Ekinyumba eki kuli ebisasani binene-binene bibiri ebik’imanira ekindu ekyasibwe kutsibu ekyabya kera. Aliwe ekithasibwe kutsibu okwa kinyumba eki, ly’erihambangana erikaswekaya eriri ahakathi-kathi kakyo ne Biblia​—Ekinyumba kya Titus eki kikaha obwema obuli bukuthu obuhambire okw’ibererera ly’amaminyereri we Biblia.

Ah’omwaka wa 30 E.K. ahikira, Obuthabali bwe Roma bwabya bulhabire e Britain ne Gaul (hathya eyasibwe nge France) erihika e Misiri, kandi ekitsweka eki kyabya mw’obuthekane bunene n’engulha-kulhana. Aliwe omwanya mughuma iniakalyambaya e Roma​—e Yudea eyithabya mw’obuthekane.

Ekitabu Encyclopedia of Ancient Rome kikabugha kithi: “Ni bitsweka bike ebyabya ahisi sy’obuthabali bwe Roma ebyabya bibuponire kutsibu nge Yudea. Abayuda mubaghana abathabali ab’ehandi ababya bakagheghena emirwa yabo, neryo Abaroma mubakolha Abayuda banabi n’eribanubya kutsibu.” Abayuda bangyi babya bawithe amaha bathi bakendi syathunga omuthabali oyuwanga thibithire okwa Banya Roma abababya baponire n’erithasyasubya e Israeli omwa ngebe eyuwene. Aliwe omwa 33 E.K., Yesu Kristo mwabugha athi hane akabi akakayahika oku Yerusalemu.

Yesu mwabugha athi: ‘Ebiro byasyasa okw’inywe, okwa mughulhu oyo esyonzighu syawu syasyahangania olhuhimbo embere syenyu n’eribathimbako, n’eribakakirya oko mbande syosi. Basyabaghusa ahisi haghuma n’abandu abali omw’isi wawu; isibendisyasigha eribwe n’erighuma endatha oko lindi.’​—Luka 19:43, 44.

Ebya Yesu abugha mubyaswekya abigha biwe. Habere habirilhaba biro bibiri, omughuma w’okw’ibo abere abirisamalira ehekalu ye Yerusalemu, mwabugha athi: “Mukangirirya, lebaya! Amabwe angaha n’amanyumba angaha w’eriswekera!” Ni kwenene, kikabughawa indi awandi mabwe w’ehekalu abya w’obuthambi obulhabire fiti 35 (metere 11), n’obwaghali obwa fiti 15 (metere 5) n’obuuli bwa fiti 10 (metere 3)! Aliwe, mwasubirya athi: ‘Emyatsi eyo mukalhangira eyo, ebiro bikendisyasa n’okwa mughulhu oyo, sihendi syasighalha eribwe n’erighuma endatha okwa lindi erithendisyasambulirwa ahisi.’​—Mariko 13:1; Luka 21:6.

Yesu mwongerako athi: ‘Omughulhu mukalhangira e Yerusalemu iyinathimbwirweko n’emilhondo y’amalhwa, neryo imwaminya erihera lyagho ko lyamabihika hakuhi. Oko mughulhu oyo, abali e Yudea basaghire oko bithwa; n’abali omwa muyi balhwe mugho, kandi abali omwa biharo sibasyehulhukira oko muyi.’ (Luka 21:20, 21) Ebinywe bya Yesu mubyanabererera?

Muhalhaba myaka makumi asathu n’isathu, e Yudea iyikinaponire eribya omwa buthabali bw’Abanya Roma. Aliwe omwa 66 E.K. omughulhu omughuma w’okwa bakulhu omwa buthabali bwe Roma oyuwabya imanire e Yudea, iya Gessius Florus, aheka esyosente erilhua omwa kasanduku k’ehekalu, kundi Abayuda babya ibanahithene, mubathaghumira ekyo. Neryo, amahe w’Abayuda mwingira omwa Yerusalemu, amakera abasirikali Abanya Roma, n’eriranga ngoku sibakiri ahisi sy’obuthabali bwe Roma.

