Титти арки дууӕ фарсебӕл ци барельефтӕ ес, уоми ӕвдист цӕунцӕ историй зундгонд тугъди хабӕрттӕ. Фал ӕй алке нӕ зонуй, еци аркӕн ӕма Библийӕн еумӕйагӕй ци ес, уой: Титти аркӕ ӕнӕдзоргӕ ӕвдесӕн ӕй, Библий пахампарӕдтӕй сӕ еу ке исӕнхӕст ӕй, уомӕн.

Нӕ эри 30 анзи Роми паддзахади арӕнтӕ адтӕнцӕ Великобритани ӕма Галлийӕй (нур ӕй Франций территори) Египети уӕнгӕ. Еци паддзахӕдти рӕстӕг адӕн сабур ӕма гъӕздуг цард кодтонцӕ. Фал Роми паддзахади еу бунати арӕх змӕнститӕ уидӕ – Иудейи.

Еу энциклопедий финст ӕй: «Роми дӕлбарӕ ка адтӕй, еци бӕститӕй Иудейи цӕргутӕ ромӕгтӕй се ’сӕфст куд уидтонцӕ, уотӕ ма си се ’сӕфт уидтонцӕ ӕрмӕстдӕр цалдӕр бӕсти. Ӕма сӕ ромӕгтӕ дӕр нӕ уарзтонцӕ. Дзиуиттӕгтӕ ромаг хецӕуттӕмӕ лӕгъуз цӕстӕй кастӕнцӕ, уомӕн ӕма син етӕ се ’гъдӕуттӕ нецӕмӕ дардтонцӕ. Ромӕгтӕ ба дзиуиттӕгтӕмӕ мӕстгун кодтонцӕ, уомӕн ӕма хъӕбӕр хеваст адтӕнцӕ, ӕма сӕ уой туххӕй ӕфхуардтонцӕ» (The Encyclopedia of Ancient Rome). Дзиуиттӕгтӕй беретӕ ӕнгъӕлмӕ кастӕнцӕ, Роми къохӕй сӕ ка исуӕгъдӕ кӕндзӕй ӕма Израил нӕуӕгӕй ка искадгин кӕндзӕй, уӕхӕн разамонӕгмӕ. Фал нӕ эри 33 анзи Йесо Киристе загъта, Йерусалимбӕл устур бӕллӕх ке ’рцӕудзӕй.

Мӕнӕ ӕ дзурдтӕ: «Уомӕн ӕма дӕбӕл уӕхӕн бон ӕркӕндзӕй, ӕма дин де знӕгтӕ дӕ алливарс циргъ гъӕдтӕй фарс искӕндзӕнцӕ, ӕртухсдзӕнцӕ дӕбӕл ӕма дӕ аллирдигӕй ӕрӕлхъевдзӕнцӕ. Дӕхе дӕр дин ниппурхӕ кӕндзӕнцӕ ӕма дин дӕ сувӕллӕнтти дӕр дӕ медӕг ниццӕгъддзӕнцӕ, ӕма ди дор дорбӕл нӕбал ниууадздзӕнцӕ, уомӕн ӕма дӕмӕ Хуцау бӕрӕггӕнӕг кӕд ӕрцудӕй, еци рӕстӕг нӕ базудтай» (Лукай 19:43, 44).

Киристей дзурдтӕ ӕ ахуркӕнуйнӕгтӕмӕ, ӕвӕдзи, ӕнахур фӕккастӕнцӕ. Дууӕ боней фӕсте Йерусалими ковӕндонӕмӕ кӕсгӕй ӕ ахуркӕнуйнӕгтӕй кадӕр уотӕ бакодта: «Ахургӕнӕг, ракӕсай! Мӕнӕ ци дортӕ ӕма ци хӕдзӕрттӕ!» Ӕцӕгӕйдӕр, бӕлвурдгӕнӕнтӕмӕ гӕсгӕ ковӕндонӕ ци дортӕй амад адтӕй, уонӕй еуӕй-еуетӕн сӕ дӕргъӕ адтӕй 11 метри, сӕ уӕрхӕ 5 метри, сӕ бӕрзӕндӕ ба 3 метремӕй фулдӕр! Фал син Киристе загъта: «Ӕрцӕудзӕй уӕхӕн рӕстӕг, ӕма, ами ци уинетӕ, етӕ уотӕ ниппурхӕ уодзӕнцӕ, ӕма си дор дорбӕл нӕбал байзайдзӕй» (Марки 13:1; Лукай 21:6).

Удта ма син загъта: «Йерусалимбӕл ӕфсӕдтӕ ке ӕртухстӕнцӕ, уой ку фӕууинайтӕ, уӕд ӕй зонетӕ, ӕ исӕфт ке ӕрхӕстӕг ӕй. Уӕд, Иудейи ка уа, етӕ ледзӕнтӕ хуӕнхтӕмӕ. Йерусалими ка уа, етӕ дӕр уордигӕй ледзӕнтӕ, ӕ алливарс ци гъӕутӕ ес, уоми ка уа, етӕ ба горӕтмӕ ма бацӕуӕнтӕ» (Лукай 21:20, 21). Цума Киристей дзурдтӕ исӕнхӕст ӕнцӕ?

33 анзи рацудӕй ӕма ма дзиуиттӕгтӕ Роми дӕлбарӕ адтӕнцӕ. Фал нӕ эри 66 анзи ромаг хецау Гессий Флор ковӕндони хӕзнадонӕй ӕхца рахаста, ӕма дзиуиттӕгтӕ нӕбал ниббухстӕнцӕ. Уобӕл берӕ нӕ рацудӕй, уотемӕй ӕрӕмбурд ӕнцӕ ӕма, Йерусалими ка адтӕй, еци ромаг ӕфсӕддонти ниццагътонцӕ.  Уой фӕсте ба фегъосун кодтонцӕ Роми дӕлбарӕ ке нӕбал ӕнцӕ.

