Nopa astrología kiijtoua sitlalimej, metstli uan planetas uelis kinextisej tlake panos ipan ininnemilis maseualmej. Inijuantij kiijtouaj kej motejtekpantok sitlalimej kema tlakati se pilkonetsi uelis kinextis kenijkatsa elis uan tlake kipanos.

Maske babiloniaeuanij kipeualtijkej nopa, ipan ni tonali nojua motekiuia nopa astrología. Ipan 2012, ne Estados Unidos kintlajtlanijkej maseualmej tlake moiljuiyayaj, uan se tlen eyij maseualmej kiijtojkej nopa astrología “kejuak eliskia ciencia”, uan se 10% kiijtojkej nelia eliyaya “ciencia”. ¿Nelia tlen moiljuiaj? Amo. Ma tikitakaj kenke.

• Nopa planetas uan sitlalimej amo kinextia tlake panos ipan ininnemilis maseualmej.

• Tlen kiijtouaj kipanos se akajya nojkia uelis kipanos aki ueli maseuali.

• Maske ipan ni tonali tijmatij nochi planetas kiyaualouaj Tonati, nopa astrólogos nojua moyakanaj ika tlen uejkajkia kineltokayayaj pampa moiljuiyayaj planetas kiyaualouaj Tlaltipaktli.

• Kema se astrólogo kiiljuia se maseuali tlen kipanos teipa amo eli sanse ika tlen kiiljuia seyok astrólogo.

• Nopa astrología kinxeloua maseualmej ipan 12 signos tlen Zodiaco, kimatij tlake signo kipiaj kema kiitaj ipan tlake tonali tlakatkej. Maske kiampa kichiuaj, ipan nochi nopa xiuitl tlen panotok, ni Tlaltipaktli ayokmo eltok kampa uejkajkia eltoya uan yeka nama nopa tonali tlen nopa signos tlen ika kintokaxtlalijtokej sitlalimej ayokmo monamiki ika Tonati pampa nojkia moyaualojtia.

Maske miakej moiljuiaj nopa signos tlen Zodiaco kinextia kenijkatsa elis se maseuali, nopa amo nelia, pampa miakej maseualmej katli tlakatkej ipan sanse tonali amo sanse elij. Nopa tonali kema tlakati se akajya amo kinextia kenijkatsa elis. Uajka, nopa astrólogos amo kiitaj kenijkatsa nelnelia eli se maseuali, inijuantij san moiljuiaj kenijkatsa eli, kiampa kinextiaj nojkia techikoitaj.

Maseualmej ipa kintlajtlanijtokej katli tlamatij tlake panos teipa. Uejkajkia, maseualmej kitlachiliyayaj tlen eltok ipan iijtiko se maseuali o se tlapiali, o kiitayayaj kenijkatsa se kuapelech kitsatsakatsayaya tlen kikuaskia, kiampa kinekiyayaj kimatisej tlen panos teipa. Uan sekinok kiijtouayayaj tlen panoskia teipa ika kafe o té itetejtso. Uan ipan ni tonali kitekiuiaj nopa cartas del tarot, bola de cristal o dados. ¿Nelia melauak tlen kiijtouaj katli tlamatij? Amo. ¿Kenke tikijtouaj nopa?

Ma tikitakaj kenke amo nelia tlen kiijtouaj. Maske katli tlamatij kitekiuiaj sanse tlamantli o seyok tlamantli, tlen kiijtouaj amo eli sanse. Ma timoiljuikaj ipan se maseuali katli kineki kimatis tlake panos ipan inemilis. Tlaj kintlajtlaniskia omej katli tlamatij, kinamikiskia ma kiiljuikaj sanse tlamantli. Maske ya nopa kinamikiskia, tlen kiiljuiaj amo eli sanse.

Miakej amo motemachiaj ipan tlen kichiuaj katli tlamatij. Sekij kiijtouaj katli tlamatij san kiitaj tlake kichiua o kiijtoua se maseuali, uan nopa cartas uan bolas de cristal kitekiuiaj pampa kinekij ma kinneltokakaj. Sekij katli tlamatij kintlajtlaniaj maseualmej se keski tlamantli uan kuali kintlakakiliaj kema kinnankiliaj uan nojkia kiitaj tlen nesi ipan ininixayak. Teipa tlachiuaj kejuak nelia kimatkej se keski tlamantli, maske elki nopa maseuali katli kiniljuik tlake moiljuia o kipano. Kiampa, kema se maseuali motemachia ipan inijuantij, tlauel patiyo kiinamaj.

Katli tlamatij uan nopa astrólogos moiljuiaj kejuak ya ijkuilijtok nochi tlen techpanos. ¿Nelia tlen moiljuiaj? Biblia kiijtoua tojuantij uelis tijtlapejpenisej tlake tijneltokasej uan tlake tijchiuasej, uan tlen tijtlapejpenisej tijchiuasej, kichiuas teipa kuali ma tiitstokaj o amo (Josué 24:15).

Katli kinekij kiyolpakiltisej toTeotsij amo kitekiuiaj astrología yon yauij kinitaj katli tlamatij pampa kimajtokej toTeotsij kinkualankaita katli kichiuaj nopa. Biblia kiijtoua: “Axkema xiakaj ika se tlen tetonalita, o tlen teiljuia tlen onkas teipa, o tlen tlamati, niyon ika se tlen tetlajchiuia. “Axkema xiakaj ika se tlen teuiuichiua, niyon tlen tekiti ika magia, niyon tlen kinnojnotsa ajakamej o tlen miktokej. ToTeko [Jehová] a tlauel kinkualankaita tlen kichiuaj nochi ni tlamantli, niyon axkineki kinitas” (Deuteronomio 18:10-12).