Astrologocunaca ninmi, Lunapash, estrellacunapash, planetacunapashmi huahuacuna nacirijpica, paicuna imashina canata, jipacunaman ima tucunatapash ricuchin nishpa.

Astrologocunaca punda tiempo Babilonia llactamanda cunangamanmi tiashca. Ashtaca gentecunami astrologocunapi, paicuna imata nishcacunapipash crin. Shinapash ¿chaicunapi confiaita ushanchichu? Na. Ricupashun imamandami na confiaita ushapanchi.

• Estrellacuna, planetacunaca gentecunapa causai imashina canataca na ricuchita ushanllu.

• Ima pasanata villashpapash, cada uno imapacha tucunataca na nita ushanllu.

• Punda astrologocunaca, ñucanchi bola Alpatami planetacunaca muyujun yashpami, imatapash calculashpa ima pasanata nin carca. Cunanbi astrologocunapash chaitallatami ruran. Shinapash, planetacunaca na ñucanchi bola Alpata muyujunllu, Inditami muyujun.

• Ima pasanata villashpaca, shuj astrologoca shujtami nin, cutin shuj astrologoca shujtami nin.

• Astrologocunaca ninmi, ima fechapi nacirishcapimi estrellacuna, planetacunaca gentecuna imashina canata ricuchin nishpa. Shinapash, chai fechapillata nacirishca cashpapash, gentecunaca na igual canllu. Ñucanchi fecha de nacimientoca, ñucanchicuna imashina canataca na ricuchinllu. Gentecuna imashina portarijta ricunapa randica, planetacunata, estrellacunata ricushpami astrologocunaca gentecuna imashina cajta nin. Napash rijsishpata gentecuna imashina cajta ninaca ¿alichu canman?

Pundamandapachami gentecunaca adivino nishcacunapaman rin cashca. Huaquingunaca gentecunapa, animalcunapa chunllulicunapi ricushpa, o granocunata gallocuna imashina pi cajta ricushpami, ima pasanata ricungapaj munan carca. Cutin shujcunaca, cafeta ufiashca tazapi, o té yacuta ufiashca tazapi ashaguta puchuchishpa, chaipi ima dibujocuna tucujta ricushpami ima pasanata nin carca. Cunanbipash barajacunapi, espermacunapi, tabacocunapimi ima pasanata ricunchi nin. Shinapash ¿chaicunapi confiaita ushapanchichu? Na. Ricupashun imamandami na confiaita ushapanchi.

Adivinocunaca na tucuicunachu igualta nin. Shuj shuj cosascunapi ricushpapash, o tabacopilla, espermapilla ricushpapash na chaitallata nita ushanllu. Shuj ejemplota ricupashun. Barajacunapi ricunata yachaj ishcai adivinocunapaman rijpica ishcandillata chaitallata nitaca na ushanllu.

Huaquin gentecunacarin ninmi, adivinocunaca gentecuna ima nijta, imashina nijta ricushpami chai gentecunaman ima pasanata nin, barajacuna, espermacunaca yanga adornocunallami can nishpa. Shuj ejemplota ricupashun. Estudiashca adivinocunaca, gentecuna imashina contestajta ali ali ricungapami tauca tapuicunata ruran. Shinami adivinocunaca gentecuna na cuenta japijta, gentecuna imata nishcatallata paicuna adivinashcashnalla nin. Gentecunata crichishpaca ashtaca culquitami ganan.

Astrologocunapash, adivinocunapash ninmi, gentecunapa causaipi ima pasanataca ñami escribishca tiajun nishpa. Shinapash ¿ciertochu can? Bibliapica ninmi, gentecunallatami imata crinata, imata ruranata agllaita ushan. Chai agllashca decisiongunamandami jipamanga ali causan o nali causan nishpa (Josué 24:15).

Bibliapica ninmi: ‘Cangunapurapica yachaj cangapaj, brujo cangapaj, jipa punlla ima tucunata yachaj cangapaj, yumbu cangapaj yachajuj runapash na tianachu. Ayacunata mañaj canata, huañushcacunata tapuj canata yachajuj runapash na tianachu. Chashna nalicunata ruranaca, Mandaj Diospa a ñaupajpica millanayaimi’ can nishpa (Deuteronomio 18:10-12).