Arkata li tagħti xhieda li l-profezija twettqet bl-eżatt
F’NOFS RUMA, HEMM ARKATA LI TIRRAPPREŻENTA REBĦA. DIN IMORRU JARAWHA ĦAFNA NIES MINN MADWAR ID-DINJA KOLLHA. L-ARKATA TONORA WIEĦED MILL-IMPERATURI FAVORITI TAʼ RUMA—TITU.
L-Arkata taʼ Titu fiha żewġ skulturi kbar li juru ġrajja magħrufa sew fl-istorja. Imma ħafna nies ma tantx jafu li hemm ukoll rabta interessanti bejn l-arkata u l-Bibbja—l-Arkata taʼ Titu hi xhud li bla kliem tagħti evidenza taʼ kemm hi eżatta l-profezija tal-Bibbja.
BELT IKKUNDANNATA
Fil-bidu tal-ewwel seklu wara Kristu (WK), l-Imperu Ruman kien mifrux mill-Brittanja u l-Gallja (illum Franza) sal-Eġittu. Dan it-territorju kien stabbli u sinjur b’mod straordinarju. Imma kien hemm post fil-bogħod li lil Ruma kien jagħtiha ħafna inkwiet—dan il-post kien il-provinċja tal-Lhudija.
L-Encyclopedia of Ancient Rome tgħid: “Il-Lhudija kienet waħda mill-ftit territorji taħt il-kontroll taʼ Ruma li kien jidher ċar li ż-żewġ naħat kienu jobogħdu lil xulxin. Il-Lhud ma kinux jaħmluhom lir-Rumani għax ma kienx jimpurtahom mit-tradizzjonijiet tagħhom. Min-naħa l-oħra, peress li l-Lhud kellhom rashom iebsa, ir-Rumani kienu jittrattawhom ħażin ħafna.” Ħafna Lhud ittamaw li mexxej setaʼ jsalvahom u jkeċċi lir-Rumani li huma tant kienu jobogħdu. B’hekk, Iżrael setaʼ jerġaʼ jikseb il-glorja li kellu qabel. Imma fis-sena 33, Ġesù Kristu kien ħabbar li Ġerusalemm kienet se tiffaċċja katastrofi.
Ġesù qal: “Jiġu fuqek il-jiem meta l-għedewwa tiegħek jibnu madwarek ħajt bi zkuk ippontati u jdawruk u jnikktuk minn kull naħa, u jsabbtu maʼ l-art lilek u lil uliedek li hemm fik, u ma jħallux fik ġebla fuq oħra.”—Luqa 19:43, 44.
Mid-dehra, il-kliem taʼ Ġesù ħawwad lid-dixxipli tiegħu. Jumejn wara, xħin raw it-tempju taʼ Ġerusalemm, wieħed minnhom qallu: “Għalliem, ara! X’ġebel u x’bini dan!” Fil-fatt jingħad li xi ġebel tat-tempju kien twil iktar minn 11-il metru, wiesaʼ iktar minn 5 metri, u għoli iktar minn 3 metri! Imma Ġesù wiġibhom: “Dan li qed taraw, se jiġu l-jiem meta hawnhekk ma titħalliex ġebla fuq oħra li ma tiġġarrafx.”—Marku 13:1; Luqa 21:6.
Ġesù mbagħad qalilhom: “Meta taraw lil Ġerusalemm imdawra bil-kampijiet taʼ l-armati, imbagħad kunu afu li qorbot il-ħerba tagħha. Imbagħad dawk li jkunu fil-Lhudija ħa jibdew jaħarbu lejn il-muntanji, u dawk li jkunu f’nofsha ħa joħorġu minnha, u dawk li jkunu fil-kampanja ħa ma jidħlux fiha.” (Luqa 21:20, 21) Il-kliem taʼ Ġesù twettaq?
BELT MEQRUDA
Wara li għaddew 33 sena, il-Lhud kienu għadhom jobogħdu l-fatt li kienu taħt ir-Rumani. Imma fis-sena 66 WK, meta l-prokuratur tal-Lhudija Gessius Florus qabad u ħa l-flus mit-teżorerija tat-tempju sagru, il-Lhud irrabjati ma felħux iktar. Ftit wara, ġellieda Lhud daħlu f’Ġerusalemm, qatlu lis-suldati Rumani li kienu jgħixu hemm, u ddikjaraw l-indipendenza tagħhom minn Ruma.
