ဟောကိန်း တိကျမှန်ကန်ကြောင်း အသံတိတ်သက်သေ
အီတလီနိုင်ငံ၊ ရောမမြို့လယ်မှာ ကမ္ဘာတစ်ဝန်းက ဧည့်သည်တွေကို ဆွဲဆောင်တဲ့ အထိမ်းအမှတ်မုခ်ဦးကြီး ရှိတယ်။ ရောမတွေရဲ့ အသည်းစွဲ ဧကရာဇ် တိုက်တပ်ကို ဂုဏ်ပြုတဲ့ မုခ်ဦး ဖြစ်တယ်။
တိုက်တပ်မုခ်ဦး ဘေးနှစ်ဖက်မှာ သမိုင်းဝင် ဖြစ်ရပ်ကြီးကို ရုပ်ကြွပုံတွေနဲ့ ဖော်ပြထားတယ်။ အဲဒီမုခ်ဦးနဲ့ ကျမ်းစာ ဆက်စပ်နေ ပုံကိုတော့ လူတွေ သိပ်မသိကြဘူး။ တိုက်တပ်မုခ်ဦးဟာ ကျမ်းစာဟောကိန်း အတိ အကျ ပြည့်စုံတယ်ဆိုတဲ့ အသံတိတ် သက်သေပါပဲ။
စီရင်ချက်ချခံရတဲ့ မြို့တော်
အေဒီ ပထမရာစုအစောပိုင်းမှာ ရောမအင်ပါယာဟာ ဗြိတိန်နဲ့ ဂေါလ် (ယခု ပြင်သစ်) ကနေ အီဂျစ်ပြည်အထိ နယ်မြေ ချဲ့ထွင်ပြီး မကြုံစဖူး အေးချမ်းသာယာခဲ့တယ်။ ဒါပေမဲ့ တော်လှန်ပုန်ကန်တဲ့ ယုဒနယ် ကတော့ ရောမတို့အတွက် အမြဲစိတ်ပျက် စရာ ဖြစ်ခဲ့တယ်။
Encyclopedia of Ancient Rome မှာ ဒီလိုဖော်ပြထားတယ်– “ရောမ လက်အောက်ခံ နယ်မြေအနည်းငယ်မှာပဲ ယုဒ နယ်လို ရန်လိုမှုတွေ ရှိနေတယ်။ ဂျူးယဉ်ကျေးမှုကို အလေးမထားတဲ့ ရောမတွေကို ဂျူးတွေ မကျေမချမ်း ဖြစ်သလို ရောမတွေကလည်း ဂျူးတွေရဲ့ ခေါင်းမာမှုကို သည်းမခံနိုင်ကြဘူး။” မုန်းစရာကောင်းတဲ့ ရောမတွေကို မောင်းထုတ်ပြီး အစ္စရေးတွေအတွက် ရွှေခေတ်တစ်ခေတ် ပေါ်ထွန်းစေမယ့် မေရှိယခေါင်းဆောင်ကို ဂျူးတွေ မျှော်လင့်ခဲ့ကြတယ်။ ဒါပေမဲ့ ဂျေရုဆလင်မြို့ ဘေးဆိုး ကြုံရမယ့်အကြောင်း အေဒီ ၃၃ မှာ ယေရှုခရစ် ကြေညာခဲ့တယ်။
ယေရှု ဒီလိုပြောခဲ့တယ်– “ရန်သူတွေက မင်းရဲ့ပတ်လည်မှာ တုတ်ချွန်ခံတပ်ကို ဆောက်ပြီး လေးဖက်လေးတန် ဝိုင်းရံပိတ်ဆို့မယ့်အချိန် ရောက်လာလိမ့်မယ်။ သူတို့က မင်းနဲ့ မင်းရဲ့သားသမီးတွေကို လုံးဝ ဖျက်ဆီးပစ်လိမ့်မယ်။ ကျောက်တစ်တုံးပေါ်တစ်တုံး ဆင့်ပြီး ကျန်နေမှာ မဟုတ်ဘူး။”—လုကာ ၁၉:၄၃၊ ၄၄။
