Ayyaanto beeddahe, aganunna pilaaneetta uullate aana noo manna kaaˈlitara woy gawajjitara dandiitanno yite ammantannoreeti. Ayyaanto mittu manchi ilamanno woyite kuri gordu bissa ofoltino gari, hakko manchira akattasinna albillittete heeshshosi seekkanno woy bushshanno gede assitara dandiitanno yite heddanno. Ayyaanto amaaˈla hunda Baabiloonete hanaffinoha ikkirono, xaano mannu baxanno coye ikkitino. Ameerikaho 2012nni xiinxallinoonni xiinxallo leellishshanno garinni, sasu manchi giddo mittu ayyaanto “sayinse labbanno” yee hedanno; tonne anga ikkannohu qole ayyaanto “woˈmunni woˈma sayinsete” yee ammananno. Addanka ayyaanto sayinseteni? Deeˈni. Hanni togo yineemmohu mayiraatiro laˈno.

• Ayyaanto yitanno garinni, pilaaneettanna beeddahe mannu ooso akattanna albillittete heeshshonsa seekkanno woy bushshanno gede assa didandiitanno.

• Duucha woyite ayyaantote masaalo aye manchi aanano woˈmitara dandiitanno yine hendannite.

• Xaa yannara noo ayyaanto harunsitannohu, biˈre pilaaneetta baattote qooxeessira doyitanno yine ammannanni hedooti. Kayinni pilaaneetta doyitannohu arrishshote qooxeessiraati ikkinninna baattote qooxeessira diˈˈikkino.

• Addi addi ayyaanto mittu manchi daafira kultannori babbaxxinoreeti.

• Mitto barra ilamino mannira mittu gari akatta diheedhannonsa; mittu manchi ilamino barra laˈne ayimmasi daafira afa didandiinanni. Ayyaanto mitto mancho umosi dandiinohu gede assite laˈˈa agurte, uminsa hedonni kaˈe hakkonni manchi ayimma daafira coyidhanno. Ikkina tini manna mulla kaˈne giwate ledo mitte diˈˈikkitino?

Hundinni kayise, mannu kiilaano amaaˈlanni keeshshino. Mite kiilaano mitu coyi daafira afate saadatenna mannu hellee woy lukkichu guma xinqiˈranno gara laˈanno. Wole kiilaano qolte shae gafiˈnanni darora noo masimarra woy bunu atala laˈe kiiltanno. Xaa yannara kiilaano kiilu kaarde, kiristaalete kaasenna wolere togoore horoonsidhe mittu manchira albillitte iillannosire masaaltanno. Kiilaano albillittete daafira kultannori garahoni? Digaraho. Hanni togo yineemmohu mayiraatiro laˈno.

Kiilaano babbaxxitino hayyo horoonsidhe kiiltanno kiili duucha woyite isi isiniiwa sumuu diyaanno. Insa mittu gari hayyo horoonsidhe nafa kiilturo, yitannori babbaxxara dandaanno. Lawishshaho, mittu manchi lame kiilaano mittu garita kiilu kaarde horoonsidhe albillittete daafira kultasira xaˈmiro, mittu gari hedo coyiˈra hasiissannonsa. Ikkollana duucha woyite insa coyidhannori babbaxxinoreeti.

Kiilaanote hayyono ikko hedonsa huluullammanni gede assitannote. Mitu manni kiilaano horoonsidhanno kaardeno ikko wolu uduunnichi asse afannori dino yaanno. Kiilaano kiilate horoonsidhannohu kaarde woy wole uduunnicho ikkikkinni kiiˈlara marino manchi ikkitooti. Lawishshaho, fullakkino kiilaano kiiˈlara marino mancho xaˈmo xaˈmitanno, hattono hakku manchi coyiˈranno garanna ikkitosi seekkite wodanchite isi ayimma daafira afate woˈnaaltanno. Kiilaano, kiiˈlara marino manchi hedikkinni coyiˈrinorenna assinore laˈe, insa kiilte affinohu gede assite heddanno. Mite kiilaano konni garinni insawa kiiˈlanno manniwiinni lowo woxe gamba assidhanno.

Ayyaantonna kiilaano, mittu manchira albillitte iillannosire balanxe murroonni yitanno. Kayinni hatto yee heda garahoni? Digaraho. Korkaatuno Qullaawu Maxaafi, hasiˈnoommore uminke doodha dandiineemmotanna xaa doodhineemmo doorshi albillittete heeshshonke seekkanno woy bushshanno gede assara dandaannota kulanno.—Iyyaasu 24:15.

Magano magansiˈranno manni ayyaana layiˈratenna kiiluwiinni xeertiˈra hasiissannonsahu wolu korkaati, Isi baalunku gariha agaanintete looso giwanno daafiraati. Qullaawu Maxaafi togo yaanno: “Kiilaanchu, bitaamu, moora laˈˈannohu, qaallichu, woy gojaamu, golfa woshshannohunna ekera hasaawisannohu giddoˈne horontanni heeˈroonke. Konne coye assannoha baalanka Kaaliiqi dibaxanno.”—Marro 18:10-12.