Ema uza astrolojia atu siʼik futuru hodi bazeia ba fitun, fulan, no planeta sira. Ema barak fiar katak buat sira-neʼe bele fó sai sira-nia futuru. Astrólogu sira hatete katak bainhira ema ida moris, fitun, fulan no planeta sira-nia pozisaun mak determina ema neʼe nia personalidade no futuru.

Astrolojia nia hun mak husi Babilónia antigu, no toʼo agora ema nafatin gosta ida-neʼe. Tuir peskiza ida husi Estadus Unidus iha tinan 2012, porsentu 33 husi ema neʼebé hola parte iha peskiza neʼe hanoin katak astrolojia “bazeia uitoan ba siénsia”, no porsentu 10 hatete katak ida-neʼe “bazeia duni ba siénsia”. Neʼe loos ka lae? Lae. Mai ita haree razaun tuirmai.

• Planeta no fitun sira la fó sai forsa ruma neʼebé determina ema nia moris.

• Baibain astrólogu sira siʼik buat neʼebé jerál, tan neʼe bele aplika ba ema naran deʼit.

• Astrolojia bazeia ba hanorin antigu neʼebé hatete katak planeta sira haleʼu mundu. Maibé tuir loloos planeta sira haleʼu loro-matan.

• Astrólogu ida-idak siʼik buat neʼebé la hanesan kona-ba ema ida nia futuru.

• Astrolojia fahe ema ba kategoria ka zodíaku 12, bazeia ba sira-nia data moris. Maibé tanba mundu ho fitun sira-nia pozisaun troka ona husi tempu uluk toʼo agora, data sira neʼebé uluk liga ho zodíaku, agora la iha ligasaun ona.

Ema barak fiar katak zodíaku bele esplika kona-ba ema ida nia hahalok. Maibé tuir loloos, maski ema balu moris iha data neʼebé hanesan, sira-nia hahalok la hanesan. Ema nia data moris labele fó sai ninia hahalok. Maibé astrólogu sira deside metin ema nia hahalok hodi bazeia deʼit ba zodíaku. Neʼe la justisa, loos ka lae?

Husi uluk kedas, ema toman atu husu matadalan ba siʼikdór sira. Ema balu buka-hatene kona-ba futuru liuhusi haree animál ka ema mate nia aten ka oinsá manu-aman ida han batar. Ema seluk buka-hatene kona-ba futuru liuhusi haree xá no kafé nia teen. Ohin loron, ema uza karta tarot, bola kristál, kurukuru, no buat seluk tan atu buka-hatene ema nia futuru. Ita bele tau fiar ba siʼikdór sira-nia liafuan kona-ba futuru ka lae? Lae duni. Mai ita haree razaun balu.

Baibain informasaun neʼebé siʼikdór sira fó sai kona-ba ema ida nia futuru mak kontra malu. Maski sira uza dalan neʼebé hanesan, sira fó sai buat neʼebé la hanesan. Porezemplu, se ema ida husu pergunta neʼebé hanesan kona-ba ninia futuru ba siʼikdór naʼin-rua neʼebé uza karta tarot, tuir loloos sira-nia resposta tenke hanesan, loos ka lae? Maibé baibain sira-nia resposta la hanesan.

Ita labele duni tau fiar ba siʼikdór sira-nia métodu no motivu. Ema balu hatete katak karta tarot no bola kristál mak sasán atu enfeita deʼit. Tuir loloos siʼikdór sira estuda didiʼak ema nia reasaun duké hetan sinál husi sasán sira-neʼe. Porezemplu, siʼikdór balu husu pergunta oioin no buka-hatene informasaun kona-ba ema neʼe liuhusi ema neʼe nia oin, dalan atu koʼalia, no dalan neʼebé ema neʼe book an. Tuirmai, siʼikdór sira finje katak sira hatene kona-ba ema neʼe nia situasaun moris. Siʼikdór balu hetan osan boot husi ema neʼebé tau fiar ba sira.

Astrólogu no siʼikdór sira hanorin katak ita-nia futuru deside nanis ona. Maibé neʼe loos ka lae? Bíblia hatete katak ita iha kbiit atu hili saida mak ita fiar ka saida mak ita hakarak atu halo no ita-nia desizaun sira sei kona duni ita-nia futuru.​—Josué 24:15.

Iha razaun seluk tan tanbasá mak ema neʼebé serbí Maromak la hola parte iha atividade astrolojia no siʼik futuru, tanba Maromak odi hahalok siʼik futuru hotu. Bíblia dehan: “Iha imi-nia leet labele iha . . . ema neʼebé siʼik futuru, ema neʼebé halo masonik, ema neʼebé buka sinál oioin atu siʼik futuru, matan-dook, ema neʼebé fekit ema seluk, ema neʼebé koko atu koʼalia ho ema mate ka husu ba ema neʼebé siʼik futuru, ka ema neʼebé husu ema mate. Tanba Jeová a hakribi ema neʼebé halo buat sira-neʼe.”​—Deuteronómio 18:10-12.