ယေရှုရဲ့ စကားတွေကြောင့် တပည့်တွေ စိတ်ရှုပ်ထွေးခဲ့ကြတယ်။ နှစ်ရက်ကြာပြီးတဲ့နောက် ဂျေရုဆလင် ဗိမာန်တော်ကို ကြည့်တဲ့အခါ တပည့်တစ်ယောက်က “ဆရာ၊ ဟောဒီကျောက်တုံးတွေ၊ အဆောက်အအုံတွေကို ကြည့်လိုက်ပါဦး” လို့ပြောတယ်။ ဗိမာန်တော်ကျောက်တုံးတချို့ဟာ အလျား ၃၆ ပေ (၁၁ မီတာ)၊ အနံ ၁၆ ပေ (၅ မီတာ)၊ အမြင့် ၁၀ ပေ (၃ မီတာ) လောက် ရှိတယ်။ ဒါပေမဲ့ ယေရှုက “အခု ခင်ဗျားတို့ မြင်နေရသမျှ တစ်နေ့ ဖြိုချခံရလိမ့်မယ်။ ကျောက်တစ်တုံးပေါ် တစ်တုံး ဆင့်ပြီး ကျန်နေမှာ မဟုတ်ဘူး” လို့ပြန်ပြောတယ်။—မာကု ၁၃:၁။ လုကာ ၂၁:၆။
“ဂျေရုဆလင်မြို့ကို စစ်တပ် ဝိုင်းရံထားတာ ခင်ဗျားတို့ မြင်ရတဲ့အခါ ဒီမြို့ပျက်စီးတော့မယ်ဆိုတာ သိလိုက်ပါ။ အဲဒီအချိန်ရောက်ရင် ယုဒနယ်မှာနေတဲ့သူတွေ တောင်ပေါ်ကို ပြေးကြ။ မြို့ထဲကလူတွေ မြို့ပြင် ထွက်ကြ။ တောရွာက လူတွေလည်း မြို့ထဲ မဝင်နဲ့တော့” လို့ ယေရှု ပြောသေးတယ်။ (လုကာ ၂၁:၂၀၊ ၂၁) ပြောတဲ့အတိုင်း တကယ်ဖြစ်လာသလား။
မြို့တော် ကျဆုံးခြင်း
သုံးဆယ့်သုံးနှစ် လွန်သွားပေမဲ့ ယုဒနယ်ဟာ ရောမတွေကို မုန်းတီးနေဆဲပဲ။ ဒါပေမဲ့ အေဒီ ၆၆ မှာ ယုဒပြည်ရဲ့ ရောမဘုရင်ခံ ဖလောရပ်စ်က ဗိမာန်တော်ဘဏ္ဍာတိုက်ထဲက ရန်ပုံငွေတွေကို သိမ်းလိုက်တော့ ဂျူးတွေ ဒေါသပေါက်ကွဲကြတော့တယ်။ မကြာ ခင်မှာပဲ ဂျူးတိုက်ခိုက်ရေးသမားတွေက ဂျေရုဆလင်မြို့ထဲ အုပ်လိုက် ဝင်လာ၊ ရောမမြို့စောင့်တပ်သားတွေကို သတ်ဖြတ်ပြီး လွတ်လပ်ရေး ကြေညာလိုက်ကြတယ်။
သုံးလလောက် ကြာတဲ့အခါ စက်စတီးယပ်စ် ဂဲလပ်စ် ဦးဆောင်တဲ့ ရောမစစ်သား ၃၀,၀၀၀ ဟာ ပုန်ကန်မှုကို နှိမ်နင်းဖို့ မဿဲ ၂၄:၁၅၊ ၁၆။
ဂျေရုဆလင်မြို့ကို ချီတက်လာကြတယ်။ ရောမတွေ မြို့ထဲ ချက်ချင်း ဝင်ရောက်လာပြီး ဗိမာန်တော်အပြင်တံတိုင်းကို ဖြိုဖျက်ကြတယ်။ ပြီးတော့ အကြောင်းရင်း မရှိဘဲ ပြန်ဆုတ်ခွာသွားကြတယ်။ ဂျူးသူပုန်တွေ က သူတို့နောက်ကို လိုက်လံတိုက်ခိုက်ကြ တယ်။ ရောမစစ်သားတွေရော ဂျူးသူပုန်တွေပါ မရှိတော့တဲ့အချိန်မှာ ခရစ်ယာန် တွေဟာ ယေရှုရဲ့ သတိပေးချက်ကို လိုက်နာပြီး ဂျေရုဆလင်မြို့ကနေ ဂျော်ဒန်မြစ်တစ်ဖက်ကမ်းရှိ တောင်တန်းတွေဆီ ထွက်ပြေးကြတယ်။—နောက်တစ်နှစ်မှာ ဗိုလ်ချုပ် ဗက်စပါဆီယန်နဲ့ သားတော် တိုက်တပ်တို့ ဦးဆောင်တဲ့ ရောမတွေက ယုဒနယ်ကို ပြန်ချီတက်လာကြတယ်။ ဒါပေမဲ့ အေဒီ ၆၈ မှာ ရောမဧကရာဇ် နီရို ဆုံးပါးသွားတဲ့အတွက် ဗက်စပါဆီယန်ဟာ ထီးနန်းသိမ်းပိုက်ဖို့ ရောမ ကို ပြန်သွားတယ်။ တိုက်တပ်ကိုတော့ စစ်သည် ၆၀,၀၀၀ နဲ့ ထားရစ်ခဲ့တယ်။
