Astrología wan pi staku, papa’ chu planetas makgtanu kxlatamat latamanin. Astrólogos wankgo, pi chuna la wilakgo planetas akxni chatum skgata lakachin wan la nalikatsi chu tuku nakitaxtuni.

Maski astrología lakatsukulh kxamakgan Babilonia, la uku chuntiya maklakaskinkan. Encuesta nema tlawaka kʼEstados unidos kkata 2012 masiyalh pi chatum xlikgalhatutu tiku katlawanika takgalhskinin xkanajla pi astrología «xtachuna ciencia», chu 10% xlilhuwa wa pi «akgtum ciencia». ¿Pero xlikana uma? Ni. Kaʼakxilhwi tuku xlakata.

• Staku chu planetas nila makgtanukgo kxlatamatkan latamanin chuna la wankgo astrólogos.

• Min kilhtamaku tuku wankgo, tlan kakilhchani kaxatikawa latamanin.

• Tuku wankgo astrólogos chuntiya kilhtiyakgo tuku xamakgan xkanajlakan, pi planetas litakgalhstilitawilakgo Katiyatni, maski tuku xaxlikana, wa pi planetas litakgalhstilitawilakgo Chichini.

• Tuku wankgo tanu tanu astrólogos xlakata chatum lataman ni lakxtum.

• Astrología kamapitsi latamanin kʼakgkutiy signos xla Zodiaco chuna la kilhtamaku lakachilh. Pero chuna la titaxtunit kata, Katiyatni tatsuwitilhanit o talakxijtilhanit kʼakgapun, wa xlakata xfecha akgatunu signo nialh lakgchan kilhtamaku akxni Chichini titaxtu kconstelaciones nema xapulana chuna xkalimapakuwikan.

Kanajlakan pi signos xla Zodiaco wa tlawa tukuya tayat nakgalhi chatum lataman, pero tuku xaxlikana wa pi tiku lakachinkgonit watiya kilhtamaku ni lakxtum tayat kgalhikgo. Kilhtamaku akxni lakachilh chatum lataman ni kinkawaniyan tuku tayat nakgalhi. Astrólogos ni kaʼakxilhkgo latamanin chuna la xlikana likatsikgo, wata wankgo pi chatum lataman tlan o nitlan likatsi kaj xlakata chuna lakpuwankgo. Uma kilhchanima pi nitlan lichuwinankgo chatum lataman maski ni lakgapaskgo.

Lata makgasa, latamanin ankgalhin kgalhskinkgonit skgoyunanin. Makgapitsi skgoyunanin «xkatsiputunkgo» tuku aku nala akxni xʼakxilhkgo xpulaknikan latamanin o animales, o la xwa kuxi tantum puyu. Amakgapitsi xwankgo tuku xʼama lay akxni xʼakxilhkgo tuku xtamakgxtakga kxtampum xtaza cape o té. La uku atanu tuku tamaklakaskin, cartas xla tarot, bola xla cristal o dados. Pero ¿tlan lipawankan taskgoyun? Ni, ni para tsinu. Kaʼakxilhwi tuku xlakata.

Kaʼakxilhwi pi ni lakxtum tuku wankgo. Tiku wankgo tuku aku nala makglhuwa ni lakxtum tuku wankgo, maski watiya o tanu tanu tuku tamaklakaskin ktaskgoyun. Akgtum liʼakxilhtit, komo chatum lataman kakgalhskin chatiy skgoyunanin xlakata tuku nakitaxtuni kxlatamat chu xlakan «likgalhtawakgakgo» watiya cartas, xlilat pi xchatiykan watiya tuku xwankgolh, pero ni ankgalhin chuna lay.

Ni putum latamanin kanajlakgo tuku maklakaskinkgo skgoyunanin chu tuku xlakata chuna tlawakgo. Wi tiku wankgo pi skgoyunanin «akxilhkgo» tuku tlawakgo latamanin chu pi cartas chu bolas xla cristal kaj maklakaskinkan xlakata tlan natasiya. Akgtum li’akxilhtit, makgapitsi skgoyunanin tiku lu kalakgapaskan tlawakgo lhuwa takgalhskinin chu kuentajtlawakgo tuku tlawa chu tuku wan tiku tlawanimaka takgalhskinin. Alistalh skgoyuna wan tuku katsinit la komo wa malakgchanilh, pero wa wanilh tiku tachuwinama maski xla ni katsi. Akxni tlawakgo pi latamanin nakalipawankgo, lhuwa tumin tlajakgo.

Astrología chu taskgoyun anta takilhti pi tuku nakinkaʼakgspulayan talhkatawilanita. ¿Pero xlikana uma? Biblia wan pi tlan nalaksakaw tuku nakanajlayaw chu tuku natlawayaw, chu pi tuku laksakaw wa tlawa la nakinkakitaxtuniyan kkilatamatkan (Josué 24:15).

Tiku makgapaxuwaputunkgo Dios wi atanu tuku xlakata nalakgmakgankgo astrología chu taskgoyun: Dios xkajni putum umakgolh talismanin. Biblia wan: «Ni xliʼanat kmilakgstipan [...] tiku nawan tuku aku nala, tiku liskuja magia, nipara wa tiku nawan pi wi tuku naʼakgspula achatum, tiku putsa skuwana, nipara tiku nakgalhskin skuwana, nipara tiku naskuwa achatum, nipara tiku tachuwinan ninin, tiku lakputsanani tuku aku nala, nipara chatum tiku kakgalhskin ninin. Xlakata katiwa tiku tlawa umakgolh, Jehová a lu xalixkajni akxilha» (Deuteronomio 18:10-12).