Arco ndrígóo Tito gíʼdoo a̱jma̱ xtiʼkhu náa nasngájma rí nirígá rí nigiʼdoo wéñuʼ numuu. Mú nguáthi̱i̱n xa̱bu̱ nuniʼnuʼ májánʼ xú káʼnii kagujtuminaʼ arco ga̱jma̱a̱ náa Biblia. Arco ndrígóo Tito nindxu̱u̱ mbá ajngáa rí tséʼthi rí nimbánuu májánʼ rí nijuiʼtáriyaʼ náa Biblia.

Nákha tsiguʼ 30, tsiguʼ nda̱wa̱á, mbaaʼ rí kaʼyoo Roma najmarígáa asndu Britania ga̱jma̱a̱ Galia (Francia) asndu Egipto, ga̱jma̱a̱ xúgíʼ xuajen nikuwa tsímáá ga̱jma̱a̱ nikuwa májánʼ wéñuʼ. Mú, rígá mbá xuajen rí mitsínguánʼ wéñuʼ rí naʼni makiʼnáa Roma: Xuajen Judea bi̱ nixuximijná.

Náa Encyclopedia of Ancient Rome naʼthí: “Náa tikhuu mbaaʼ rí kaʼyoo Roma tsíñún guyamijná Xa̱bu̱ Ñajunʼ ga̱jma̱a̱ xa̱bu̱ bi̱ nutañajúnʼ xóo náa xuajen Judea. Judíos ra̱ʼkhá tháán nikiʼníin numuu rí Xa̱bu̱ Ñajunʼ ndrígu̱ún ni̱ndxu̱ún xa̱bu̱ bi̱ naguwáʼ i̱mba̱ níʼkhá ga̱jma̱a̱ rí tséyamajkuíí costumbre ndrígu̱ún. Ga̱jma̱a̱ Roma tániguʼ nditháan rí judíos nixuximi̱jna̱”. Mbaʼin rí ikhiin guáʼthi̱i̱n rí mbáa mesías político maʼni káwíin náa Xa̱bu̱ Ñajunʼ Roma ga̱jma̱a̱ maʼni rí Israel mani̱ndxu̱u̱ mitsaan xó má nákha ginii. Mú nákha tsiguʼ 33, Jesucristo niʼthí rí xuajen Jerusalén mambáa.

Jesús niʼtáriyaʼ: “Numu ri maʼka mbiʼi ri xaʼni uguiʼnila, muruguamaʼanʼla xabo sianʼ gajmiaʼla, mba nahua-jayu, jame asjndo na maguaʼtanʼla maxunijahuiñaʼla, jame muxtriganʼla asjndo mbayi gajmiaʼla ijñaʼla naʼ aun xuajñaʼla, jame asjndo nimba itsi naxaguanu naʼ tsudu imba itsi” (Lucas 19:43, 44).

Mú ajngáa rí niʼthí Jesús niʼni maguanún tsiánguá xa̱bi̱i̱. A̱jma̱ mbiʼi nda̱wa̱á índo̱ ndiyáá templo ndrígóo Jerusalén, mbáa rí ikhiin niʼthí: “Maestro, atiaxi mataya, pu-mbaʼo itsi nitoʼo jame pu-mbaʼo guʼhua”. Gajkhun rígi̱, nuthi rí tikhu itsí ndrígóo templo naʼni mbá 11 metros rí mbaʼ, 5 metros rí ma̱ja̱nʼ ga̱jma̱a̱ 3 metros rí mitsídánʼ. Mú Jesús niriʼña̱a̱: “Ri nduyala guejio, maʼka mbiʼi ri naxaguanu ni xi imbo itsi naʼ tsudu itsi ruʼkue, mba xugui mitrangudi” (Marcos 13:1; Lucas 21:6).

Ga̱jma̱a̱ xóó niʼthí: “Rido guyala xuajin [Jerusalén] ri nijuguamaʼan nini soldado, aʼkue guyala ri niganu-ma ri mamba xuajin ruʼkue. Aʼkue ri tsi majuhua naʼ mbayu Judea, agañu mago naʼ juba; tsi juhua naʼ aun xuajin ruʼkue, agañu, xoma tsi juhua xana, naxataʼan naʼ xuajin ruʼkue” (Lucas 21:20, 21). Lá gajkhun nimbánuu rí niʼthí Jesús ráʼ.

Niʼni mbá skíñúʼ gu̱wa̱ʼ i̱jtsu̱ mu tsiguʼ, rí judíos niʼngu̱u̱n nikuwa náa xa̱bu̱ romanos. Nda̱wa̱á kayuʼ, nákha tsiguʼ 66, procurador ndrígóo Judea, Gesio Floro, niʼni kúwáʼ mbújkha̱a̱ rí nigimbóó náa templo. Rúʼko̱ niʼni rí makiʼníin itháan. Nacha̱ judíos bi̱ nixuximi̱jna̱ nini gámbáa Jerusalén, niradíin soldados romanos ga̱jma̱a̱ nithi rí nánguá gaʼtañajúnʼ Roma.

