Astrologiata yachajcunaca, “Luna, estrellacuna, planetacunapish gentecunapaj causaipica ayudanmi” nincunami. Por ejemplo, shuj huahua ima shina canata, ima tucunata yachangapaj nishpami estrellacunata, planetacunatapish maipi cashcata ricuncuna.

Ñaupa Babilonia llajtapica ima tucunata yachangapajmi estrellacunata ricujcuna carca. Gentecunaca cunanpish chashnallatajmi rurashpa catincuna. 2012 huatapi, Estados Unidos llajtapica ‘¿astrologiaca imataj can?’ nishpami gentecunata tapurcacuna. Quimsa gentecunamantaca shujca, “cienciami yuyachin” nircami. Cutin shujtajcunaca “shuj cienciami can” nircacunami. Pero mana chashnachu can. ¿Imamantataj chashna ninchij?

• Estrellacunapish planetacunapish gentecunapaj causaipica mana ayudanchu, mana llaquichinchu. Astrologocuna nishcacunaca mana ciertochu can.

• Astrologocunaca mana achij yuyaicunata huillancunachu. Paicuna nishcacunaca tucui gentecunapaj cashca layami ricurin.

• Ñaupa punllacunapica “planetacunaca cai Allpatami muyucun” nijcunami carca. Chaica mana ciertochu can. Planetacunaca Intitami muyun. Astrologocunaca ñaupa panda yuyaicunata catishpami ima tucunata huillashpa catincuna.

• Astrologocunaca paicunapurallataj mana de acuerdo cancunachu. Chꞌican chꞌican yuyaicunatami charincuna.

Ishqui runacuna chai punllallataj huacharishca cashpapish chꞌican chꞌicanmi cancuna. Shinapish maijancunaca shuj runata alli rijsishpa imatapish ningapaj randica horóscopo nishcapi ima signota charishcata ricushpallami ima shina cashcata nincuna. ¿Chaica allichu canga?

Ñaupa punllacunamantami gentecunaca ima tucunata yachangapajca adivinocunata mashcashcacuna. Adivinocunaca animalcunapaj riñoncunapi, ima shina granota gallo chꞌupijta ricushpa, cafeta ubyacushpa tazapi siquiyashcata ricushpami ima tucunata huillajcuna carca. Cunan punllacunapi adivinajcunaca cuyita, velata, lulunta utilizashpami ima tucunata ricuncuna. ¿Chai adivinajcunataca crinachu canchij? Mana. Imamanta mana crina cashcata yachangapaj huaquin yuyaicunata ricushun.

Adivinajcunaca mana de acuerdo cancunachu. Por ejemplo, shuj runa “¿shamuj punllacunapica ima shinashi causasha?” nishpa ishqui adivinajcunata tapujpica, paicuna cuyipi ricushpapish mana chaillatataj nincunachu.

Maijancunaca adivinocuna nishcataca mana crincunachu. Paicunaca “ñahuita ricushpalla, ima nijta uyashpallami, adivinaj tucuncuna. Cuyitapish, velatapish chaicunapi ricuj shina cangapajllami utilizancuna” nincunami. Por ejemplo, achca adivinajcunaca tapuicunata rurashpa, ima shina contestajta ricushpallami “caimi o chaimi tucugringui” nishpa ciertota laya nincuna. Adivinajcunaca llullacunata nishpami gentecunataca achca cullquita llujchishcacuna.

Astrologocuna, adivinajcunaca “ñucanchij causaica ña destinashcami can” nincunami. Pero Bibliapica alli decisioncunata agllashpaca allimi causashun, cutin mana alli agllashpaca llaquicunatami charishun nishpami yachachin. Shinallataj cada unomi imata crinata, imata ruranatapish agllai tucunchij ninmi (Josué 24:15).

Diosca astrologocuna, adivinajcuna nishcapi crichunca mana munanchu. Shinaca, Diospaj ñaupajpi alli ricurisha nishpaca chai ruraicunamantami caruyana canchij. Bibliapica: ‘Cancunapuramanta maijanpish adivinaj canata, brujo canata, yumbu canata, muspachij canata yachashpa rurajcunaca ama tiyachun. Muspachij yumbupish, adivinajpish, ima shinapish muspachijpish, huañushcacunata tapujpish ama tiyachun. Maijanpish chashna rurajcunaca Mandaj Diospajca millananami’ ninmi (Deuteronomio 18:10-12).