အေဒီ ၇၀ ဇွန်လမှာ တိုက်တပ်ကယုဒနယ် တစ်ဝိုက်က သစ်ပင်တွေကို ခုတ်လှဲပြီး ဂျေရုဆလင်မြို့ပတ်လည်မှာ ၄.၅ မိုင် (၇ ကီလိုမီတာ) ရှိတဲ့ တုတ်ချွန်ခံတပ် ဆောက်လုပ်စေတယ်။ စက်တင်ဘာလမှာ ယေရှု ကြိုဟောတဲ့အတိုင်းပဲ ရောမတွေက မြို့တော်နဲ့ ဗိမာန်တော်ကို လုယက်တိုက်ခိုက်ပြီး မီးရှို့ပစ်တဲ့အတွက် ကျောက်တုံးတွေ ပြိုကျကုန်တယ်။ (လုကာ ၁၉:၄၃၊ ၄၄) ခန့်မှန်းချက်တစ်ခုအရ “ဂျေရုဆလင်မြို့နဲ့ ပတ်ဝန်းကျင်နယ်တွေမှာ လူပေါင်း နှစ်သိန်းခွဲနဲ့ ငါးသိန်းကြား သေဆုံးခဲ့တယ်။”
အင်ပါယာ အောင်ပွဲ
အေဒီ ၇၁ မှာ အီတလီနိုင်ငံကို တိုက်တပ် ပြန်လာတဲ့အခါ ရောမမြို့သူမြို့သားတွေ သောင်းသောင်းဖျဖျ ကြိုဆိုကြတယ်။ မြို့လုံးကျွတ် ခြိမ့်ခြိမ့်သဲ အောင်ပွဲခံ စီတန်းလှည့်လည်ကြတယ်။
ရောမမြို့လမ်းတွေမှာ တိုက်ရာပါပစ္စည်းတွေကို လှည့်လည်ပြသတဲ့အခါ လူတွေ တအံ့တဩဖြစ်ခဲ့ကြတယ်။ စစ်တိုက်ခိုက်ပုံတွေ ပုံဖော်ထားတဲ့ အလှပြယာဉ်ကြီးတွေ၊ ဂျေရုဆလင် ဗိမာန်တော်ကနေ သိမ်းယူလာတဲ့ပစ္စည်းတွေကို အရသာခံကြည့်ခဲ့ကြတယ်။
အေဒီ ၇၉ မှာ တိုက်တပ်က ခမည်း တော် ဗက်စပါဆီယန်ရဲ့ အရိုက်အရာကို ဆက်ခံခဲ့တယ်။ ဒါပေမဲ့ နှစ်နှစ်အကြာမှာ မမျှော်လင့်ဘဲ တိုက်တပ် ကွယ်လွန်ခဲ့တယ်။ ညီတော် ဒိုမီရှန်က ထီးနန်း ဆက်ခံပြီး တိုက်တပ်ကို ဂုဏ်ပြုတဲ့အနေနဲ့ မုခ်ဦး တည်ဆောက်ခဲ့တယ်။
အခုခေတ် မုခ်ဦး
ရောမမြို့ရှိ တိုက်တပ်မုခ်ဦး
အခုခေတ် ရောမကို လာလည်တဲ့လူထောင်ပေါင်းများစွာဟာ တိုက်တပ်မုခ်ဦးကို အလွန်သဘောကျကြတယ်။ မုခ်ဦးကို အနုပညာလက်ရာအဖြစ် ရှုမြင်တဲ့သူ ရှိသလို ရောမအင်ပါယာရဲ့ ကျက်သရေဆောင်တစ်ခုအဖြစ် ရှုမြင်သူလည်း ရှိတယ်။ တချို့ကတော့ ဂျေရုဆလင်မြို့နဲ့ ဗိမာန်တော် ကျဆုံးခန်းအဖြစ် ရှုမြင်ကြတယ်။
ကျမ်းစာကို ဂရုတစိုက် ဖတ်ရှုသူတွေအတွက်တော့ တိုက်တပ်မုခ်ဦးဟာ ဒီထက်မက အဓိပ္ပာယ် ရှိတယ်။ ကျမ်းစာဟောကိန်းတွေဟာ တိကျမှန်ကန်တယ်၊ ယုံကြည်စိတ်ချနိုင်တယ်၊ ဘုရားသခင့် စွမ်းအားတော် လှုံ့ဆော်မှုနဲ့ ရေးထားတယ်ဆိုတဲ့ အသံတိတ်သက်သေပါပဲ။ —၂ ပေတရု ၁:၁၉-၂၁။