Kaimi nɔ́ ko ngɛ nɛ a kɛ kaiɔ Titus. A tɛni níhi enyɔ komɛ nɛ tuɔ yi nɔ sane he munyu ngɛ kaimi nɔ́ ɔ he. E ngɛ mi kaa nihi fuu li kaimi nɔ́ nɛ ɔ he nɔ́ ko tsɔ mohu lɛɛ, se e kɛ Baiblo ɔ ngɛ tsakpa ko nɛ sa kadimi. Lɔ ɔ ji kaa, Titus Kaimi Nɔ́ ɔ yeɔ Baiblo gbami ko nɛ sa kadimi he odase, se nihi fuu li.

Ngɛ kekleekle jeha lafa a sisije ɔ, Roma Nɔ Yemi ɔ je sisi kɛ je Britain kɛ be ngɛ Gaul nɛ piɔ a tsɛɛ ke France ɔ, kɛ ya ta Egypt. Jamɛ a be ɔ, Roma nɔ yemi ɔ ji nɔ yemi ko ngɛ he wami nitsɛ, nɛ níhi yaa saminya ngɛ e nɔ yemi he ɔmɛ. Yudea kpokpa a piɛɛ Roma nɔ yemi he ɔ he, se e kɛ Roma ma a he kɛ. Ma nɛ ɔ ha we Roma ma a he jɔmi kulaa.

Womi nɛ ji, Encyclopedia of Ancient Rome ɔ de ke: “Mahi fuu a bua jɔ Roma nɔ yemi ɔ he, ja ma kakaaka komɛ kaa Yudea pɛ lɛ ngɛ ninyɛ nɛ mi wa kɛ ha Roma nɔ yemi ɔ. Yuda bi ɔmɛ hɛɛ nɔ yeli nɛ a ngɛ ma se nɛ a bui Yuda bi ɔmɛ a kusumi ɔmɛ ɔ a he abofu. Roma bi ɔmɛ yɔse nɔ́ nɛ ɔ, lɔ ɔ he ɔ, a wa Yuda bi ɔmɛ yi mi wawɛɛ.” Yuda bi fuu hyɛ blɔ kaa nɔ yelɔ ko ma ba kpɔ̃ mɛ kɛ je Roma nɔ yemi ɔ sisi, nɛ e maa wo Israel ma a hɛ mi nyami ekohu. Se ngɛ jeha 33  ɔ mi ɔ, Yesu Kristo ma nɔ mi kaa Yerusalɛm ma a hɛ mi ma kpata.

Yesu de ke: “Ligbi ɔmɛ ma nɛ́ o he nyɛli ɔmɛ maa ngɔ tsohi kɛ a nya piɔpiɔɔpiɔ kɛ sa o yi, nɛ a maa bɔle mo kɛ kpe, nɛ a maa wo o he ka ngɛ he fɛɛ he. A maa ngɔ mo kɛ o bimɛ nɛ a ngɛ o mi ɔ kɛ fiaa zugba, nɛ a be tɛ ko sie ngɛ tɛ ko nɔ ngɛ o mi.”​—Luka 19:43, 44.

Yesu munyu ɔ pee e kaseli ɔmɛ nyakpɛ. Ligbi enyɔ se benɛ kaseli ɔmɛ na Yerusalɛm sɔlemi we ɔ, a kpɛti nɔ kake de ke: “Tsɔɔlɔ, hyɛ! tɛ nɛ ɔmɛ kɛ tsu nɛ ɔmɛ ngɛ nyakpɛ nitsɛnitsɛ!” Ngɛ anɔkuale mi ɔ, tɛ ɔ ekomɛ a kami ji mita 11, a blimi ji mita 5, nɛ a hiɔwe yami ji mita 3. Se Yesu de ke: “Ní nɛ ɔmɛ nɛ nyɛ ngɛ hyɛe nɛ ɔ, ligbi komɛ maa ba nɛ a maa tsɛ̃ mɛ ngɔ pue si, nɛ a be tɛ ko sie ngɛ tɛ ko nɔ.”​—Maako 13:1; Luka 21:6.

Yesu ya nɔ nɛ e de mɛ ke: “Ke nyɛ na nɛ ta buli ba bɔle Yerusalɛm kɛ kpe ɔ, lɛɛ nyɛ ná nɛ nyɛɛ le kaa be nɛ a maa pee lɛ ma doku ɔ su ta. Kɛkɛ ɔ, nihi nɛ a ngɛ Yudea a nɛ a bɔni fo tumi kɛ ya yoku ɔmɛ a nɔ, nɛ nihi nɛ a ngɛ e mi ɔ nɛ a je, nɛ nihi nɛ a ngɛ ngmɔ si ɔ nɛ a ko ba sɛ e mi.” (Luka 21:20, 21) Anɛ Yesu munyu ɔ ba mi niinɛ lo?

Jeha 33 be, loloolo ɔ, Roma bi ɔmɛ ngɛ Yuda bi ɔmɛ yi mi wae. Se ngɛ jeha 66 mi ɔ, Roma nɔkɔtɔma nɛ e toɔ Yuda bi ɔmɛ a sika he blɔ nya nɛ a tsɛɛ lɛ ke Gessius Florus ɔ muɔɔ sika ngɛ sɔlemi we klɔuklɔu ɔ daka mi. Jehanɛ ɔ lɛɛ, Yuda bi nɛ a mi mi fu ɔ a tsui nyɛ we hu. E kɛ we nɛ Yuda bi ɔmɛ te si kɛ sɛ Yerusalɛm ma a mi, nɛ a kɛ Roma ta buli nɛ a ngɛ ma a mi ɔ ya hwu ta nɛ a ye Roma bi ɔmɛ a nɔ. Lɔ ɔ se ɔ, a fia adafi kaa a ye a he ngɛ Roma nɔ yemi ɔ sisi.

