Uloño woku kũlĩhĩsa olombungululu onjila yimue yoku tãha. Vakuakunomuisa olombungululu va tava okuti, osãi kuenda ovina vikuavo vi sangiwa voluali, vi kuatisa calua omanu. Vakuakukũlĩhĩsa olombungululu va popia okuti, onjila ndomo olombungululu, losãi vi sangiwa eci omunu a citiwa, vi situlula ovituwa omunu a ka kuata kuenda ekalo liaye kovaso yoloneke.

Uloño woku kũlĩhĩsa olombungululu wa fetikila ko Bavulono kuenda wa kũlĩhĩwa calua koloneke vilo. Ekonomuiso limue lia lingiwa ko Estados Unidos kunyamo 2012 lia lekisa okuti, onepa yalua yomanu va pulisiwa va tava okuti, oku kũlĩhĩsa olombungululu ca kala “uloño umue,” kuenda ci soka 10 kolopursendu yomanu va popia vati, “ca pitahãla uloño.” Eci hẽ ocili? Sio. Kũlĩhĩsa asunga aco.

• Ovina vikuavo via lulikiwa voluali kuenda olombungululu ka vi eci unene komanu ndomo vakuakukũlĩhĩsa olombungululu va siata oku popia.

• Olonjanja vialua ovina va popia via siata calua okuti, vi pondola oku tiamisiwila komanu vosi.

• Koloneke vilo upange woku tahã olombungululu wa siata oku tiamisiwila kelongiso liosimbu liokuti ovina vikuavo via lulikiwa voluali vi ñuala ongongo. Ocili okuti, ovio vi ñuala ñuala ekumbi.

• Vakuakukũlĩhĩsa olombungululu poku situlula eci ci ka pita lomunu umue kovaso yoloneke, ka va popi ovina vimuamue.

• Uloño woku kũlĩhĩsa olombungululu u tepisa omanu vovimunga 12, ale volondimbukiso vi likuata leteke va citiwa. Omo lioku ñuala ñuala kuongongo vokuenda kuanyamo alua, ateke oku citiwa ana a tokekiwile lolondimbukiso viavo, ka a likuata vali eci utanya u pita koviengele vina via tukuiwile tete.

Va siata oku popia okuti Olondimbukiso viaco vi situlula ovituwa viomunu umue. Ocili okuti, ndaño omanu va citiwa veteke limuamue, va kuete ovituwa via litepa. Eteke lioku citiwa ka li situlula lacimue catiamẽla komunu. Vakuakukũlĩhĩsa olombungululu ka va tendi omanu ndomo va tuwa, pole, va pisa omanu omo liovituwa viavo kuenda ekalo liavo okuti, va vi tiamisila kovisimĩlo viopiwa kolondimbukiso. Ku tava hẽ okuti eyi onjila yimue yoku lekisa ocame?

Tunde kosimbu, omanu va siata oku sandiliya vakuakutahã. Vamue vakuakutahã va sandiliya olondimbukiso kovina viovokati ndeci kolomuma viovinyama pamue viomanu, ale konjila ndomo ocikondombolo ci njokõla olomema. Vakuavo va sandiliya olondimbukiso kamẽla o cha ale kolomema viokafe. Koloneke vilo oco va situlule eci ci ka pita lomunu umue, va siata oku tahã lovikanda, oku tahẽla vewe liyela, oku tahã lolodadu kuenda ovina vikuavo. Anga hẽ oku tahã oyo onjila ya velapo yoku kũlĩha eci ci keya kovaso yoloneke? Sio, hayoko. Tu kũlĩhĩsi asunga aco.

Catete, oku situlula eci ci keya kovaso yoloneke poku kuama olonjila via litepa, ceca onima ya litepa. Pamue ndaño omunu o kuama onjila yimuamue, pole, onima yaco ka yi lisoki. Ndeci, nda omunu wa linga epulilo limuamue komanu vavali vakuakutahã kuenje va “tanga” ovikanda vimuamue vioku tahã, etambululo nda li kala limuamue. Pole, olonjanja vialua ka a lisoki.

Omanu valua va siata oku kuata atatahãi kolonjila vi kuamiwa la vakuakutahã kuenda ovimãho viavo. Vana va pisa upange waco va popia okuti, ovikanda vioku tahã kuenda ewe liyela lioku tãha, via pangiwila ño oku posuisa kuenda vakuakutahã ka va tangi kovikuata viaco, ovo va kũlĩhĩsa ekalo omunu a lekisa. Ndeci, umue wa loñoloha koku tahã o linga apulilo alua komunu weya oku sanda ekuatiso kokuaye kuenda o tiamisila utima katambululo aye kuenda kovituwa eye a lekisa, momo ovina viaco vi pondola oku situlula cimue catiamẽla komunu weya oku pinga ekuatiso. Noke ukuakutahã o lombolola ovina vimue viatiamẽla komuenyo womunu eye a situlula ndaño okuti eye ka ci limbukile osimbu a kala oku vangula. Vamue vakuakutahã eci va limbuka okuti vana veya oku sanda ekuatiso liavo va kolela kueci ovo va popia, va fetiwa olombongo vialua.

Uloño woku kũlĩhĩsa olombungululu kuenda woku tãha, u lekisa okuti ovina vi ka pita letu kovaso yoloneke via sokiyiwa ale tunde eci tua citiwa. Anga hẽ eci ocili? Embimbiliya li popia okuti, tu pondola oku nõla ovina tu tava leci tu yongola oku linga pole ovina tu nõla, vi situlula eci ci ka pita letu kovaso yoloneke.—Yehosua 24:15.

Afendeli va Suku va kuete esunga likuavo lioku yuvula uloño woku kũlĩhĩsa olombungululu kuenda woku tahã. Momo Suku o pisa olonjila viosi vioku seteka oku kũlĩhã ovina viatiamẽla kovaso yoloneke poku tahã. Embimbiliya li popia hati: “Pokati kene ka pa ka sangiwe umue . . . ukuakutahã, ndaño ukuakusingila, ndaño ukuakulova, ndaño onganga, ndaño ukuakuyamba, ndaño ukuakawengo, ndaño ociliangu, ndaño ukuavinjualume. Momo wosi o linga ovina evi eye ocimbondo ku Yehova.” a—Esinumuĩlo 18:10-12.