Bas dindingna lit dua ukiren si galang, si nceritaken kejadin si penting mbarenda. Nterem si la metehsa hubungen antara bangunen e ras Pustaka—bangunen Titus e jadi saksi bisu kerna ramalen i bas Pustaka.

I bas awal abad pertama Masehi, ikuasai Kerajan Roma daerah mulai Inggris ras Gaul (gundari Prancis) nari seh ku Mesir, bage pe daerah-daerah si makmur. Tapi lit sada daerah si ndauh si rusur erban masalah man Roma, eme provinsi Judea.

Ikataken Encyclopedia of Ancient Rome, “Daerah-daerah si ikuasai kalak Roma la bagi Judea, si rusur ngelawan. Segat ate kalak Jahudi man kalak Roma si ngkuasai ia, perban la iergai kalak e adatna, janah kalak Roma pe la ipediatna kalak Jahudi si keras kepala e bage saja.” Nterem kalak Jahudi si ngarapken peminpin si banci nelamatken ia alu mpelawes kalak Roma janah keadan kalak e banci mulihken bagi si mbarenda. Tapi bas tahun 33 M, ikataken Jesus maka hancur pagi Jerusalem.

Nina Jesus, “Reh me warina sanga musuh-musuhndu mbangun benteng kayu si ntelap i sekelilingndu jenari ikepungna kam janah iserangna kam arah japa pe. Ikernepken kalak e pagi kam ras anak-anakndu, janah la pagi itadingkenna sada batu pe i datas batu si debanna.”​—Lukas 19:43, 44.

Mamang ate murid-muridna megi ranan Jesus e. Dua wari kenca si e, sanga inen murid-muridna rumah pertoton Jerusalem, sada arah kalak e ngataken, “O Guru, nenlah! Luar biasa kel batu-batu ras bangunen enda!” Menurut laporen, batu-batu rumah pertoton e gedangna lebih 11 meter, belangna 5 meter, janah gedangna 3 meter! Tapi nina Jesus, “Reh me paksana kerina si idah kena e iruntuhken pagi. Lanai pagi lit sada batu pe itadingken i datas batu si debanna.”​—Markus 13:1; Lukas 21:6.

Enggo ikataken Jesus man kalak e, “Selain si e, sanga idah kena kota Jerusalem ikepung tentera si erkemah, iteh kena maka keruntuhenna nggo ndeher. Kalak si lit i bas Judea arus kiam ku deleng-deleng, kalak si lit i bas tengah kota e arus lawes, janah kalak si lit i bas kuta-kuta sekelilingna, ula masuk ku kota e.” (Lukas 21:20, 21) Payo nge terjadi kata-kata Jesus e?

Enggo lit 33 tahun kenca ikataken Jesus ramalen e, tapi Judea tetap ikuasai Roma. Bas tahun 66 M Gesius Florus si erkuasa bas Judea, ibuatna sumbangen bas rumah pertoton, emaka merawa kel kalak Jahudi. La ndekah kenca si e, nterem kalak Jahudi si mberontak reh ku Jerusalem janah ibunuhina tentera Roma si lit i je, iumumken kalak e ka maka bebas atena arah kalak Roma.

 Telu bulan kenca si e, lebih 30.000 tentera Roma si ipinpin Cestius Gallus, reh ku Roma janah ibunuhna kerina pemberontak Jahudi e. Masuk kalak e ku kota janah iruntuhkenna dinding si lit i deher rumah pertoton. Tapi la iteh kai alasenna rempet kalak Roma mulih. Meriah kel ukur pemberontak Jahudi janah iayakna kalak e. Perban tentera Roma ras pemberontak Jahudi lanai i je, ilakoken kalak Kristen kai si iperentahken Jesus, lawes kalak e nadingken Jerusalem ku deleng si lit i deher Lau Jordan.​—Matius 24:15, 16.

Setahun kenca si e, reh ka mulihi kalak Roma nyerang Judea, kalak e ipinpin Jenderal Vespasianus ras anakna, Titus. Tapi bas tahun 68 M, mate Kaisar Nero, mulihken Vespasianus ku Roma guna jadi Kaisar, isuruhna anakna Titus ras 60.000 tenterana nyerang Judea.

Bas bulan Juni 70 M, isuruh Titus tenterana nabah kayu-kayu si lit i Judea, si ipajekkenna jadi benteng si ngkelilingi Jerusalem 7 kilometer. Bas bulan September, ibuati kalak Roma erta-erta bas Jerusalem, itutungna kota e janah ihancurkenna rumah pertoton, bali bagi si nggo ikataken Jesus. (Lukas 19:43, 44) Menurut perkiran si mbarenda, “hampir 500.000 kalak mate i Jerusalem bage pe daerah-daerah i deherna.”

Bas tahun 71 M, mulihken me Titus ku Italia janah alu luar biasa ialo-alo kalak Roma ia. Kerina kalak Roma ngerayakenca alu perayan kemenangen i bas kota.

Megah akap jelma si nterem sanga iidahna ipamerken kebayaken Roma bas dalan. Meriah kel akap kalak e ngidah kapal si idat arah erperang, bage pe gambar-gambar kerna perang, ras barang-barang si ibuat arah rumah pertoton Jerusalem nari.

Titus jadi kaisar nggantiken bapakna Vespasianus bas tahun 79 M. Tapi dua tahun kenca si e, rempet Titus mate. Adekna, Domitianus, naik takhta nggantiken ia janah minter ibangunna bangunen kemenangen guna pengergan man Titus.

Gundari, lit ratusen ribu kalak si tiap tahun reh ku Roma janah ipujikenna Bangunen Titus e. Lit si nganggap bangunen enda karya seni si hebat, si deban ianggapna enda pengergan man kaisar Roma si erkuasa, janah lit ka si ianggapna enda jadi tanda uga mbarenda Jerusalem ras rumah pertotonna hancur.

Kalak si teliti i bas mbaca Pustaka, itehna lit erti si lebih penting arah Bangunen Titus e. Enda eme saksi bisu si mbuktiken alu jelas maka ramalen bas Pustaka banci iteki janah mbuktiken maka ramalen e rehna bas Dibata nari.​—2 Petrus 1:19-21.