Yádiłhił biyiʼdi dah naaznilígíí bee náasdi kóhootʼée dooleeł daaníigo yaa chʼídahwiiʼaahii éí astrologers daolyé. Éí łaʼ tsʼídá haashı̨́ı̨́ tʼéé góneʼ dah yiltsʼiʼgo áádóó éí ákweʼé nahalzhiishgo łaʼda biʼdichíihgo éí ájítʼéii índa hoł áhootʼée dooleełgi yee há nahaʼáá, daaní.

Azhą́ shı̨́ı̨́ Bábilan hoolyéé ńtʼéeʼdi astrology bee hahoolzhiizh ndi, tʼahdii ląʼí chodayoołʼı̨́. Éí ląʼí diné díí astrologers kóhodoonííł daaníigi dayoodlą́. Ndi ákoósh nihí éí díí badaʼííníidlíi doo? Ndagaʼ. Díí biniinaa.

• Yádiłhił biyiʼdi dah naaznilígíí éí astrologers ádaaníigo bílaʼashdlaʼii neiloʼ, ndi éí doo haitʼéegoda bílaʼashdlaʼii neiloʼ da.

• Díí kóhodoonííł haʼníigo doo hazhóʼó bééhózin da, áádóó łah átʼéego bikʼidiʼdootı̨́ı̨́ł.

• Astrologers éí tʼáá ałkʼidą́ą́ʼ woodlánę́ę éí planets tʼáá átʼé nahasdzáán yinídeíkááh haʼnínę́ęgi yikʼehgo nitsídaakees. Ndi nihił béédahózingo éí díí doo ákótʼée da.

• Díkwíida astrologers éí tʼááłaʼ nizhdiltʼéhígíí nichʼįʼ kóhodoonííł deiłníigo doo tʼáá ahehoołtʼéégóó díí diné yichʼįʼ chʼídahaʼááh.

• Astrology éí yoołkááł nidahoʼdiichííh góneʼígíí bee dah níjizhjaaʼgo ádeileʼ. Éí tʼáá ałkʼidą́ą́ʼ sǫʼ bikʼehgo wóltaʼ yę́ę chodayoołʼı̨́įgo éí zodiac wolyéego tʼááłaʼí jinítínígo bee hwéédahoʼdílzin. Ndi díí ałkʼidą́ą́ʼ sǫʼ bikʼehgo éʼélyaa yę́ę éí kʼad nahasdzáán doo bikʼehgo siʼą́ą da. Áko zodiac wolyée índa sǫʼ dahnaazhjaaʼígíí yízhiʼ bee dabiʼdójí yę́ę kʼad doo aheełtʼéego bee daójíi da.

Zodiac ił halneʼgo éí ájítʼéii dooleełgi hoł ííshjání ííłʼı̨́ haʼní. Ákondi diné éí náhidizídígíí bikʼehgo biiʼ ałhąąh nidahoʼdiizhchínígíí éí doo ahedajíłtʼée da; hoʼdizhchı̨́ı̨́ góneʼígíí éí hániʼ átʼéegi doo bee hahoʼdilnéeh da. Diné íiyisíí átʼéegi bee dazhnéłʼı̨́į dooleeł yę́ę niʼ, astrologers éí diné áátʼįįłgi índa baʼátʼeʼda yee deinéłʼı̨́. Díísh éí ałʼohgo aa nitsáhákeesii átʼé?

