Sitalixmatinij kijtouaj ke sitalimej, metsti uan planetas senkis kinextiaj keniuj yeski tonemilis. Nejin sitalixmatinij kijtouaj ke kemej moajsij sitalimej ijkuak yoli se konetsin, kiixnextia keniuj tamatis uan tein kipanos itech inemilis.

Maski nochi tein mouika iuan sitalixmatinij ualeujtok itech ne uejkauj altepet Babilonia, axkan miakej kisentokaj kitekitiltiaj. Miakej kineltokaj tein kijtouaj sitalixmatinij. Sayoj ke ¿yekmelauj uelis tikneltokaskej tein kijtouaj? Amo. Maj tikitakan keyej.

• Sitalimej uan planetas amo uelij kinextiaj keniuj yeski tonemilis, ijkon kemej kijtouaj sitalixmatinij.

• Miakpa tein kijtouaj ke kipanos aksa no uelis kipanos akin yeski.

• Keman taixejekouaj sitalixmatinij moyekanaj ika tein ne uejkauj kineltokayaj ke planetas momalakachojtokej uan taltikpak moajsi tatajko. Sayoj ke tein melauj tein moajsi tatajko yejua tonaltsin.

• Tataman sitalixmatinij moixnamikij keman kijtouaj tein kipanos aksa.

Miakej kineltokaj ke signos del Zodiaco kinextiaj keniuj yeski aksa, sayoj ke tein melauj akin yolinij itech se tonal semi tatamamej. Tonal keman yoli aksa amo kiixnextia keniuj tamatis. Sitalixmatinij kijtouaj keniuj tamati aksa sayoj ika tein kiitaj, amo porin kiixmatij keniuj yekmelauj tamati uan keniuj monejnemiltia. ¿Amo kinextia nejon se taman tachikoitalis?

Ne uejkauj uan hasta axkan, miakej kintemouanij naualmej maj kiniluikan tein panos satepan. Sekin “kiitayaj” tein panos satepan ika tein kipia iijtik aksa oso se tapial, oso kemej se pio kititipitsa taol. Oksekin kiixejekouayaj tein panos satepan ika tein mokauaya itech se taza tein kipiaya té oso café. Axkan kitekitiltiaj okseki taman, kemej barajas, bola de cristal oso dados. Sayoj ke ¿uelis se takuaujtamatis itech nejon? Amo. Maj tikitakan keyej.

Maj tikitakan keniuj moixnamiki tein kijtouaj. Miakpa panoua nejon, maski naualmej kitekitiltiskej sayoj se taman oso okseki taman. Komo aksa kintajtania omen naualmej tein kipanos satepan uan yejuan kitekitiltiaj barajas, taixejekol maj kijtokan sayoj se taman, sayoj ke miakpa amo ijkon panoua.

Miakej kijtouaj ke ika tein kichiuaj sayoj takajkayauaj. Sekin kijtouaj ke sayoj “kiitaj” tein kichiua akin tajtani teisa uan ke barajas uan bolas de cristal sayoj ika kichiuaj maj kuali moita kampa tekitij. Sekin kichiuaj miak netajtanilmej uan kiitaj keniuj tanankilia uan tein nesi itech iixko akin kineki kimatis tein kipanos satepan. Ompa tajtoua kemej yeskia kimatik tein kipanos satepan maski tein melauj yejua kiluij. Uan keman kitaneltoktiaj aksa, kitanij miak tomin.

Sitalixmatinij uan naualmej kineltokaj ke tein techpanos satepan ijkuiliujtokya. ¿Melauak nejon? Biblia kijtoua ke uelis tikixpejpenaskej toni tikneltokaskej oso toni tikchiuaskej uan ke tein tikixpejpenaskej techpaleuis oso techijtakos satepan (Josué 24:15).

Moajsi okse taman tein kichiua maj akin kinekij kiyolpaktiskej Dios kiixtopeuakan tein kichiuaj sitalixmatinij uan naualmej: yejuatsin kitauelita nejon tachiualismej. Biblia kijtoua: “Amo moneki moajsis mouan se aksa akin [...] momachtia kiixejekos toni mochiuas satepan, akin ika naualot kijtoua maj mochiua teisa, nion akin momachtia kitemos teisa tein kinextis tein mochiuas satepan, nion aksa akin tenaualuijkej, nion akin techiualtia ika naualot tein kinekis, nion akin kiitati aksa akin tajtoua iniuan espíritus oso akin ueli kijtoua tein amo akin kimati, nion aksa akin kintatajtania mikemej. Porin Jiova a amo kiitstani akin kichiuaj nochi nejin” (Deuteronomio 18:10-12).