Ihwo ri yono kpahen isio na vwo imuẹro nẹ isio, emeranvwe, kugbe iplanẹti efa djobọte akpeyeren rẹ ohworakpọ. Ayen tare nẹ ẹdia rẹ iplanẹti, isio vẹ emeranvwe hepha ọke re vwo vwiẹ ohwo djobọte oka uruemu rẹ ohwo na che vwo vẹ oka rẹ akpọ ro che yerin.

Dede nẹ uyono nana tonphiyọ vwẹ Babilọn rẹ awanre, ihwo ji tito nonẹna. Vwo nene ikekeri ọvo re ruru vwẹ ukpe rẹ 2012 vwẹ United States, Ẹkẹn erha rẹ ihwo ra nọre, rorori nẹ uyono ọtiọyena “ghwomaphiyọ uyono rẹ egbaerianriẹn,” ẹkẹn 10 da rha tanẹ ọyen “uyono rẹ egbaerianriẹn dẹn.” Ọyena uyota? Ẹjo. Diesorọ a vwọ ta ọtiọyen?

• Isio na vẹ iplanẹti efa vwo ẹgba ri se vwo djobọte akpeyeren rẹ ihworakpọ kirobo rẹ ihwo ri yono kpahen isio na tare-e.

• Ọke buebun, eta rayen dia reghe reghe te ẹdia ro de se shekpahen kohwo kohwo.

• Ihwo ri yono kpahen isio nonẹna mu uyono rayen kpahen imuẹro rẹ ihwo awanre rọ tare nẹ iplanẹti sansan na kiẹn akpọ na riariẹ. Jẹ vwọrẹ uyota, ọnre na yen iplanẹti sansan na kiẹn riariẹ.

• Oborẹ ihwo sansan ri yono kpahen isio na ta kpahen ohwo ọvo fẹnẹ.

• Ihwo ri yono kpahen isio na ghare ihwo phiyọ ẹdia 12 yẹrẹ oka re se zodiac vwo nene ẹdẹ re vwiẹ ayen. Kidie nẹ asan rẹ akpọ na hepha weneri vwẹ ikpe uriorin evo rhire na, oka rẹ zodiac ra vwọ riẹn ẹdẹ ọvuọvo rhe shephiyọ vẹ ọke rẹ ọnre na vwọ wan ẹko rẹ isio re vwo mu odẹ yena kẹ-ẹ.

A tare nẹ a sa vwẹ zodiac vwọ riẹn oka rẹ uruemu rẹ ohwo che vwo. Vwọrẹ uyota, ọ dia uruemu vuọvo yen rhe ihwo re vwiẹre ẹdẹ vuọvo-o; ẹdẹ re vwiẹ ohwo cha sa nẹrhẹ a riẹn uruemu rẹ ohwo che vwo-o. Ukperẹ ayen vwo ni ihwo kirobo rẹ ayen hepha, ihwo ri yono kpahen isio reyọ oborẹ ayen vwẹ ẹwẹn roro vwo brorhiẹn. Ọnana rha dia utuoma rẹ ekueku?

Nẹ awanre rhe yen ihwo vwo bru ebọepha ra. Ebọepha evo reyọ ivun rẹ eranvwe vẹ e rẹ ihworakpọ yẹrẹ oborẹ ọhọ sọhrọ ibieka wan vwọ guọnọ otọ rẹ ota. Efa reyọ oborẹ ẹbe iti hepha yẹrẹ inuhu rẹ ikọfi vwọ mraro. Nonẹna, ayen vwẹ ughegbe, ubigho, ẹhẹrhabọ, isio vẹ erọnvwọn efa vwọ “guọnọ otọ” rẹ oborẹ akpeyeren ohwo cha dia vwẹ obaro na. Ẹphaẹbọ ọyen idjerhe ra sa vwẹroso ra vwọ riẹn obaro na? Ẹjo, kakaka. E jẹ a nabọ roro kpahen ota na.

Ona rẹ aroẹmrẹ rọ vwọso ohwohwo. Aroẹmrẹ rẹ ebọepha sansan vwọso ohwohwo. Ọ da tobọ dianẹ oka rẹ ona vuọvo yen ayen vwo ruiruo, aroẹmrẹ rayen na fẹnẹ ohwohwo. Kerẹ udje, ohwo da nọ ebọepha ivẹ onọ ọvo kpahen obaro na, ayen ivẹ na da vwẹ ona ọvo vwo ruiruo, ofori nẹ ẹkpahọnphiyọ rayen dia ọvo. Ẹkẹvuọvo, ọke buebun, ọ sa dia ọtiọye-en.

Ihwo nọ enọ kpahan ena rẹ ebọepha vwo ruiruo. Ihwo tare nẹ ughegbe yẹrẹ ubigho rẹ ayen vwo ruiruo na erọnvwọn ghevweghe, ayen tare nẹ oborẹ ohwo na ruẹ wan yen ebọepha na nẹ, ọ dia erọnvwọn rẹ ayen vwo ruiruo na-a. Kerẹ udje, ọboepha rọ tẹn ona cha nọ enọ buebun kpahen ohwo na, ọ me nabọ muẹwẹnphiyọ oborẹ ohwo na ta vẹ obo ro ruẹ rere ọ sa vwọ riẹn erọnvwọn evo kpahen ohwo na. Vwẹ idjerhe ọtiọyena, ohwo na cha ta erọnvwọn evo kpahen oma rọyen vwọrẹ jẹ ẹriẹn, ọboepha na me tanẹ ọyen yen vuẹ ohwo na obo re cha phia kẹ. Ebọepha evo mrẹ igho buebun vwo nẹ obọ rẹ ineki rayen vwẹ idjerhe nana.

Uruemu re vwo ni isio na vẹ ephaẹbọ mudiaphiyọ nẹ e brorhiẹn rẹ oborẹ obaro rẹ akpeyeren rẹ avwanre cha dia phiyotọ. Jẹ ọtiọyen yen ọ ghene hepha? Baibol na tare nẹ avwanre vwo ẹgba ra vwọ jẹ oborẹ avwanre segbuyota yẹrẹ oborẹ a guọnọ ru, ọ je tanẹ ojẹ rẹ avwanre djobọte oborẹ akpeyeren avwanre cha dia vwẹ obaro na.​—Joshua 24:15.

Inenikristi tobọ vwo erọnvwọn efa re sorọ ayen vwọ sen uyono re vwo ni isio vẹ ephaẹbọ, Baibol vwọso ephaẹbọ rẹ koka koka. Avwanre mrẹ eta nana vwevunrẹ Baibol na: “We ja mrẹ ohwo ọvo vwẹ uherevie rẹ ovwan . . . rọ mraro, eyẹ ọbuepha eyẹ ohwo rọ mrorẹ eyẹ ọbo rọ ghwa ihwo ria, eyẹ ohwo ro ruẹ inehweri, eyẹ ohwo ro nene irivwi ta ota eyẹ ọrieda, eyẹ ohwo ro hrẹn. Kidie ohwo ro ru imu nana yo gbe ẹgua rẹ Ọrovwohwo.”​—Urhi Rivẹ 18:10-12.