun tuʼn t-xi tqanin jun t-xjel kye aj qʼij ex mi kye qeju in tzaj kytxkoʼn kyanmi kyimni, ex mi jun tuʼn t-xi tqanin jun t-xjel kye kyimni. Porke ikʼun tuʼn Qman aju xjal in tbʼinchaʼn tkyaqil jlu, ex tuʼntzunju ikʼbʼilxix in kybʼinchaʼn qe nasyon lu, che elex tlajoʼn Qman Dios kywitze» (Deuteronomio 18:10-12).