Li sabel smelolal kʼanaletike (astrología) chal ti oy kʼusitik xuʼ spas ta stojolal krixchanoetik li kʼanaletike, li ue xchiʼuk li planetaetike. Jaʼ yuʼun, li jkʼelkʼanaletike chalik ti mi laj yichʼ kʼelel kʼu yelan cholol li kʼanaletik kʼalal chvokʼ jun olole, te chvinaj kʼu yelan chbat xkuxlejal xchiʼuk stalelal.

Li sabel smelolal kʼanaletike te likem talel li ta voʼneal Babiloniae, pe lek ojtikinbil-o li avie. Kʼalal laj yichʼ jakʼel ta sjabilal 2012 ta Estados Unidose, laj yakʼik venta ti jun li ta oxvoʼ krixchanoetike xchʼunojik ti te la tsakal skʼoplal ta siensia li sabel smelolal kʼanaletike, pe li 10% chalik ti jaʼ la siensiae. ¿Mi jech ta melel? Mu jechuk. Jkʼeltik kʼu yuʼun.

• Li kʼanaletik xchiʼuk li planetaetike mu kʼusi xuʼ spasik ta xkuxlejal krixchanoetik jech kʼuchaʼal chal li jkʼelkʼanaletike.

• Li kʼusitik chalike buchʼuuk noʼox xuʼ jech xkʼot ta stojolal.

• Li buchʼutik tsabeik smelolal kʼanale jaʼ xchʼunojik-o ti tsjoyibtaik balumil li planetaetike, pe taje mu jechuk, yuʼun jaʼ tsjoyibtaik kʼakʼal li planetaetike.

• Li buchʼutik tsabeik smelolal kʼanale jelajtik li kʼusi chalik ta stojolal jun krixchanoe.

• Li buchʼutik tsabeik smelolal kʼanale jaʼ tstsakik ta venta ti bakʼin vokʼ li jun krixchano sventa xakʼbeik jun signos del Zodiaco ti oy 12 ta vokʼe. Pe ta skoj ti jelem xa yavil li balumile, mu xa sta-o li sbi yakʼojbeik li signos del Zodiacoe, yuʼun maʼuk xa te oy li jujutsop kʼanaletik kʼalal chakʼ xojobal li kʼakʼale.

Xchʼunojik ti xuʼ la xal kʼu yelan stalelal jun krixchano li signos del Zodiacoe, pe taje mu jechuk kʼotem ta pasel, yuʼun li buchʼu jmoj skʼakʼalil chvokʼike toj jelel ti kʼu yelan stalelalik ta jujuntale. Jaʼ yuʼun chaʼa, jamal xvinaj ti maʼuk chal kʼu yelan jtalelaltik ti kʼusi ora lijvokʼe. Li buchʼu tsabeik smelolal kʼanale maʼuk tskʼelik ti kʼu yelan stalelal li jun krixchano sventa snaʼik ti kʼu yelan chbate, yuʼun jaʼ noʼox tsnop stukik li kʼusi xuʼ xkʼot ta stojolal jun krixchanoe. ¿Mi mu jechuk ti chpʼajvanik kʼalal jech tspasike?

Li krixchanoetik ta voʼnee nopem onoʼox xaʼiik ti chbatik ta stojolal li jtʼunoletike. Junantike tskʼelik ti kʼu yelan tstam sveʼel li jkot kotse, tstunesik li sbel xchʼut jun krixchano o sbel xchʼut jkotuk chonbolom sventa snaʼik li kʼusi chkʼot ta pasel ta jelavele. Li yantik xtoke tsabeik smelolal li stsʼubil o smatsʼil skafeik o steike. Li avie, tstunesik svarajail tarot, bola de cristal, dadoetik, spikel chʼichʼ xchiʼuk sabel smelolal vaychiletik. Pe ¿mi stakʼ van jpat koʼontontik ta stojolal li jtʼunolajeletike? Mi jsetʼuk. Jkʼeltik kʼu yuʼun.

Li kʼusi chalike mu koʼoluk akʼo mi jmoj o mi jelel li kʼusitik tstunesik sventa chtʼunolajik-oe. Jech kʼuchaʼal liʼe, mi oy junuk krixchano tsjakʼbe chaʼvoʼ jtʼunoletik li kʼusi chkʼot ta stojolale, ep ta velta mu xkoʼolaj li kʼusi chalike akʼo mi jmoj li svarajail tskʼelik ta alele.

Li kʼusitik tstunesike mu stakʼ jpat koʼontontik yuʼun xchiʼuk mu jnaʼtik li kʼusi oy ta yoʼontonik ta melele. Oy buchʼutik chalik ti jaʼ noʼox la tskʼelik kʼu yelan chtakʼav xchiʼuk kʼu yelan tspas sba li jun krixchano kʼalal yakal chchiʼinat ta loʼil yuʼun li jtʼunole. Sventa labaluk xa sba xvinaj ta kʼelele, tstunesik li bola de cristal xchiʼuk li varajae. Jech kʼuchaʼal liʼe, junantik jtʼunoletik ti lek chanemike ep kʼusitik tsjakʼbeik li jun krixchanoe, lek chchikintaik li kʼusi chale xchiʼuk tskʼelik lek li kʼusitik tspase. Ta slajeb une, chalik li kʼusi chkʼot ta stojolal li jun krixchano ti jaʼ xa la stʼunik yileluke, pe jaʼ noʼox chalik skotol li kʼusi la spas o li kʼusi laj xa yal li jun krixchanoe. Toj ep spasojik-o kanal takʼin li jtʼunoletik ta skoj ti stakʼ xa jpat lek koʼontontik ta stojolalik yilele.

Li sabel smelolal kʼanale xchiʼuk li tʼunolajele chakʼik ta chʼunel ti albil xa onoʼox la li kʼusi chkʼot ta pasel ta jtojolaltike. Pe li Vivliae chal ti xuʼ jnop jtuktik li kʼusi ta jchʼuntik xchiʼuk li kʼusi ta jpastike. Jech xtok, chal ti jaʼ te chvinaj-o kʼusi chkʼot ta jkuxlejaltik li kʼusi ta jnop ta jpastike (Josue 24:15).

Li buchʼutik tskʼan lek ch-ilatik yuʼun li Diose oy lek srasonal yuʼunik sventa spʼajik li sabel smelolal kʼanal xchiʼuk li tʼunolajele, yuʼun li Diose spʼajoj skotol taje. Xi chal li Vivliae: «Mu me buchʼu [...] xchan tʼunol, spasel majia, j-akʼchamel mi jaʼuk buchʼu chalbe skʼoplal kʼusi chkʼot ta pasel ta tsʼakal, mi jaʼuk buchʼu chchan tuchʼ ora, buchʼu chbat skʼopon j-espiritista o jtʼunol mi jaʼuk buchʼu oy kʼusi tsjakʼbe li animaetike. Li buchʼutik jech tspasike toj chopol chil li Jeovae» a (Deuteronomio 18:10-12).