Astrology kana u bvumba nga ṋaledzi ndi vhungome ho thewaho kha uri ṋaledzi, ṅwedzi na dzipulanete ndi zwone zwine zwa ṱuṱuwedza nḓila ine vhathu vha tshila ngayo kha ḽifhasi. Vhathu vhane vha bvumba vha amba uri nḓila ine zwenezwi zwithu zwa vha zwo ima ngayo musi muthu a tshi bebwa, zwi kwama nḓila ine a ḓo vha ngayo na vhumatshelo hawe.

Naho Astrology hu zwithu zwo thomaho kale-kale ngei Babele ḽa kale, zwi kha ḓi vha zwithu zwo ḓoweleaho na ṋamusi. Vhathu vhanzhi vha tenda kha vhathu vhane vha ita zwa Astrology na zwine vha zwi bvumba. Naa ri nga fulufhela zwine vha zwi amba? Hai. Kha ri vhone uri ndi ngani.

• Dzipulanete na dziṋaledzi a zwi kwami vhathu u fana na nḓila ine vhathu vha Astrology vha humbula ngayo.

• Kanzhi vha bvumba zwithu zwo ḓoweleaho zwine zwa nga shuma kha muthu muṅwe na muṅwe.

• Zwine vhenevho vhathu vha zwi bvumba ṋamusi, zwi ḓitika nga zwithu zwe vhathu vha vha vha tshi zwi tenda kale zwa uri pulanete dzi mona u mona na ḽifhasi. Ngoho ndi ya uri pulanete dzi mona u mona na ḓuvha.

• Arali muthu a ya kha vhathu vho fhamba-fhambanaho vha Astrology, zwine vha zwi bvumba nga ha onoyo muthu zwi vha zwi sa fani.

• Zwifanyiso zwi re kha tshati zwi ṋea luvhonela lwa nḓila ine muthu a vha ngayo. Ngoho ndi ya uri vhathu vho bebwaho nga ḓuvha ḽithihi a vha na vhumuthu vhu no fana; ḓuvha ḽine muthu a bebwa ngaḽo a ḽi dzumbululi tshithu nga ha onoyo muthu kana vhumuthu hawe. Vhathu vha Astrology vha bvumba zwine muthu a vha zwone vha tshi shumisa zwithu zwi re tshikhalani nṱhani ha u vhona zwine muthu a vha zwone zwa vhukuma. Naa zwenezwi a si tshiṱalula?

U bva kale, vhathu vho vha vha tshi ya kha vhaporofita na mingome. Vhaṅwe vhane vha ita zwa u bvumba, vha bvumba vha tshi shumisa miraḓo ya nga ngomu ha zwipuka na vhathu kana vha sedza nḓila ine khuhu ya kudzela ngayo. Vhaṅwe vha bvumba vha tshi shumisa kofi kana mitalo i re kha maṱari a tie. Musalauno vha shumisa magaraṱa a madambi, ṱhangu, daizi na zwiṅwe-vho zwine vha zwi shumisa u itela u bvumba nga ha vhumatshelo ha muthu. Naa ri nga ḓitika nga vhaporofita na mingome u itela u ḓivha nga ha vhumatshelo? Hai. Kha ri vhone uri ndi ngani.

Ṱhogomelani nḓila ine mafhungo avho a si tshimbidzane ngayo. Kanzhi nḓila dza u bvumba dzine vhenevho vhathu vha dzi shumisa dzi a hanedzana. Naho vho shumisa maitele mathihi, zwine vha zwi bvumba a zwi fani. Sa tsumbo, arali muthu a vhudzisa mingome mivhili mbudziso i fanaho nga ha vhumatshelo, phindulo dza hone dzi fanela u fana samusi vha tshi ḓo vha vha tshi khou shumisa garaṱa dzi fanaho. Fhedzi kanzhi phindulo dzavho a dzi fani.

Zwine mingome ya zwi shumisa zwi a solisea. Vhasasaladzi vha amba uri magaraṱa a madambi kana ṱhangu dzine dza shumiselwa u bvumba zwi sokou vha zwithu zwazwo. Musi mingome i tshi bvumba a i shumisi zwenezwi zwishumiswa, fhedzi i vha yo sedza nḓila ine muthu a vha ngayo. Sa tsumbo, mingome yo ṱalifhaho i vhudzisa mbudziso dzo ḓoweleaho nahone ya thetshelesa nga vhuronwane zwine muthu a zwi amba na u sedza mbonalo yawe u itela u bvukulula zwine a vha zwone. Nga nṱhani ha uri muthu ane a khou thusiwa u vha o no ṋea mungome phindulo a sa zwi ṱhogomeli, onoyo mungome u ḓirwa khana nga u ḓivha mafhungo na vhuimo zwa onoyo muthu. Miṅwe mingome yo wana tshelede nnzhi nga nṱhani ha uri vhathu vhane ya vha thusa vha a i fulufhela.

Vhathu vha astrology na mingome vha amba uri ho dzula ho dzudzanywa uri vhumatshelo hashu vhu ḓo vha hani. Fhedzi naa zwenezwi ndi ngoho? Bivhili i ri vhudza uri ri na vhukoni ha u khetha zwine ra zwi tenda kana zwine ra ṱoḓa u zwi ita nahone phetho dzine ra dzi dzhia dzi kwama vhumatshelo hashu.—Yoshua 24:15.

Tshiṅwe tshiitisi tshine tsha ita uri vhagwadameli vha Mudzimu vha iledze zwa astrology na vhungome, ndi uri Mudzimu u vhenga mifuda yoṱhe ya u bvumba. Bivhili i ri: “Kha inwi hu songo vhonala . . . ane a tungula, na ane a bvumba, na mungome, na muloi a songo vhonala. Na mudzia-malombo, na ane a vhidza midzimu ya vhafu, kana a vhudzisa mudzia-u-bvumba, na ane a ya zwifhoni, a songo vhonala. Ngauri ane a ita zwenezwo u ita zwine Yehova a nengiswa ngazwo.” a—Doiteronomio 18:10-12.