Tugu Titus bisi dua iti ukir ti ngambarka sejarah ti ditemu mayuh orang ba menua nya. Taja pia, bisi siti utai ti enda ditemu mayuh orang entara tugu nya enggau Bup Kudus—Tugu Titus bukti ke nunjukka utai ti dipadah ba Bup Kudus endang amat.

Ba taun 30 M., kuasa Perintah Rome berengkah ari Britain, Gaul (diatu dikumbai Perancis) nyentuk ngagai Ejip. Sida bisi pemaik enggau pengaya. Tang bisi siti menua ke suah ngemediska ati Perintah Rome, iya nya menua Judea.

Nitihka Encyclopedia of Ancient Rome: “Sekeda endur ke dipegai Rome balat begedika pangan diri, chunto baka Judaea. Orang Judah begedika kuasa ti megai sida ke enda ibuhka adat sida, lalu orang Rome jai sereta udu nekan orang Judah ketegal orang Judah balat kieh.” Mayuh orang Judah ngarapka deka bisi seiku pengari ke ulih ngelepaska sida ari dipegai kuasa Rome lalu mulaika Israel nyadi tebilang baru. Tang ba taun 33 M., Jesus Kristus bisi madahka Jerusalem deka dirusakka.

Ku Jesus: “Maya deka datai alai bala munsuh nuan deka ngaga kuta tanah [‘pagar kayu,’ NW] ngelingi nuan kena ngelulung nuan, lalu mekulka nuan. Sida deka ngerusak nuan, enggau orang ke diau dalam nuan, lalu sigi pen nadai mega batu ditejuka mengkang betusun dalam nuan.”—Luke 19:43, 44.

Jaku Jesus ngasuh bala murid iya bingung. Dua hari pengudah nya, lebuh meda Rumah Sembiang ba Jerusalem, seiku ari murid iya madah: ‘Pengajar, peda nuan pemesai batu enggau pemesai rumah nya!’ Sekeda batu ba Rumah Sembiang nya panjai iya lebih ari 11 meter (36 kaki), buka iya 5 meter (16 kaki), lalu peninggi iya 3 meter (10 kaki)! Tang Jesus nyaut: “Pasal utai tu ti dipeda kita, maya deka datai alai batu tu nadai agi betusun baka tu; semua deka diruntuhka magang.”—Mark 13:1; Luke 21:6.

Ku Jesus nampung: “Lebuh kita meda Jerusalem dikelulung bala soldadu, nya baru kita deka nemu nengeri nya deka dirusak enda lama da agi. Lebuh maya nya, orang ke diau di Judea enda tau enda rari ngagai bukit. Lalu orang ke di nengeri enda tau enda angkat ari nengeri nya, lalu orang ke di menua pesisir enda tau tama ngagai nengeri.” (Luke 21:20, 21) Kati utai ku Jesus amat nyadi?

³³ taun udah abis, lalu Judea agi begedika Perintah Rome. Tang ba taun 66 M., orang Judah enda ulih ngenatka agi pengeringat sida lebuh pemesai Rome ba Judea ke benama Gessius Florus ngenchuri duit ba sarang wang Rumah Sembiang. Enda lama udah nya, orang Judah angkat ngelaban nyerang Jerusalem lalu munuh soldadu Rome ke nyaga kuta nya lalu madahka sida bibas ari kuasa Perintah Rome.

Tiga bulan pengudah nya, Cestius Gallus ngiring lebih ari 30,000 iku  soldadu Rome lalu mansang ngagai Jerusalem kena ngetuka pengawa ngelaban. Soldadu Rome tama ngagai kuta nya lalu ngasuh dinding luar ba Rumah Sembiang enda tegap agi. Tang enda nemu nama kebuah, sida nikal baru. Orang Judah ti ngelaban balat gaga ati lalu enggau lengkas nitihka sida. Lebuh kedua-dua piak nya nadai, orang Kristian ngasika jaku tangkan Jesus. Sida pansut ari Jerusalem lalu ngerarika diri ngagai bukit, ngelebus Sungai Jordan.—Matthew 24:15, 16.

Setaun pengudah nya, Rome ngaga pelan ti baru deka nyerang Judea. Jeneral Vespasian enggau anak iya Titus deka ngulu ba pengawa tu. Tang ba taun 68 M., Raja Besai Nero midang tauka mati. Vespasian pulai ngagai Rome lalu nyadi raja besai. Taja pia, iya ngasuh Titus, anak iya enggau 60,000 iku soldadu neruska pengawa ke udah diperambuka sida.

Ba bulan Jun taun 70 M., Titus ngasuh bala soldadu iya nebang pun kayu ba luar menua Judea kena ngaga pagar kayu pemanjai 7 kilometer (4.5 batu) ngelulung Jerusalem. Tiga bulan udah nya, orang Rome ngambi semua utai ti berega sereta nunu kuta nya nyengkaum Rumah Sembiang. Baka ke dipadah Jesus, nadai sigi pan batu ditejuka mengkang betusun ba kuta nya. (Luke 19:43, 44) Nitihka siti pansik, “nyauka 500,000 iku orang mati ba Jerusalem enggau ba serata nengeri.”

Ba taun 71 M., Titus pulai baru ngagai Itali lalu disambut rayat Rome enggau pengaga ati. Sida ngintu pemenang Titus ke udah ngalahka nengeri Judea. Pengawa tu ti pemadu besai ke kala diintu ba indu nengeri nya.

Rayat Rome temegah lebuh sida meda pengaya ti dipandangka ba pengerami nya. Sida meda perau mit ke dirampas, kerita ke diias ti nunjukka utai ke nyadi maya perang sereta utai berega ke diambi ari Rumah Sembiang ba Jerusalem.

Titus nganti apai iya Vespasian nyadi raja besai ba taun 79 M. Tang dua taun udah nya, Titus midang enggau ngenyit. Domitian, menyadi iya ke biak, nyadi raja besai lalu ngaga siti tugu kena meri basa ngagai Titus.

Kemayaharitu, beratus ribu iku orang ke datai ngagai Rome ninting taun rindu meda Tugu Titus. Sekeda ngumbai tugu nya asil seni ti amat manah, lalu sekeda ngumbai nya kena ngingatka kuasa Perintah Rome. Ke bukai ngumbai tugu nya kena ngenang Jerusalem sereta Rumah Sembiang iya ke udah dirusakka.

Taja pia, pemacha Bup Kudus nemu Tugu Titus bisi ngembuan reti ti besai agi. Tugu nya bukti ti nunjukka utai ke dipadah ba Bup Kudus endang amat sereta ulih dikearapka. Pia mega, iya nunjukka Bup Kudus endang bepun ari Petara.—2 Peter 1:19-21.