Уобӕл ӕртӕ мӕйи дӕр нӕма рацудӕй, уотемӕй 30 000 ромаг ӕфсӕддони, Цестий Галл сӕ сӕргъи, уотемӕй, Йерусалиммӕ ӕрбалӕбурдтонцӕ, цӕмӕй змӕнтгути ниппурхӕ кодтайуонцӕ. Ромӕгтӕ горӕтмӕ бампурстонцӕ ӕма райдӕдтонцӕ ковӕндони ӕндаг фарс пурхӕ кӕнун. Фал удта ӕвваст цӕмӕдӕр гӕсгӕ еци гъуддаг фӕууагътонцӕ ӕма фӕффӕстӕмӕ ’нцӕ. Дзиуиттӕгтӕ цийнӕй мардӕнцӕ ӕма ма сӕ фӕстегӕй дӕр расурдтонцӕ. Ромаг ӕфсӕддонтӕ ӕма, ка зманста, еци дзиуиттӕгтӕ горӕтӕй ку рацудӕнцӕ, уӕд киристӕнттӕ Йесой фӕдзӕхстмӕ гӕсгӕ Иордани цӕугӕдони иннӕ фарс ци хуӕнхтӕ адтӕй, уордӕмӕ фӕллигъдӕнцӕ (Матфеййи 24:15, 16).

Иннӕ анз ба Роми ӕфсӕдтӕ, инӕлар Веспасиан ӕма ӕ фурт Тит сӕ сӕргъи, уотемӕй, фӕстӕмӕ Иудейӕмӕ ӕрбаздахтӕнцӕ. Фал минкъий фӕстӕдӕр ба, нӕ эри 68 анзи паддзах Нерон рамардӕй ӕма Веспасиан фӕстӕмӕ Роммӕ раздахтӕй, цӕмӕй ӕ бӕсти паддзах иссайдӕ. Ӕ фурт Тит ба еу 60 000 ӕфсӕддоней хӕццӕ Иудейӕ байахӕссунмӕ байзадӕй.

Нӕ эри 70 анзи июни Тит е ’фсӕддонтӕн бӕлӕстӕ ракъуӕрун кодта ӕма син Йерусалими алливарс исаразун кодта, 7 километри ка адтӕй, уӕхӕн фарс циргъ гъӕдтӕй. Еу ӕртӕ мӕйей фӕсте ба ромӕгтӕ горӕт ӕма ковӕндонӕ ниппурхӕ кодтонцӕ ӕма сӕ басугътонцӕ. Киристе куддӕриддӕр загъта, уотӕ си дор дорбӕл нӕбал ниууагътонцӕ (Лукай 19:43, 44). Бӕрӕггӕнӕнтӕмӕ гӕсгӕ, «Йерусалими ӕма бӕсти иннӕ рауӕнти цагъд ӕрцудӕй 500 000 адӕймагей бӕрцӕ».

Нӕ эри 71 анзи Тит Италимӕ ӕрӕздахтӕй ӕма ин Роми цӕргутӕ устур кадӕ искодтонцӕ. Ӕнӕгъӕнӕ горӕти цӕргутӕ парадмӕ рацудӕнцӕ – уӕхӕн дессаги бӕрӕгбон сӕмӕ некӕдма адтӕй.

Адӕн десӕй мардӕнцӕ, Роми гъӕунгти еци хъазар ӕма рӕсугъд дзаумӕуттӕ ку фӕццӕйхастонцӕ, уӕд. Ромӕгтӕ тугъди ци наутӕ байстонцӕ ӕма Йерусалими ковӕндонӕй ци дзаумӕуттӕ рахастонцӕ, етӕ цӕстӕ сӕхемӕ ӕлвастонцӕ. Устур уӕрдӕнттӕбӕл ба ӕвдист цудӕй, тугъди будури ӕфсӕддонтӕ куд тухтонцӕ, е.

Тит ӕ фидӕ Веспансиани бӕсти паддзах иссӕй нӕ эри 79 анзи, фал дууӕ анзей фӕсте ӕнӕнгъӕлти ӕрбамардӕй. Ӕ фӕсте паддзах иссӕй е ’нсувӕр Домициан ӕма ин ӕ номбӕл триумфалон аркӕ искодта.

Алли анз дӕр Роммӕ Титти аркӕ фӕууинунмӕ сӕдӕгай мин адӕймаги ӕрцӕуй. Еуӕй-еуетӕ ’й нимайунцӕ аййевади арӕзтадӕбӕл, иннетӕ ба си уинунцӕ Роми паддзахади хъаурӕ. Кадӕртӕ ба ’й нимайунцӕ, Йерусалим ӕма ӕ ковӕндонӕ ке ниппурхӕ кодтонцӕ, уой номбӕл цирт.

Фал Библи лӕмбунӕг ка кӕсуй, е ба ’й зонуй, Титти аркӕн устурдӕр нисанеуӕг ке ес. Библий пахампарӕдтӕбӕл ӕууӕндӕн ке ес ӕма ке исӕнхӕст унцӕ, удта Хуцауи фӕндӕй финст ке ӕрцудӕнцӕ, уомӕн аци аркӕ ӕнӕдзоргӕ ӕвдесӕн ӕй (2 Петури 1:19–21).