Habere halhaba myezi ng’isathu, amahe w’Abanya Roma awalhabire omu  30,000, iniane musondolhwa na Cestius Gallus, mwingira omwa Yerusalemu erighunzaho eriyisamambulha eri. Abanya Roma mubalhuaho ibingira omwa muyi n’eritsekya esyombimbo sy’eyihya esy’ehekalu. Habw’esyonzumwa esithasibwe, mubasubayo. Abayuda abayisamambuli mubatsema n’eribathibithako. Kundi amahe w’Abanya Roma n’aw’Abayuda awosi abya isyakiri omwa muyi, Abakristayo abaghendera okw’ikunga lya Yesu, mubalhua omwa Yerusalemu n’erithibitha omwa bithwe enyuma sy’Olhusi Yorodani.​—Matayo 24:15, 16.

Omwaka owakwamako, e Roma muyathasyatsuka amalhwa wayo ne Yudea, oyuwasondolhagho abya ini General Vespasian na mughalha wiwe, Titus. Aliwe, Omuthabali Nero abere abiriholha omwa 68 E.K., Vespasian mwasuba e Roma eriyabya muthabali, amasighira mughalha wiwe iya Titus amalhwa we Yudea, n’abasirikali nga 60,000.

Omwa Kwomukagha 70 E.K., Titus mwalhaghira abasirikali biwe athi batheme emithi omwa Yudea, eya kolesibawa okwa buhimbe bw’olhuhimbo olhw’ebilometere 7 erithimba okwa Yerusalemu olhwabya lhuhimbire omwa mithi eyisongire okwa mithwe-mithwe. Habere halhaba myezi ng’isathu, Abanya Roma mubanyegha n’erihisya omuyi n’ehekalu n’erihimbulhayo libwe kwa libwe ngoku Yesu anabya iniabirilhaghulha. (Luka 19:43, 44) Erikwamana n’eribaririra lighuma, hakuhi abandu nga 500,000 mubithibwa omwa Yerusalemu n’omwa bindi bitsweka.

Omwa 71 E.K., Titus mwasuba e Italia neryo abandu be Roma mubamuthangirira n’ebitsange binene. Busana n’erisingura eri, omwa muyi mumwabya etseme nene eyabya isiyiriyathabyamo.

Abandu mubasweka bakalhangira ebindu binene kutsibu ebya lethawa omwa muyi we Roma. Mubatsema bakalhangira amathu awanyeghawa, n’ebindi bindu ebyabya bikakangania amalhwa, n’ebindu ebya nyeghawa omwa hekalu ye Yerusalemu.

Titus mwasuba omwa bwa thatha wiwe iya Vespasian ng’omuthabali mukulhu omwa 79 E.K. Aliwe habere halhaba myaka ibiri, Titus mwaholha kitsumbukirania. Domitian, mughalha wabu, mwatsuka erithabalha n’erilhuaho iniahimbisya ekinyumba ekikakanganaya erisingura omw’isikya Titus.

Munabwire ekinyumba ekyahimbawa busana na Titus eki kikatsemesaya abandu bangyi abakabungira e Roma obuli mwaka. Abangyi bakalhangira ekinyumba eki ng’ekindu ekyuwene ekikokothirye ndeke, abandi ibakilhangira ng’ekikakanganaya amaaka agho obuthabali bwe Roma bwabya buwithe, aliwe n’abandi ibakilhangira ng’ekikibukaya eriwa lye Yerusalemu n’ehekalu yayu.

Aliwe abakasoma e Biblia ya ndeke, ibo bakalhangira Ekinyumba kya Titus ng’ekikamanyisaya ekindu ekilhabire ebyosi ebi. Bakalhangira ini kindu ekiri bukuthu ekikaha obwema obukakanganaya eriyikethera n’eribererera ly’amaminyereri we Biblia kandi kikaghumaya ngoku amaminyereri aya akalhua oku Nyamuhanga.​—2 Petero 1:19-21.