Aboro birĩ soroka na akerekuru idi kuti gupai nga, akerekuru, diwi, na azegino na bakere ome kurii agu aboro naraka auru kpotosende. I nagumba gupai nga, gu bangiriba agi ahe re asungo rogoho ti regbo batika boro na ome kuriipa gani asino na gani raka kumbatayo.

Wa vura duhe nga gi sino nga ga birĩ soroka na akerekuru re atona bakuru kusayo Babera yo, si kindi areme. Kuti gu wisigopai namangi rogo gu garã nangia 2012 Amerika yo, sa dagba biata dagba agu aboro namangi gi wisigopai re agumba gupai nga, gupai nga ga birĩ soroka na akerekuru “nawira rengo,” na 10 rii kama ki idi kuti gupai nga si ni kina “ruruhe.” Ya mo rengo du? Wagusa te. Ndu apai du re.

• Azegino gbiati akerekuru na gu ome ti ni rengbe ka du na maapai kurii ga boro raka wa gu aboro birĩ soroka na akerekuru agumbaha te.

• Dedede, agu apai i agumbaha nga kina agu apai rengbe ka manga fu ai boro.

• Aboro birĩ soroka na akerekuru namangapai areme kuti gu bakuru ida nga azegino nake pati kpotosende. Ono tie, azegino nake pati uru.

• Agu apai aboro birĩ soroka na akerekuru agumbaha tipa bangisa boro sa andunga sa na ga agu akurayo te.

• Aboro birĩ soroka na akerekuru nakparaka boro sa ku rogo ariko 12, kuti gu garã i abatika ni ti ni. Mbiko agu aariapai tipa gu bangiriba du kpotosende rogoho naamangi vuru dungu kama agarã, agu arame adiwi i ayuguhe kuti akpia akerekuru andunga sa ho uru asusa ni pati agu abadona akerekuru i ayambuhe te.

I nape gupai nga, agu akpiahe re nayugo gupai du tipa asino gu boro re. Ono ka gumba rengo, agu aboro i avunguyo ti bangisa ramediwi na bangisa asino te; pa gu ramediwi vungu yo boro ti ni ayugongo wiripai kandara tooni tipa ni watadu asino ni te. Kuba gupai nga i naabi aboro wai du yo nzunzu, aboro birĩ soroka na akerekuru nasarangbanga ga boro asino na mangaapai kuti gupai i aberãha gbua. Ya mo iraira bipai nga gi pai re te?

Natona bakuru kusayo, aboro aima digo ni ndu fuo abinza. Agu aboro namangasunge abinza nagbata apai rogo agu ahe du wa re anya na re aboro watadu wai kondo naadewa riahe. Akurayo namangasunge na akpe shai watadu ngungo buni. Areme, i namangasunge na karte, abitirobi, awede, na kura agene tipa ka “ino” gupai du tipa boro kumbatayo. Ya mo sunge abinza nga gu wene gene tipa ka ino gupai du kumbatayo? Oó, wagusa te. Ani berẽnga kurii gi pai re.

Mo berẽnga kuriipa du gayo apai ni rengo ti aregbo du. Agu apai abinza agumbaha dedede natagbagatihe atagbaga na ga akurayo. Ka si vura du nga i nimangisunge na kina bangisa pai, surungbaha nakura kia. Ni kpiapai, ka boro sana abinza ue tipa gupai du kumbatayo, fuo i “gedi” karte, gupai si aidaha nga, gayo akaragapai du kina sa kuti gu sanahe re. Ono dedede si naadunga wo te.

Agu agene abinza amangapai ngbaha na gayo abipai naru rii kungbo gayo berãapai gbua. Abawisigipai sirisiri nagumba gupai nga, akarte watadu abitirobi nga kungbo ahe gbua na binza nabi wai boro amangapai angianga agu ahe re ya. Ni kpiapai, gu binza du na tatamana nasana kina kungbo asanahe kini kparia wai wenengai boro akaragapai na gu wiri mangapai rengbe ka yugo wiripai tipa ni. Tifuoho, binza kini di taarimo tipa ino arengo na agu pai du tipa gu boro re, nga gu kina gu boro re ni yuguhe ka ni ainongo ya. Mbiko pa du aboro na kido kuti abinza, i aima digo ni gbia bakere marã be agu aboro naye fuo yo.

Gu mangaapai nga ga aboro birĩ soroka na akerekuru gbiati abinza nayugo gupai nga, agu pai du tipa rani dunduko ni kekehe. Ono ya mo wo duhe? Ziazia Kekeapai nagumba gupai furani nga, ani na rengba ka sia gupai ani ka ida kuti ni watadu gupai ani ka mangaha, na gaani asiapai na kina sangbanaha kurii gaani raka kumbatayo.​—⁠Yosua 24:⁠15.

Agu aboro nairiso Mbori na dungu nduapai beyo ka ká aboro birĩ soroka na akerekuru gbiati abinza​—⁠Mbori nasoga sunge ngua rogo angbatungaha dunduko. Ani bingo agi fugo re rogo Ziazia Kekeapai: “A nga boro sa ka du dagba roni . . . nara fu ngua, na gu ni namanga pa soroka, na adoavure, na abinza, na abaziaboro ni birĩ a, na asana sangbaatoro, na airamangu, na agumba sangbaatoro na agu yo nagbata pai be agu yo nakpi a te. Bambiko gu ni namanga ngbatunga agi apai re, ni bangiri Yekova ni kere gbegberẽ sino boro.” a​—⁠Pa Fu Rugute ni Ue he 18:​10-​12.