Ajtsú igu̱nʼ nda̱wa̱á, itháan rí mbá  skíñúʼ gu̱wa̱ʼ mil soldados romanos bi̱ Cestio Galo nixnúún ikha, nigún Jerusalén mu muni gámbíin xa̱bu̱ bugi̱. Ikhú romanos nacha̱ nitu̱ʼu̱u̱n náa xuajen ga̱jma̱a̱ nindiraʼá náa agoo muro rí wíji̱ rexa̱a̱ ndrígóo templo. Ikhú, asndu xóo nda̱a̱ numuu rí ikhiin nigúun. Asndu nadxún judíos bi̱ nixuximi̱jna̱ nigún ruxkhúún. Rígi̱ niʼni rí cristianos munimbu̱ún consejo ndrígóo Jesús ga̱jma̱a̱ magajnún mu magún náa kúbá, náa i̱mba̱ ridoo mañu ndrígóo Jordán (Mateo 24:15, 16).

Imbo̱o̱ tsiguʼ, Roma nigíʼdu̱u̱ mbu̱júu̱ nixmínaʼ ga̱jma̱a̱ Judea ga̱jma̱a̱ nigíʼ general Vespasiano ga̱jma̱a̱ a̱ʼdióo Tito mu mutañajún’ soldados. Mú nákha tsiguʼ 68, nguáthá mbiʼi nda̱wa̱á rí nikháñuu emperador Nerón, Vespasiano nitanga̱a̱ náa Roma mu maʼtáñajunʼ mbu̱júu̱, ga̱jma̱a̱ Tito niguanúu náa ñawúunʼ rí maxmínaʼ ga̱jma̱a̱ Judea, bi̱ nixná ikhúún mbá ajtsú skíñúʼ mil soldados.

Nákha ñajunʼ gu̱nʼ junio tsiguʼ 70, Tito niʼtáñajunʼ soldados ndrígio̱o̱ rí murujtu ixi̱ dí rígá náa Judea mu mutha kúdí mu muruguama̱ʼa̱n náa mbájndi xuajen Jerusalén, rí naʼni 7 kilometros rí mbaʼ. Rí ajtsú igu̱nʼ nda̱wa̱á, xa̱bu̱ romanos nirawíi ga̱jma̱a̱ nitsikha̱a̱ xuajen ga̱jma̱a̱ templo. Xó má niʼtáriyaʼ Jesús, ní táguanúu nimbá itsí (Lucas 19:43, 44). Xóo awan rí nigájnuu, “naʼni mbá 250,000 ga̱jma̱a̱ 500,000 xa̱bu̱ bi̱ nikháñun náa Jerusalén ga̱jma̱a̱ náa i̱ʼwáʼ xuajen rí kaʼyoo”.

Nákha tsiguʼ 71, Tito nitanga̱a̱ náa Italia, ga̱jma̱a̱ Roma nigruiguíi ga̱jma̱a̱ xúgíʼ gamajkhu. Xúgínʼ bi̱ kuwa náa xuajen nigájnun mu muniriyaaʼ mbá ndxa̱a̱ rí itháan mba̱a̱ rí nditháan túyáá náa xuajen rúʼko̱.

Xa̱bu̱ niʼniún tsiánguá índo̱ ndiyáá tesoros rí mitsaan rí xtáa ranújngoo náa kamba̱a̱ ndrígóo Roma. Ndiyáá barcos rí niguwáʼ kudúún, ga̱jma̱a̱ carros mba̱ʼu̱ rí nigumaratáá májánʼ náa na̱ʼkha̱ xóo nixmijná náa guerra xa̱bu̱ ga̱jma̱a̱ rí nirawíi náa templo ndrígóo Jerusalén.

Nákha tsiguʼ 79, índo̱ nikháñu Vespasiano, a̱ʼdióo Tito ninindxu̱u̱ emperador, mú káaʼ a̱jma̱ tsiguʼ nda̱wa̱á nda̱a̱ tsu̱ma̱ nikháñu. Mú ndxájuu Domiciano nigruigú ñajunʼ, ga̱jma̱a̱ nda̱wa̱á ikhaa nitsiji mbá arco náa nasngájma rí niʼngo̱o̱ nidaʼ Tito.

Arco ndrígóo Tito naʼni maguanún tsiánguá mbaʼin xa̱bu̱ bi̱ nagún gúya náa Xua ndrígóo Roma xúgíʼ tsiguʼ. Tikhun nduyáá rí mitsaan wéñuʼ rí niguma; eʼwíínʼ nduyáá xóo mbá gamajkhu náa Xa̱bu̱ Ñajunʼ Roma, ga̱jma̱a̱ eʼwíínʼ nduyáá rí nindxu̱u̱ ajngáa náa naʼthí rí niguma gámbáa Jerusalén ga̱jma̱a̱ templo ndrígóo.

Mú, mbáa bi̱ naʼnigajmaa májánʼ Biblia, ndaʼyoo rí nandoo gáʼthúu̱n Arco ndrígóo Tito. Nindxu̱u̱ mbá ajngáa rí tséʼthi nimbá, mú nasngájma rí kiʼtáriyaʼ náa Biblia nindxu̱u̱ jmbu, gajkhun ga̱jma̱a̱ na̱ʼkha̱ náa Dios (2 Pedro 1:19-21).