 Maa pee nyɔhiɔ etɛ se ɔ, Cestius Gallus nyɛɛ Roma ta buli nɛ a he hiɛ pe 30,000 a hɛ mi kɛ sɛ Yerusalɛm ma a mi konɛ a ya kpata atua tsɔli ɔmɛ a hɛ mi. Roma bi ɔmɛ sɛ Yerusalɛm ma a mi, nɛ a ku agbo ɔ nya gbogbo nɛ ngɛ sɔlemi we ɔ he ɔ. Se nɔ ko li nɔ́ nɛ ba kɛkɛ nɛ Roma bi ɔmɛ kpale a se nɛ a je. Yuda bi atua tsɔli ɔmɛ nya, nɛ a nyɛɛ Roma tabo ɔ se nɔuu. Akɛnɛ Roma ta buli ɔmɛ kɛ Yuda bi atua tsɔli ɔmɛ je ma a mi he je ɔ, Kristofohi nɛ a bu Yesu kɔkɔ bɔmi ɔ tue ɔ je Yerusalɛm ma a mi, nɛ a ya hi yokuhi nɛ ngɛ Yɔdan pa a se ɔ nɔ.​—Mateo 24:15, 16.

Jeha kake se ɔ, Roma bi ɔmɛ kpale dla a he, nɛ ta buli a nɔkɔtɔma Vespasian kɛ e bi Titus nyɛɛ a hɛ mi konɛ a kɛ Yuda bi ɔmɛ nɛ ya hwu. Se benɛ Matsɛ Nero gbo ngɛ jeha 68 ɔ mi pɛ nɛ Vespasian kpale e se kɛ ya Roma konɛ a wo lɛ matsɛ. E ngɔ ta a kɛ wo e bi Titus dɛ, nɛ e ha lɛ ta buli 60, 000.

Ngɛ June jeha 70 ɔ mi ɔ, Titus fã ta buli ɔmɛ konɛ a ya poo tsohi nɛ ngɛ Yuda kɔpe ɔ mi ɔ. A ngɔ tso ɔmɛ kɛ fia gbogbo nɛ e kami maa su si tomi eywiɛ kɛ fã kɛ wo Yerusalɛm ma a he. Benɛ e ke suu September a, Roma bi ɔmɛ kpakpaa Yerusalɛm bi ɔmɛ a he ní, nɛ a kɛ la kpata ma a kɛ sɔlemi we ɔ hɛ mi. Tɛ ngmelu kake po piɛ kaa bɔ nɛ Yesu gba kɛ fɔ si ɔ. (Luka 19:43, 44) Akɔtaa bumi ko tsɔɔ kaa, “nihi maa pee ayɔ fã nɛ a hɛ mi kpata ngɛ Yerusalɛm ma a mi kɛ ma a he kpa amɛ hulɔ.”

Ngɛ jeha 71 ɔ mi ɔ, Roma bi ɔmɛ nya Titus he wawɛɛ nitsɛ kɛ ba Italy. Nihi tsuo nɛ a ngɛ ma a mi ɔ nya, ejakaa kunimi yemi nɛ ɔ ji kunimi yemi agbo nɛ e ko bɛ ma a mi hyɛ.

Roma bi ɔmɛ a nya kpɛ a he be nɛ a na ní kpakpahi fuu nɛ ta buli ɔmɛ kpakpaa nɛ a kɛ ba pue gbɛjegbɛ ɔmɛ a nɔ ɔ. A kɛ bua jɔmi hyɛ melehi nɛ a kpɔ̃ ngɛ Yuda bi ɔmɛ a dɛ ɔ, ta hwumi níhi nɛ a kpɔ̃, kɛ níhi nɛ a kpakpaa ngɛ Yerusalɛm sɔlemi we ɔ.

Ngɛ jeha 79 ɔ mi ɔ, Titus ba ye matsɛ ngɛ e tsɛ ɔ se. Se jeha enyɔ se pɛ nɛ Titus gbo tlukaa. Titus nyɛminyumu Domitian ba ye tsɛ ngɛ e se, nɛ e ma kaimi nɔ́ ngua kɛ wo Titus hɛ mi nyami.

Mwɔnɛ ɔ, nihi akpe lafahi abɔ nɛ a ya slaa si ngɛ Roma ma a mi nɛ a ya hyɛɛ Titus Kaimi nɔ́ ɔ a bua jɔ Kaimi Nɔ́ ɔ he wawɛɛ nitsɛ. A kpɛti ni komɛ naa kaimi Nɔ́ ɔ kaa nɔ́ ko nɛ a pee nɛ hɛ mi ngɛ nyami, nɛ ni komɛ hu naa lɛ kaa e ji yi jemi ngua ko kɛ ha he wami nɛ Roma nɔ yemi ɔ ngɛ ɔ. Se kɛ̃ ɔ, ni komɛ hu naa lɛ kaa e ji nɔ́ ko nɛ kadiɔ bɔ nɛ a ye Yerusalɛm ma a, kɛ sɔlemi we ɔ nɔ kunimi ha a.

Se nihi nɛ a kaseɔ Baiblo ɔ saminya a naa Titus Kaimi Nɔ́ ɔ kaa nɔ́ ko nɛ daa si kɛ ha nɔ́ ngua ko nɛ he hia wawɛɛ. E ji odase nɛ maa nɔ mi kaa Mawu lɛ ha nɛ a gba gbamihi nɛ a ngɛ Baiblo ɔ mi ɔ, nɛ Baiblo ɔ mi gbami ɔmɛ hu baa mi, nɛ wa ma nyɛ maa ngɔ wa hɛ kɛ fɔ nɔ.​—2 Petro 1:19-21.