Te astrología ya yakʼ ta nopel te yalaj x-aʼtej ta skuxlejal te ants winiketik te ekʼetik, te U sok te planetaetike. Jich yuʼun te astrologoetike ya yalik te jaʼlaj chikan te banti ayik spisil-abi te kʼalal ya x-ayin jtul alale, jaʼlaj ya yakʼ ta naʼel te bin yilel stalel ya xkʼot soknixlaj te skuxlejal ta pajel chaʼbeje.

Manchukme chiknajem tal ta antiguo Babilonia te bintik ya yichʼ alel ta astrología, jaʼ te bintik yato spasik te ants winiketik ta kʼajkʼal ini ta swenta snaʼel te bintik ya xkʼot ta pasele. Ta 2012 la yichʼ jojkʼoybeyel te ants winiketik ta Estados Unidos ta swenta bin-utʼil yilojik te astrología, ay 33% la yalik te «jaʼlaj jich bitʼil ciencia», ay 10% la yalik te «jaʼlaj ciencia». Pero, ¿melelbal-abi? Maʼuk. Akʼa kiltik te bin yuʼune.

• Te ekʼetik sok te planetaetike ma xjuʼ ya yalik te bin yilel ya xkʼot skuxlejal te ants winiketik jich bitʼil ya yalik te astrologoetike.

• Te bintik ya yalik te ya xkʼot ta stojol jtul ants winik, jaʼ te bintik ya xjuʼ xkʼot ta stojol jteb ma spisil te ants winiketike.

• Te bintik ya yalik te astrologoetike jaʼto stʼunojik te jaʼ ya xbeenik ta sjoyobal Balumilal te planetaetike, ma jaʼuk te bitʼil jaʼ ya xbeenik ta sjoyobal te Kʼajkʼale.

• Te bintik ya yalik ta jujuntul te astrologoetike ma pajaluk te bin ya yalik ta swenta te bin ya xkʼot ta stojol jtul ants winik.

• Ay machʼatik ya skuyik te jaʼlaj ya yal te bin yilel stalel ya xkʼot jtul ants winik te signoetik yuʼun Zodiaco, pero te bin smelelile, jaʼ te manix pajaluk stalelik-a te machʼatik pajal ayinemike. Te bin kʼajkʼal ayin jtul ants winike ma jaʼuk ya xjuʼ ya yal te bin yilel stalel ya xkʼote.

Te astrologoetike manix jaʼuk ya yilik-a te bin yilel stalel ta smelelil te ants winike, jaʼnax ya yalik te bin ya staik ta ilele. ¿Mabal jichuk ya yakʼik ta ilel te ya spʼajik te ants winiketike?

Te ants winiketike nameynanix sleojik koltayel ta stojol-a te jnaʼojeletike. Ay jnaʼojeletik te ya stuuntesbeyik sbikil ants winik o chambalam ta swenta snaʼel te bin ya xkʼot ta pasele o ay jaʼ ya yilik te bin-utʼil ya stam ixim te tat mute. Ay yantik jaʼ ya yilik te bin-utʼil ya xjil te stsʼubil kapel o te té. Ta ora ini yantikix-a te bintik ya stuuntes te ants winiketike, jich bitʼil te cartaetik yuʼun tarot, bola yuʼun cristal, dados, pik kʼabal o te slebeyel swentail te wayichiletike. Pero, ¿yabal xjuʼ ya jchʼuuntik te bin ya yal te naʼojele? Maʼuk. Akʼa kiltik te bin yuʼune.

Ma pajaluk te bin ya yalike. Ya skontrain sba te bintik ya yalik ta swenta te bin ya xkʼot ta pasele, manchukme pajal te aʼtejibal yuʼunik o te bin ya spasike. Jun ejemplo, jtul ants winik ya xbajt sok chaʼtul jnaʼojel ta sjojkʼoybeyel ta swenta te skuxlejal ta pajel chaʼbeje, te jnaʼojeletik-abi jaʼ ya stuuntesik te cartaetik yuʼun tarot, jich yuʼun ya skʼan te junuknax te bin ya yalik te jichuke, melel pajal te bin la stuuntesike pero bayal buelta ma jichuk ya xkʼot pasel.

Ay ma chʼuunbilix te bin ya spasike sok te bin yuʼun ya spasike. Ay machʼatik ya yalik te aylaj jnaʼojeletik te jaʼnax ya yilik te bin ya yakʼ ta ilel ta sit yelaw te ants winike, manix jaʼuk ya xkoltayotik yuʼun-a te cartaetik yuʼun tarot sok te bola yuʼun cristal. Jun ejemplo, ay jnaʼojeletik te pʼijubenik ta leke, jich yuʼun te bin ya spasike jaʼ te ya spasbeyik jojkʼoyeletik te ants winike sok ya schʼam yaʼiyik te sujtibe soknix ya yilik ta lek te bin ya yakʼ ta ilel ta sit yelawe. Te bin ma snaʼ te ants winike jaʼ te jaʼnix yak ta yakʼel ta naʼel ta swenta te skuxlejale. Te bintik ya yalbeyik yaʼiy ta patil te ants winike, jich yilel te ta stukeliknax la snaʼike, manchukme jaʼnix akʼbot snaʼ yuʼun te ants winike. Te kʼalal yakʼojbeyix schʼuun-a te ants winik te bin ya yalike, jich ya skʼanbeyik bayal takʼin.

Te bin ya yakʼ ta nopel te astrología sok te naʼojele jaʼlaj te albilix tal te bin yilel ya xkʼot skuxlejal te jtul ants winike. Pero ¿jichbal-abi? Te Biblia ya yal te joʼotiknix ya xjuʼ ya jtsatik te bintik ya jchʼuuntik o te bintik ya jpastike. Te bintik ya jtsatik spasel ta ora ini jaʼme ya kilbeytik sit ta pajel chaʼbej (Josué 24:15).

Te machʼatik ya skʼan lek ya x-ilotik yuʼun te Diose ay yan swentail te bin yuʼun ya spʼajik te astrología sok te naʼojele, melel ma smulan Dios spisil-abi. Te Biblia jich ya yal: «Ma me xchicnaj ta awohlilic [...] te machʼa ya xʼaʼtej ta jnaʼojel, te machʼa ya spasbe seña snaʼel te bin chopol ya xcʼoht ta pasel, te machʼa ya snaʼ spasel chopol señahetic, jʼacʼ-chamel, jyahaltaywanej, te machʼa ya scʼopon chʼuhlelal, jpas señahiletic, o te machʼa ya scʼopon te machʼa chamene. Como ihlaybil yuʼun Jehová a machʼayuc a te hich ya spas[e]» (Deuteronomio 18:10-12).