Tʼáá níléí ałkʼidą́ą́ʼ diné éí fortune-tellers chodayoołʼı̨́. Díí fortune-tellers éí naaldeehii bitsą́ siláii, doodaiiʼ naaʼahóóhai bikąʼí éí naadą́ą́ʼ néiniłtąshgi haʼátʼíí áhyiłníigi yíká dadéezʼı̨́ı̨́ʼ. Łaʼ éí dééh bitʼąąʼ doodaiiʼ ahwééh yikʼánígíí ánoolingi deinéłʼı̨́įgo bikʼehgo kóhodoonííł daaní. Dííshjı̨́įdi tarot cards, déestʼı̨́ı̨́ʼ, dice, áádóó ałʼąą ádaatʼéii yee “dayółtaʼgo” diné nichʼįʼ kóhodoonííł lá, deiłní. Fortune-telling baʼahódlíígóósh álą́ąjįʼ áhootʼée dooleełgi bee ééhózin? Ndagaʼ. Díí hazhóʼó baa nídadíitʼįįł.

Fortune-tellers danílínígíí éí ałkʼijįʼ ádaʼałʼı̨́. Tʼáá ahehoołtʼé haʼníigi baa nitsíníkees. Azhą́ tʼáá łaʼígíí bee nidahojiłáa ndi, doo aheełtʼéégóó diné yichʼįʼ chʼídahwiiʼaah. Łaʼda éí naaki fortune-tellers tʼáá łaʼígíí bínabízhdééłkidgo áádóó tʼáá łaʼígíí cards choyoołʼínígíí bitsʼą́ą́dóó “wóltaʼgo” tʼáá aheełtʼéego bee ił nahozhdoolnih ńtʼééʼ. Ndi éí doo ákódaatʼée da łeh.

Fortune-tellers nidahałáagi éí kʼad baa ayahoolni. Łaʼ ádaaníigo éí cards chooʼı̨́įgi dóó déestʼı̨́ı̨́ʼ ádaatʼéii tʼóó bedaʼalyaa. Fortune-tellers ayóó dayiichįįhígíí éí ndaʼídíłkidgo áádóó hazhóʼó haʼasíidgo diné átʼéiigi yaa ákoniizı̨́ı̨́ʼ. Fortune-tellers łaʼ éí díí tʼáá íídą́ą́ʼ bił hóoneʼígíí binahjįʼ éidí shił bééhózin áhóótʼįįdgi daaniih. Áádóó díí diné bił hoolneʼígíí boodląąhgo, díí áníłʼı̨́ı̨́ lá deiłníigo béeso ląʼí yídayókiʼ.

Díí astrology dóó fortune-telling baa ooldahgo éí áníigo tʼáá íídą́ą́ʼ nihilą́ąjįʼ nihá nidahwiistʼą́. Díísh éí tʼáá aaníí? Diyin Bizaad áníigo éí deinohdlą́ą dooleełígíí índa ádá ádadoolníiłii tʼáá nihí bee ádá nidahodiyohʼaah. Áko éí náasdi tʼáá nihí niheʼiinaʼ bił ahídéétʼiʼgo átʼée doo.​—Joshua 24:15.

God deidósinii éí astrology dóó fortune-telling yitsʼąą ádaatʼé, háálá God éí áhodooníiłii nideiłkaahii tsʼídá tʼáá ałtso bichʼįʼ choʼooʼı̨́į doogo tsʼídá doo yee hasʼą́ą da. Diyin Bizaad áníigo éí: “Nihitahgóó . . . tʼááká łaʼda nidadilniihii choyoołʼı̨́ yíilaʼ; tʼááká łaʼda áhodooníiłii neiłkaah yíilaʼ; tʼááká łaʼda ihondzin yaa chʼíhwiiʼaah yíilaʼ; tʼááká łaʼda adigąsh yaa naaghá yíilaʼ; tʼááká łaʼda biʼiiníziin yíilaʼ; tʼááká łaʼda chʼı̨́įdii yábiiłtiʼ yíilaʼ; tʼááká łaʼda álíleego níłchʼi yee haniih yíilaʼ; tʼááká łaʼda chʼı̨́įdii yił ałchʼįʼ yáłtiʼ yíilaʼ. Kódaatʼéii baa dajíkáhígíí tʼáá ádzíłtso Bóhólníihii doo hółdin da.”​—Deuteronomy 18:10-12.