Di Gapura Titus i, adong do gombar taringot naung diulahon halak Rom jala ringkot taboto. Holan saotik do na mamboto adong partalian ni Gapura i tu hatorangan na disurat di Bibel. Gapura i ma sada bukti, tutu do digohi surirang ni Bibel.

Di abad na parjolo Masehi, bidang do luat na dirajai Rom, sian Inggris dohot Gaul (saonari didok Prancis) sahat tu Misir. Sonang jala dame do situasi di luat i. Alai, adong sada luat na jotjot manusai Rom, i ma Judea.

Encyclopedia of Ancient Rome mandok, “Ndang mardame pamarenta ni Rom dohot halak Jahudi. Di angka luat na dirajai Rom, holan halak Jahudi do na sai manusai nasida. Ndang lomo roha ni halak Jahudi tu pamarenta ni halak Rom, na so parduli tu adat ni nasida. Jala halak Rom pe, sogo do roha ni nasida tu halak Jahudi [na di Judea] ala sai mangalo tu nasida.” Hirim do roha ni halak Jahudi asa adong pamimpin ni nasida na boi mangusir halak Rom jala padengganhon kota Israel. Alai taon 33 M, didok Jesus ma laho diripashon Jerusalem.

Jesus mandok, “Ro ma tingkina pajongjongon ni musum ma partahanan sian angka hau na pinsur jala halianganna ma ho, sosahonna ma ho sian humaliang. Padosdoson ni nasida ma ho tu tano jala ripashononna ma ianakhonmu. Ndang na laho tadingkonon ni nasida di hamu nanggo sada batu pe na martindi.”​—Lukas 19:43, 44.

Ndang diantusi angka sisean ni Jesus lapatan ni hata i. Dua ari dungkon i, tingki diida nasida joro ni Jerusalem, didok sada sian sisean i ma, “Guru, ida ma uli ni angka batu dohot bangunan i!” Ra, batu na dipangke di joro i ganjangna lobi sian 11 meter, bidangna 5 meter, jala timbona 3 meter! Alai dialusi Jesus ma, “Idaonmu do haduan, na ro nama tingkina ndang na laho adong nanggo sada batu na martindi muse dison na so dirumpakkon.”​—Markus 13:1; Lukas 21:6.

Dung i didok Jesus ma muse, “Molo diida hamu Jerusalem dihaliangi tentara, boto hamu ma nunga jonok hasesegana. Ingkon lari do halak na di Judea tu angka dolok. Laho ma sian i angka na di kota i, jala unang ma masuk tusi halak na di luar ni kota i.” (Lukas 21:20, 21) Tutu do i masa?

Nunga salpu 33 taon dung dipaboa surirang i, alai tong dope susa halak Jahudi dibahen halak Rom. Di taon 66 M, muruk situtu ma halak Jahudi ala adong na manangko hepeng sian bagas joro, i ma si Gessius Florus, pejabat ni halak Rom. Dipamate halak Jahudi ma tentara ni Rom na di Jerusalem jala dipaboa naung malua nasida sian halak Rom.

Tolu bulan dungkon i, laho ma 30.000 tentara ni Rom na diuluhon  si Cestius Gallus tu Jerusalem manaluhon angka pangalo. Disegai tentara ni Rom ma tembok ni joro bagian luar. Alai tompu ma tentara ni Rom kaluar sian Jerusalem. Ala naung kaluar tentara ni Rom dohot angka pangalo sian Jerusalem, boi ma halak Kristen kaluar sian Jerusalem, songon naung diparentahon Jesus. Laho ma nasida tu dolok di bariba ni sunge Jordan.​—Mateus 24:15, 16.

Dung sataon, marsangkap ma muse halak Rom mamorangi Judea. Na manguluhon, i ma Jenderal Vespasianus dohot anakna, si Titus. Alai taon 68 M, mate ma Kesar Nero. Mulak ma si Vespasianus tu Rom laho manggantihon si Nero. Gabe si Titus ma na manguluhon 60.000 tentara ni Rom mamorangi Judea.

Bulan Juni taon 70 M, disuru si Titus ma tentarana manaba hau di Juda laho dipangke mambahen pagar di humaliang ni Jerusalem. Pitu kilometer ma ganjang ni pagar i. Bulan September, dibuat tentara ni Rom ma arta ni halak Jahudi jala ditutung ma Jerusalem dohot bagas joro. Dirumpakhon do sude batu ni joro, songon naung disurirangkon Jesus. (Lukas 19:43, 44) Sada laporan mandok, “Adong hira-hira satonga juta na mate di Juda dohot luat na asing di Jerusalem.”

Taon 71 M, mulak ma si Titus tu Italia. Marlas ni roha do sude halak Rom manjangkon ibana. Dibahen do pesta na balga jala sude halak di kota i dohot mangarayahon i.

Di pesta i, longang do roha ni angka halak mangida pawai na dibahen di angka dalan di Rom. Dipatudu do godang ni arta ni halak Rom, songon angka kapal, angka barang naung dibuat sian joro di Jerusalem, jala dibahen do pertunjukan na patuduhon songon dia halak Rom marporang.

Taon 79 M, si Titus ma manggantihon si Vespasianus. Alai dua taon dungkon i, mate ma si Titus. Anggina, si Domitianus ma na manggantihon ibana jala dibahen ma gapura laho mamparsangapi si Titus.

Ganup taon, marratus ribu halak ro tu Forum Romawi, i ma pusat kota di Rom najolo. Longang do roha ni nasida mangida Gapura Titus. Adong na mandok, bangunan na mansai denggan do i. Na asing mandok, i ma bukti na gogo pamarentaon ni halak Rom. Adong muse na gabe taringot tu halelengse ni Jerusalem dohot jorona tingki mangida Gapura i.

Alai di angka na mamparsiajari Bibel, Gapura Titus on gabe bukti na patuduhon molo surirang na disurat di Bibel boi dihaporseai, sintong, jala ro sian Debata Jahowa.​—2 Petrus 1:19-21.