Xi tliet xhur wara, iktar minn 30,000 suldat Ruman, immexxijin minn Ċestju Mattew 24:15, 16.
Gallu, irħewlha lejn Ġerusalemm biex iġibu r-ribelljoni fix-xejn. Ir-Rumani nifdu l-belt billi ħaffru taħt is-sur taʼ barra tan-naħa tat-tempju. Imbagħad, bla mistenni telqu lura. Ir-ribelli Lhud ferħu ħafna u mill-ewwel telqu għal warajhom. Meta s-suldati Rumani u r-ribelli Lhud telqu mill-belt, il-Kristjani obdew it-twissija li kien tahom Ġesù u ħarbu minn Ġerusalemm lejn il-muntanji, fuq in-naħa l-oħra tax-Xmara Ġordan.—Is-sena taʼ wara, Ruma reġgħet bdiet il-kampanja biex tiġġieled kontra l-Lhudija. Ir-Rumani kienu mmexxijin mill-Ġeneral Vespasjanu u t-tifel tiegħu Titu. Imma ftit wara li miet l-Imperatur Neruni fis-sena 68 WK, Vespasjanu rritorna lejn Ruma biex isir l-Imperatur, u għalhekk ħalla l-kampanja militari kontra l-Lhudija f’idejn it-tifel tiegħu Titu, b’armata taʼ xi 60,000 suldat.
F’Ġunju tas-sena 70 WK, Titu ordna lis-suldati tiegħu biex jaqtgħu s-siġar tal-Lhudija. Dawn użawhom biex jibnu ħajt bi zkuk ippontati madwar Ġerusalemm. Dan il-ħajt kien twil 7 kilometri. Sa Settembru, ir-Rumani kienu serqu l-belt, ħarqu lilha u t-tempju tagħha, u ma ħallewx ġebla fuq oħra, bħalma Ġesù kien bassar snin qabel. (Luqa 19:43, 44) Skont stima li aktarx hi inqas mir-realtà, “mietu bejn kwart u nofs miljun persuna f’Ġerusalemm u fil-bqija tal-pajjiż.”
REBĦA KBIRA
Fis-sena 71 WK, Titu mar lura l-Italja u ċ-ċittadini taʼ Ruma laqgħuh b’ferħ kbir. Dawk kollha fil-belt iċċelebraw waħda mill-ikbar purċissjonijiet taʼ rebħa li qatt kien hemm f’Ruma.
Il-folol stagħġbu bil-ġid materjali kbir li kienu qed jaraw fit-toroq taʼ Ruma. Huma tpaxxew iħarsu lejn id-dgħajjes li kienu nħatfu, lejn il-karrijiet kbar li fuqhom kellhom tpinġijiet taʼ xeni tal-gwerra, u lejn l-affarijiet li kienu nsterqu mit-tempju taʼ Ġerusalemm.
Titu laħaq imperatur wara missieru Vespasjanu fis-sena 79 WK. Imma wara biss sentejn, Titu miet ħabta u sabta. Ħuh Domizjanu sar imperatur minfloku u wara ftit għamel arkata biex tfakkar ir-rebħa li kellu Titu.
L-ARKATA LLUM IL-ĠURNATA
L-Arkata taʼ Titu f’Ruma llum il-ġurnata
Kull sena, mijiet t’eluf taʼ nies li jmorru Ruma jammiraw l-Arkata taʼ Titu. Xi wħud iqisuha bħala biċċa arti mill-isbaħ, oħrajn bħala unur għall-qawwa tal-Imperu Ruman, u jerġaʼ oħrajn bħala tifkira taʼ meta Ġerusalemm u t-tempju tagħha spiċċaw taħt idejn ir-Rumani.
Madankollu, dawk li jaqraw il-Bibbja b’attenzjoni jqisu l-Arkata taʼ Titu bħala li għandha iktar importanza. Din hi xhud li bla kliem tikkonferma li l-profeziji tal-Bibbja huma taʼ min joqgħod fuqhom u eżatti u tagħti prova li huma ispirati minn Alla.—2 Pietru 1:19-21.