Gu sasula dzinyeledzi ndziya nya gu vhumbe khiyo yi seketedwago avba nya gu khodwe gu pwani dzinyeledzi, ni ngima, ni dziplaneta si ngu kuha ngudzu womi nya vathu mafuni. Vasasuli nya dzinyelezi vari khavo avbo dzinyeledzi dzi wonegago mwendro gu manega avbo tepo a velegwago muthu nyo khaguri si ngu kuha wuthu ni wumindru waye.

Ambari olu mavhumbelo yaya nya wumindru ma phedego Bhabhiloni wa gale, si ngu tidwa ni muhuno olu. Khu 2012 gu giridwe wugevisisi Estados Unidos nya gigaradzo gegi. Vambe vakona va nga wudziswa vari khavo gu sasula dzinyeledzi “ndziya nyo khaguri nya siyensiya;” vambe nya tanga nya 10 dzipursento va di khavo gusasula gogo “siyensiya kamo.” Lisine ilolo? Ahihi. Khu ginani?

• Dziplaneta ni dzinyeledzi dzi mwalo tshivba nyo gire gilogyo womini nya vathu kha nga esi si pimiswago khu vasasuli nya dzinyeledzi.

• Gutala nya dzitepo esi va si ganeyago si nga kuha vathu nya vangi, nasiri muthu moyo basi.

• Dzikalkulu dzi girwago muhuno khu gu thumisa dzinyeledzi, ni ngima, ni dziplaneta dzo seketedwa avba nya esi vathu va si khodwago khu gale ni gale nya gu dziplaneta dzi ngu dzulugeya mafu. Ganiolu, khu lisine dziplaneta dzi ngu dzulugeya lidambo.

• Esi si ganedwago khu vasasuli nyo hambane-hambane nya dzinyeledzi maningano ni wumindru nya muthu yoyo wa moyo kha si kotsani.

• Vasasuli nya dzinyeledzi va ngu kabanisa vathu khu 12 mitsawa, mwendro sithombe sa zodíaco, khu guya khu litshigu va nga velegwa khilo. Kha nga olu mafu ma vbindrugedzago wulangani wawo khu gugimbiya nya myaga, matshigu nya guvelegwe nya muthu ma pwananiswago ni sithombe sa zodíaco kha ma kotsani ni aya avba lidambo li vbindrago khayo ga dzinyeledzi edzi dzi nga thumiswa gasi gu si ninga malina.

Vari pwani sithombe sa zodíaco si ngu ninga mahemanyana nya makhalelo nya muthu a velegwago. Ganiolu, khu lisine vathu va velegwago khu litshigu la limwedo va mwalo makhalelo nyo fane; litshigu nya guvelegwe nya muthu kha li ganeyi gilo khu wuthu wa muthu yoyo. Wulangani nya gu wone muthu khu guya khu giemo gyaye, vasasuli nya dzineyeledzi vo dundrugeya mavbanyelo ni makhalelo nya muthu khu gu dhumba. Ina isoso khandri gu dundrugeya silo nyo vivbe khu vathu?

Gale ni gale, vathu vomo va wudziseya silo ga vavhumbi. Vavhumbi nyo khaguri vo vbweta mitshamuselo nya silo khu gu khedzakhedza mahembe nya vathu ni sirengo mwendro khu gu khedza edzi khonge wu rothago khidzo. Vambe va di gu dhumba wumindru khu gu khedza makhelelo nya mahagani nya tsaya mwendro makhalelo mafu ma bugisago kafe. Muhuno vo thumisa sibholana, dzisolo ni dzimbe dzindziya nyo vhumbe khidzi gasi “vati” wumindru nya muthu. Ina guvhumba ndziya nyo tumbege nya guti khiyo wumindru? Ahihi. Hongoleni hi dundrugeyani khesi:

Nga dundugeya khu mahungu nya gupwanane nya esi si ganedwago. Gutala nya dzitepo silo si ganedwago khu gu thumisa dzindziya nyo hambane-hambane nya guvhumbe khidzo kha si kotsani. Ambari vo thumisa ndziya ya yimweyo nyo vhumbe khiyo, esi va si ganeyago si ngu hambana. Khu giyeyedzo, muthu a gu gira giwudziso gyagimwegyo ga vavhumbi vavili va thumisago mavhumbelo nyo fane, o vireya gu khuye a mana mihlamulo nyo fane. Ganiolu, gutala nya dzitepo mihlamulo yi ngu hambana.

Dzindziya dzi thumiswago khu vavhumbi ni makungo yawe si ngu kanakanisa. Vathu nyo khaguri vari khavo sibholana ni simbe silo si thumiswago guvhumbani kha si phasi gilo; muvhumbi a gu khedza khovbe nya muthu wulangani nya silo soso. Khu giyeyedzo, muvhumbi nyo gengeye o gira siwudziso nyo olovelege a vbedza a khedza gwadi khovbe nya muthu ni esi a ganeyago gasi a mana gilo nyo mu embeye. Khu kharato, muvhumbi yoyo a gu tidwa kha nga muthu a tigo silo narigu esi a ganeyago a gu embedwa khu muthu wa moyo a dzudego gasi gu tati wumindru. Va gu ba vavhumbi vovo va vbohide avba nya gu va tumbwa ngudzu khu vathu, va gu hodza dzitsapawu nya dzingi ngudzu dza ava va hongolago va ya va wudzisa.

Gu sasudwa nya dzinyeledzi ni gu vhumba sa gu gira vathu va pimisa gu khavo wumindru wathu wu ngu tivega. Lisine isoso? Bhibhiliya yari khiyo ethu hi ngu kodza gu hatha esi hi vbwetago gu si khodwa mwendro esi hi vbwetago gu gira. Yi ngu ganeya gambe khiyo esi hi si hathago si ngu kuha wumindru wathu. — Josuwa 24:15.

Vakhozeyi va Nungungulu va na ni sighelo nya singi nya gu bombe gu sasula dzinyeledzi ni gu vhumba. Nungungulu a ngu nyenya mafumbu ni mafumbu nya gu sasule. Bhibhiliya yari khiyo: “A nga manegi vbakari gwanu ni moyo nya .  . .  guthumise wunyanga, ni gulola dzisolo, va nya gufemba ni wuloyi; nya gugire sisamadziso, va nya gutshwayina, va nya sikwembu, dzinyanga ni va nya guwudzisa vafi; kholu vatshavbo avo va na girago isoso, manyala ga PFHUMU Nungungulu, kholu khu kotani nya manyala nya nga aya, PFHUMU Nungungulu wago, tutumiside va nya mayigo mbeli gwago.” a — Dhewuteronome 18:10-12.